Dust and Dreams

شهادة محمد خلفاوي عن مجزرة الالتراس

2012-02-09T12:12:00.017+02:00

محمد خلفاوي كان في ماتش بورسعيد لما حصلت المجزرة وكتب الكلام الجاي وهو هناك، المجزرة مدبرة ربنا ينتقم منهم

شهادة أحمد غفار عن مجزرة الالتراس

2012-02-03T00:37:00.001+02:00

من اول اليوم بنهدي الناس واحنا عارفين ان هايحصل مشكلة وبنقول اننا عاملين بيان والفترة دي مش مستحملة وتوجيهات من الكبار للصغيرين بالهدوء

اتضرب علي قطرنا طوب في الاسماعيلية واحنا متعودين علي كدة ودة العادي ان القطر او الاتوبيس يتهاجم في سكتنا من جمهور محافظة تانية والقطر اتكسر

نزلنا من القطر في "الكاب" قبل بورسعيد علشان نركب اتوبيسات ندخل بيها البلد علشان معروف ان جمهور بورسعيد عامل كامين عند المحطة

ركبنا الاتوبيسات ودخلنا بورسعيد من ناحية الاتوبيسات والطوب ع الاتوبيسات طول السكة لحد الاستاد ودة برضوا عادي وبيحصل علي طول ف كل ماتش ترحال

سمعنا واحنا داخلين الاستاد ان جمهور المصري هاجم اتوبيس لاعيبة الاهلي واصاب سيد معوض بالالعاب النارية

في خلال الشوط الاول هتافات عدائية من الطرفين كالعادة وبعدها تراشق من الجانبين بالالعاب النارية

بقينا نشوف اقتحامات للملعب من جمهور المصري بسهولة جدا من جوانب كتير للعب زادت بعد الشوط الاول وجت عند جمهور الاهلي وضربوا علينا صواريخ

اكتفت الشرطة انها بعدتهم بعيد بدون القبض علي اي حد من اللي ضرب الصواريخ علي جمهور الاهلي

الصواريخ علينا فضلت مستمرة طول الشوط الثاني وعمالين كل شوية ينزلوا يحتفلوا بالاجوال بسهولة جدا في وجود الشرطة ومفيش اي تدخل

اول ما الحكم صفر هجوم علي الملعب بطريقة غريبة في اتجاهين واحد ناحية اللعيبة يضربوهم والثاني ناحية جهمور الاهلي ف

المدرج

في اللحظة دي انوار الاستاد اتطفت علينا كلها والاستاد اتحول لضلمة في الملعب ووقتها كان في صفين بس كردون امني بطول مدرج الاهلي

فجأة الكردون الامني اللي بيحمي الجمهور الاهلاوي اتفتح مرة واحدة لجمهور المصري علشان يطلعوا المدرج علي جمهور الاهلي

دخلوا من البوابات بتاعت المدرج اللي من تحت وكانت مفتوحة وطلعوا بسهولة جدا للمدرج باعداد كبيرة مش اقل من ٢٠٠٠ ل ٣٠٠٠

بقينا متفاجئين ان الشرطة سايباهم بالسهولة دي .. وانهم طالعين لنا بالعدد الكبير دة .. في العادي بيكون شتيمة وشماريخ وطوب وبس شغل كورة بس

لقينا الناس اللي طالعالنا دي متسلحين بشوم واسلحة بيضا وطوب ازاز وشماريخ وكل انواع الاسلحة اللي ممكن يتضرب بيها في اكتر من شغب كورة

لما جمهورنا شاف العدد دة عرفنا اننا مش هانقدر نتصدي لكل دة فجرينا علي الممرات اللي تطلع علي المخارج للبوابات الخارجية للاستاد

المفروض ان الممرات دي بتبقي مفتوحة علشان طلوعنا م الاستاد لقيناها مقفولة واللي كان مسئول عن تأمينها افراد من الجيش من برة

الجزء اللي ما بين بوابات الممرات دي وبواباتها المقفولة في اخرها في مساحة تانية بينها وبين بوابات الخروج الرئيسية الكبيرة زي استاد القاهرة

المساحة دي كان فيها افراد من الجيش واحنا مقفول علينا ومش قادرين نهرب حتي منها ..

