مفيش غير سؤال واحد مش لاقية له اجابة
مش موضوع ازاى يعذبوا طفل و ازاى البنى ادمين رخصوا للدرجة دى...دى أسئلة خلاص مابقلهاش مكان و لا معنى ولا اجابة حتى
السؤال المخيف....والعمل؟
لا العياط حيرجع الولد ولا ضرب كف على كف و لا الغضب و لا الاكتئاب....و لا الخوف و الاحباط و باقى القايمة اللى عايشين فيها من ساعة ما فتحنا عينينا على دى دنيا
الولد يتقتل على ايدين ناس وكلناهم حمايتنا والحياة حاتمشى عادى؟
حانكمل أكل و شرب و فسح و خروج و الولد لسه دمه طرى...
نعمل ايه؟
ندعى ربنا ينتقم منهم؟
ونعم بالله...لكن احنا مفيش فى ايدينا حاجة كمان؟
ولا حد يقدر يستحملها
حسبنا الله و نعم الوكيل
نعمل ايه؟
نطلع عليهم فى الشارع نموتهم؟
حايطلعوا أبرياء بتوع عصيان و قفا بس
لكنهم و لا موجودين فى الشارع حتى
الجبن سيد الأخلاق فعلا
فى الشارع البلطجية يتسلوا علينا
فى الأقسام يعذبونا
حانعمل ايه...
اتفضحوا وماتلموش
اتحاكموا برضه مفيش فايدة
فى الأخر كل يوم بنسمع حكاية أسوأ من اللى قبلها
ونتحسر!