فاتزنقنا في الممر وبقينا بين خيارين الموت من ورانا والبوابات مقفولة وحتي لو خرجنا كان في اهالي برة مستنينا علي البوابات الرئيسية

٩٠ ٪ من جمهور الاهلي اتزنق في الممر دة اللي عرضه ٦ متر ونازل بعمق سلم طوله ١٠ متر .. الجمهور كان طبقات مزنوقة فوق بعضها مفيش مخرج غير دة

ومن ورانا جمهور المصري بيضرب في كل اللي اللي بيلاقيه حتي الواقعين علي الارض كل دة بعرض المدرج بتاعنا

الضرب ماكانش ضرب وبس كان ضرب وسرقه وخصوصا تيشيرت المجموعة والموبيلات والفلوس واي هدوم لابسها الشباب والناس في الممر بتزيد

مش كل الناس نزلت تحت في ناس حاولت تطلع علي حرف السور وتهرب منه وكتير من الناس دي وقعت من فوق اما بسبب زقهم او التدافع او الخوف

الوضع في الممر ان الناس كلها مزنوقة في الممر ومتكتفه وعبارة عن طبقات محخشورة في بعض ومخنوقة في الممر الضيق دة

باب الممر وقع من التدافع وجمهورنا ابتدوا يخرجوا وتدافع شديد ودهس في مجموعة راحت علي اوضة اللبس بتاعت اللعيبة وشوفت راجل عجوز ميت قدامي

ابتدي الجمهور ينقذوا بعض لان ماكانش في اسعاف وبنطلع الناس برة واللعيبة ابتدت تخرج واستمرت عملة تسليك الناس دي حوالي ساعة

الارض كانت عبارة عن جزم وشنط وعصيان وتيشرتات والسقف الفايبر للممر دة اتكسر ووقع

التدخل بتاع الامن المركزي ابتدي بعد تلت ساعة من بداية الاحداث اصلا بعد ما الناس كانت ماتت م التدافع والخنقة وبعد ما جمهور المصري ابتدي يهرب

الجيش ابتدي بعد كل دة يضرب نار في الهوا من برة علشان يمش جمهور المصري اللي كان مستني جمهور الاهلي برة

الاصابات معظمها كسور وجروح من الطوب والازاز وحروق من الشماريخ وحالات اختناق كتير اكثرها وفيات

كانت جماهير المصري بتقلب المصابين واللي بيتمسك وبتاخد فلوسهم وساعاتهم وموبايلاتهم ومعظم اللي راجعين راجعين القاهرة من غير حاجتهم اصلا

اللي حصل النهاردة يا مدبر انه يحصل .. ياتم تسهيله .. مفيش حل ثالث واللي حصل دة فوق مستوي شغب الكورة العادي اللي مشجعين الكورة عارفينه

اللي شوفته النهاردة افظع من اللي شوفته في محمد محمود .. حصل كل حاجة اصلا فوق ما حد يتخيل

واحنا راجعين في القطر كل الناس كانت بتؤكد ان اللي بيحصل دة مدبر وكان السليم بيهتف في كل محطة ضد الشرطة

انا بعرض القصة دلوقت علشان ما يحصلش اي خلط .. والقرار وايه اللي هايحصل هايكون راجع للمجموعة ككل بعد ما نجتمع

كردون الإخوان ... ليه؟

2012-01-31T23:57:00.002+02:00

أنا عايزة أي شخص عاقل ومتزن سواء كان إخوان أو لأ يقوللي إيه لازمة العك اللي حصل النهاردة؟ أي شخص محايد، أي حد من الشباب والشابات الأطهار الجمال اللي نزلوا يوم 25 يناير، يفهمني إحساسهم إيه بعد ما كانوا امبارح بيواجهوا أقوى جهاز شرطة قمعي في الشرق الأوسط جنب لجنب مع شباب الإخوان، وهم النهاردة رايحين في مسيرة عادية عملناها 30 ألف مرة قبل كده يقولوا لمجلس الشعب اللي انتخبه حوالي 30 مليون مصري: لو سمحتوا استلموا السلطة عشان في دبابة محشورة فوقينا؟ إيه إحساسهم لما يفوجئوا بكردون من شباب الإخوان واقف في وشهم وبيقوللهم احنا بنحمي المجلس وخايفين ناس تندس وسطكوا؟

حافترض فعلاً إنهم جالهم خبر إن المسيرة دي هاتقلب غم وإن في ناس "حاتندس" وترمي طوب على القوات الموجودة هناك، إنتوا مالكوا؟ بتورطوا نفسكوا ليه؟ حبيبي يا إخوان إنت مهندس أو عامل أو موظف أو دكتور أو طالب أو سواق، مش شغلتك إنك تحرس منشآت عامة ولا تحميها، دي شغلة الشرطة، مش عاجباك الشرطة اضغط لتشكيل حكومة جديدة، إنتوا مش واخدين 47% من مقاعد مجلس الشعب والمفروض من حقكم تشكلوا حكومة؟ ليه تحط نفسك في وش مسيرة عايزاك تستلم السلطة؟ ومين اللي استجرى يمد إيده على أجدع البنات هبة غنام وسارة عثمان؟ هي حصلت؟

إنت دلوقتي شايف مسيرة رايحة للبرلمان، من حقهم يعملوا مسيرة سلمية، ومن حقهم يتظاهروا على باب البرلمان وفي أي مكان عام هم يختاروه، التحول الديمقراطي هو الاعتراف بالحق ده وتطبيقه، مش إننا نعمل انتخابات وخلاص! لو حد اعتدى عليهم أو اعتدوا على حد المفروض يكون في شرطة محترمة تتصرف، انتوا مالكوا؟

طبعاً مش هو ده اللي حصل، مكتب الإرشاد بالتعاون مع المجلس العسكري باعت أنصار الإخوان لخلق تاني تصادم في الشارع، والغباء بجد إن الشباب يصدقوا وينزلوا "يحموا" مجلس الشعب، وطبعاً في متظاهرين أكيد ضايقهم الوضع وزقوا الكردون وشتموا وضربوا، إنما في النهاية مين اللي حطنا في وش بعض؟ وليه بتسمعوا الكلام من غير تفكير ولا بصيرة؟

على الرغم من إني اتضايقت من الاشتباكات اللي حصلت مع الإخوان في التحرير يوم 27، إلا إني النهاردة مش لاقية مبرر للي حصل، مفيش أي مبرر منطقي للغلطة الشنيعة دي يااللي فرحانين بتاريخ 80 سنة وعانيتوا من الاضطهاد والسجن والبهدلة وقطع الأرزاق، عيب على شعركم الأبيض يوصل بيكم الغباء السياسي إنكم تبعتوا الشباب يقفوا في وش مسيرة حتى لو كانت المسيرة ضدكم بوضوح وهي ماكانتش كده، عيب!

وبما إنه انتقاد بانتقاد، والنبي بلاش نبرة التعالي والزهو اللي بلاقيها عند كتير من الإخوان، ولما تعاتبهم يعيطوا على السنين اللي قضوها في السجون، تضحياتكم على عيني وراسي، و10 مليون انتخبوكم عشان عندهم أمل تثبتوا على مواقفكم وماتسمحوش بالظلم بالشكل اللي كان موجود، وفوجئنا بإنكم بتحابوا المجلس العسكري الظالم بكل وضوح! أكلمكم بلغتكم؟ ولا تركنوا إلى الذين ظلموا فتمسكم النار، صدق الله العظيم.

التعديلات الدستورية والخديعة الكبرى

2011-12-24T05:26:00.006+02:00

هابلع غضبي وحزني شوية وأتكلم شوية سياسة عن التعديلات الدستورية والإعلان الدستوري والقفا الكبير اللي المجلس العسكري اداهولنا واحنا مش واخدين بالنا وفرحانين بالحبر الفوسفوري.

دلوقتي المجلس العسكري قال لنا إن دستور 71 اتوقف، واقترح تعديلات ووافقنا عليها، مش فاهمة تعديلات ازاي على دستور موقوف؟ أهو ده اللي حصل، المهم في الآخر إننا وافقنا على التعديلات بنسبة 77%.

فكروني بقى التعديلات دي كانت بتقول إيه؟

كلام معظمه معقول، لكن خد لي بالك بقى من المادة 189:

ولكل من رئيس الجمهورية، وبعد موافقة مجلس الوزراء، ولنصف أعضاء مجلسي الشعب والشوري طلب إصدار دستور جديد، وتتولي جمعية تأسيسية من مائة عضو، ينتخبهم أغلبية أعضاء المجلسين من غير المعينين في اجتماع مشترك، إعداد مشروع الدستور في موعد غايته ستة أشهر من تاريخ تشكيلها، ويعرض رئيس الجمهورية المشروع، خلال خمس عشرة يوما من إعداده، علي الشعب لاستفتائه في شأنه، ويعمل بالدستور من تاريخ إعلان موافقة الشعب عليه في الاستفتاء.

- المادة 189 مكررا

يجتمع الأعضاء غير المعينين لأول مجلسي شعب وشوري تاليين لإعلان نتيجة الاستفتاء علي تعديل الدستور لاختيار الجمعية التأسيسية المنوط بها إعداد مشروع الدستور الجديد خلال ستة أشهر من انتخابهم، وذلك كله وفقا لأحكام الفقرة الأخيرة من المادة 189.

- المادة 189 مكررا 1

يمارس أول مجلس شوري، بعد إعلان نتيجة الاستفتاء علي تعديل الدستور، بأعضائه المنتخبين اختصاصاته.

ويتولى رئيس الجمهورية، فور انتخابه، استكمال تشكيل المجلس بتعيين ثلث أعضائه، ويكون تعيين هؤلاء لاستكمال المدة الباقية للمجلس علي النحو المبين بالقانون (المصدر: مصراوي)

الكلام ده معناه إيه؟ إن الشعب وافق على الترتيب ده: انتخابات برلمانية وبعدين رئاسية وبعدين دستور جديد. صح ولا لأ؟ بغض النظر عن إن ده مش الترتيب المثالي، أنا باتكلم على الواقع اللي حاصل.

الإعلان الدستوري عمل إيه بقى في المادة 189؟ غيرها!

المادة 60 في الإعلان الدستوري:

(مـــــادة 60 )

يجتمع الأعضاء غير المعينين لأول مجلسى شعب وشورى فى اجتماع مشترك ، بدعوة من المجلس الأعلى للقوات المسلحة ، خلال ستة أشهر من انتخابهم ، لإنتخاب جمعية تأسيسية من مائة عضو ، تتولى إعداد مشروع دستور جديد للبلاد فى موعد غايته ستة أشهر من تاريخ تشكيلها، ويُعرض المشروع ، خلال خمسة عشر يوماً من إعداده ، على الشعب لاستفتائه فى شأنه ، ويعمل بالدستور من تاريخ إعلان موافقة الشعب عليه فى الاستفتاء .

فين رئيس الجمهورية اللي في نص 189 الأصلي؟ وفين وعدهم إن الانتخابات الرئاسية مش هتتأجل ل2012؟ ودلوقتي لما بعض الإخوان يطلعوا يقولوا مش عايزين انتخاب رئيس الجمهورية قبل الدستور يبقى التفاف على إرادة الشعب ولا لأ؟ حجتهم إن الكلام ده التفاف على الإعلان الدستوري، وهو كان مين حط معظم الإعلان الدستوري، الشعب ولا المجلس؟ يبقى يا ريت تقولوا بقى إن انتوا بتدافعوا عن شرعية المجلس العسكري وإعلانه الدستوري الديكتاتوري اللي بيدي صلاحيات مطلقة للمجلس العسكري ماكانتش موجودة في الدستور القديم أصلاً، مش بتدافعوا عن رغبة الشعب.

شوفوا برضو إبراهيم الهضيبي قايل إيه في النقطة دي: برلمانية فرئاسية فدستور.

وبعدين هي الأولوية دلوقتي إن لازم الدستور يتكتب قبل ما ييجي رئيس؟ ولا إننا نشيل الدبابة اللي راكنة فوق صدرنا؟ المادة 9 من الإعلان الدستوري تنص على معاملة المعتقلين بكرامة، أه والله، ومعتقلين مجلس الوزراء طالعين كأنهم مضروبين بقنبلة ذرية وواحد منهم استشهد من التعذيب، يبقى إيه فايدة الإعلان الدستوري طالما المجلس العسكري لا يلتزم بيه؟

وللخروج من مأزق الدستور ده المستشار أشرف البارودي كان اقترح في نوفمبر إضافة التعديلات الدستورية لدستور 71 ثم انتخاب رئيس ثم كتابة دستور جديد، يعني اللي عايز يحل الأزمة هيعرف يحلها، لكن للأسف العسكر والأحزاب لا يهمها سوى مصالحهم، والشارع لسة حاله واقف وبينزف!

ملحمة محمد محمود والتحرير: جنود مجهولين

2011-12-10T02:34:00.006+02:00

لما تتعرض لإرهاب دولة زي اللي اتعرضنا له في التحرير والشوارع المحيطة من 19 نوفمبر ل23، لما كل اللي بتشوفه لمدة خمس أيام نزيف دم لا يتوقف وسيل من المصابين وغازات مميتة، بيغلب عليك مشاعر الغضب والخوف والإرهاق وأحياناً القهر، بس النهاردة وضحت في عقلي صور كنت ناسياها لجنود مجهولين عملوا لفتات رقيقة جداً وسط البطش، ده غير الشهداء والمصابين وأبطال الخطوط الأولى لإن دول مش بس جنود دول أبطال ومفيش كلام هايجيب لهم حقهم.

الممثل هشام عبد الله اللي نزل أول ما عرف إن في اشتباكات، كنا بنحاول نشيل بنت أغمى عليها من الغاز، جه شالها مننا ونقلناها لعربية، وتاني يوم كان بيبتسم وسطنا قبل المجزرة المشتركة من الشرطة والجيش

أول مصاب شفته مضروب بخرطوش في رجله وبيعرج، خرج يريح شوية من الغاز وصمم يرجع للجبهة، قلت له اقعد ارتاح

شوية، مارضيش ورجع وماشفتوش تاني

بنت بتتكلم عربي مكسر ادتني مناديل عشان الغاز كان مبهدلني

واحنا بنجري من الغاز شخص مجهول حط إيده على كتفي عشان ينقذني

لما بدأت أفقد الوعي وقعدت على الأرض لقيت مُخَلِّصين واحد معاه خل شممهولي وبدأت آخد نفسي...والتاني رش وشي بالسائل الأبيض

العجيب اللي اكتشفت بعد كده إنه مضاد للحموضة

والجدعان اللي شالوني لما وقعت تاني بسبب الغاز وقعدوني في كشك شرطة :)

والجندي المجهول اللي نصحني ماجريش وسط الغاز عشان مافقدش الوعي

والبنات اللي نزلت وسط المعركة وجاهزين بالكمامات والخل

بعد اشتداد المعركة يوم 21 و22 و23 نوفمبر

تلال الأدوية اللي وصلت للميدان لحد ما بقينا مجهزين ولا أجدعها مستشفى استثماري، ناس من كل صنف ولون واتجاه جايين يوصلوا أدوية وأكل وبطاطين للمعتصمين والمصابين

فرسان مجاهدين راكبين موتوسيكلات رايحين جايين لساعات طويلة بينقلوا مصابين من الجبهة للمستشفيات الميدانية، ويرجعوا تاني وسط

الغاز والخرطوش يخاطروا بحياتهم عشان ينقذوا ناس مايعرفوهمش

مئات مصفوفين على الجنبين عشان يوسعوا الطريق للإسعاف والموتوسيكلات اللي بتنقل المصابين

وشباب صوتهم اتنبح وجسمهم اتدغدغ وهم بيحاولوا ينظموا طريق الإسعاف

وطبعاً المسعفين والأطباء اللي مفيش كلمات هاتوفيهم حقهم لتضحياتهم وبطولاتهم

معركة محمد محمود

2011-12-07T07:32:00.002+02:00

كانت معركة، بطولة، فدائية، شجاعة مالهاش مثيل، تضحية، تخليص حق.

وكانت من الناحية التانية حرب استنزاف، حرب كيماوية، مجزرة، إرهاب دولة، جرائم حرب، انتقام.

يوم السبت 19 نوفمبر

كلاب سعرانة نزلت تضرب المصابين المكسحين المعتصمين في عز البرد على الرصيف عشان عايزين يتعالجوا ويشتغلوا، الناس اتلمت وكسروا عربية شرطة، كان ممكن ساعتها الشرطة تنسحب ووزير الداخلية يعتذر ويلاقي حل للمصابين، ده لو كان في مسئول بيخاف من الشعب في البلد دي، إنما مفيش، في خلال ساعتين بدأ ضرب الغاز والخرطوش وبدأ عيون الشباب تروح...ذهلت أول ما وصلت من كمية الغاز اللي بتتضرب، وماكانش في بالي غير سؤال واحد، كل ده عشان قلنا لهم قبلها بيوم امشوا في ابريل؟ أمال لو كنا قلنا لهم امشوا حالاً كانوا عملوا إيه؟ الإجابة في الأيام اللي بعدها

يوم الأحد 20 نوفمبر

الاعتصام جميل، نفس روح يناير، ناس بتوزع ساندوتشات وناس بتهتف، إنما في محمد محمود الوضع مختلف تماماً. غاز وخرطوش لا يتوقف وكأننا في غزة بنتعرض لقصف من الاحتلال الصهيوني...كل شوية ذعر والناس تجري وترجع تاني للضرب، وقفت مع بنتين نشمم الخارجين من المعركة خل...الإصابات زادت والمستشفى الميداني مابقتش ملاحقة...على الساعة خمسة فجأة لقيت قنبلة غاز اتضربت على جنينة المجمع وسطنا...وناس بتجري بذعر شديد...الجيش بيهجم. جيش إيه؟ أنا كنت لسة في شارع الشيخ ريحان والقصر العيني وماكانش فيه أي مؤشر إن الجيش هيهجم! بطني كانت مقلوبة من غاز امبارح ومش قادرة أجري...واحد قاللي أرجوكي اجري بسرعة عشان لو مسكوكي هايفرموكي...جرينا ناحية كوبري قصر النيل...وفضلنا نجري نجري نجري، من الذعر أو الخطر الحقيقي مش عارفة، وبنهتف بقلبنا وبكل قوتنا الشعب يريد إسقاط المشير. لما وصلت الدقي اكتشفت إن الميدان كان مليان مصابين وبدأت أبكي عليهم، وأقول للناس زي المخمورة طب أنا عرفتي أجري المصابين عملوا إيه؟ المصابين عملوا إيه؟

يوم الاثنين 21 نوفمبر

المذبحة مستمرة، سيل من المصابين والدماء لا يتوقف. لكن المستشفيات كترت وكمية الأدوية تضاعفت. ناس نزلت مخصوص بعد ما شافت فيديو سحل جثامين الشهداء والبنت اللي بيجروها من شعرها. طلاب مدارس داخلين محمد محمود بالكتب على ضهرهم وبيهزروا عن الاستشهاد. الإعلام بيحاول يظهر كذباً إن المتظاهرين كانوا بيحاولوا يقتحموا وزارة الداخلية وإن الظباط كانوا بيدافعوا عن المبنى. شهادة للتاريخ: الكلام ده كدب وخديعة أقسم بالله ما بعدها خديعة. وزارة الداخلية في شارع الشيخ ريحان مش محمد محمود، وزي ما كتبت أنا كنت موجودة بنفسي يوم الأحد في شارع الشيخ ريحان عند الوزارة وماكانش حد بيحاول يقتحم ولا زفت، كان في 20 30 بني آدم هناك والاشتباكات كانت في محمد محمود بس، وهافترض في موقف تاني إن أشخاص حاولوا يقتحموا الوزارة وهم مش مسلحين، اللي هي بفلوس ضرايبهم، يتقتلوا؟ بأي منطق؟ بمنطق العيسوي والعادلي وزبانيتهم طبعاً. تولع وزارة الجلادين والحرامية...تولع وزارة العادلي وإسماعيل الشاعر ولا تزهق روح شاب واحد...ده النبي قال هدم الكعبة أشد عند الله من إزهاق روح مسلم برئ...روح واحدة مش حوالي 50 في باب اللوق...الكعبة، مش وزارة الداخلية، وانتوا تقولوا كانوا بيحاولوا يقتحموا؟ حسبنا الله.

يوم الثلاثاء 22 نوفمبر

المليونية...العدد كان هايل وكمية مساعدات طبية وإعاشة مهولة وصلت للميدان رغم الضرب والعنف...اللي قلبه ميت بيحارب في جبهة محمد محمود واللي عنده حاجة باقي عليها بيهتف في الميدان أو بيساعد في إسعاف مئات المصابين...موتوسيكلات مابتقفش شايلة مصابين اللي دمهم سايح واللي مغمى عليه من الغاز...وفي باب اللوق الغاز كان بيتضرب ناحية الغرفة التجارية...وزارة الداخلية هناك كمان؟ سبت الميدان متأخر وكنت متطمنة إنهم أكيد، أكيد يعني، مش هيتغابوا ويعملوا حاجة في عدد كبير زي ده، أول ما وصلت البيت عرفت إنهم استخدموا غاز عديم اللون والرائحة تسبب في إغماءات وتشنجات...اللي بيرجع دم واللي جاله ضيق شديد في التنفس...ولحد دلوقتي مش عارفين ده غاز إيه؟ والأدهى والأمر...احنا للدرجة دي حياتنا هانت عليكي يا مصر؟

يوم الأربعاء 23 نوفمبر

الميدان منقسم انقسام عجيب إلى ساحة حرب وساحة لعرض البضائع، الناس كلها حاطة كمامات الغاز عديمة المفعول...رحت ناحية المستشفى الميداني اللي في أول محمد محمود عشان أشوف الوضع إيه...في الحروب المفروض المستشفى يبقى مكان آمن من البطش، لكن مش في حرب المجلس العسكري. أول ما وصلت لقيت قنبلة غاز اتضربت قريب جداً في الجامعة الأمريكية على بعد أمتار قليلة من المستشفى...كان في واحد دايخ حاولت أفوقه لحد ما الغاز وصل لي، مئات بيحاولوا يبعدوا وبيحاولوا ينشلوا نفسهم من الموت...اللي شم الغاز هيعرف قصدي...غاز مفزع وبيديك إحساس إن روحك بتطلع...صعبت عليا نفسي، رغم إن أقصى حاجة حصلت لي الأذية من الغاز...امال أم الشهيد تعمل إيه؟

المجلس العسكري: أنتم سفاحين...ونهايتكم أكيدة وعند ربنا أسوأ ما تكون، ألا لعنة الله على الظالمين

الأحزاب المشتركة في المجلس الاستشاري المدني: اتفو عليكوا، يا رب تولعوا بالبرلمان اللي فرحانين بيه

أحزاب العار اللي باعت الثورة

2011-11-29T22:43:00.003+02:00

هاكتب إن شاء الله عن مجزرة محمد محمود والتحرير بالتفاصيل، وفي نفس الوقت لازم نفتكر أحزاب العار اللي باعت الثورة والثوار ووقفت ضد الموجة الثانية من الثورة وراحت تتحالف مع العسكر تحت مسمى مجلس استشاري مدني بعد ساعات قليلة من المجزرة - أي بتنجان في مقابل ضمان الرضا من السلطان.

1) *حزب الحرية والعدالة

2) *حزب الوفد

3) حزب الوسط

4) *حزب النور

5) *الحزب المصري الديمقراطي الاجتماعي

6) *حزب المصريين الأحرار

*نفس الأحزاب اللي مضت على بيان سامي عنان الكارثي اللي كان صك الولاء للمجلس وموافقين على قانون الطوارئ والمحاكمات العسكرية للمدنيين بالإضافة للأحزاب دي:

7) حزب الجبهة

8) حزب الإصلاح والتنمية

9) حزب مصر الحديثة

10) حزب الكرامة

11) الحزب العربي الديمقراطي الناصري

12) حزب الغد

13) حزب العدل (مصطفى النجار وقع على البيان وسحبه بعد اعتراض أعضائه)

14) الحزب العربي للعدل والمساواة

الحامي ربنا يا شعب

2011-11-13T16:44:00.002+02:00

متفهمة جداً تخوف المصريين من البلطجة وعدم استجابة النيلة الداخلية في كتير من أحداث السرقة، ومتفهمة إن ممكن جزء منهم يبقى خايف جداً على حياته وحياة أولاده لدرجة يلوم المظاهرات بدل ما يلوم القائمين على شئون البلاد، متفهمة بس مش موافقة، اللي عايز يحمي أو يوقف بلطجة يتفضل، احنا مش ماسكينهم من رجليهم، بس من غير ما يكهربهم ولا يدخل جوه أجسامهم حاجات غير الأكل والشرب لو سمحتوا.

الأمن من أهم احتياجات أي انسان بعد الأكل والشرب والسكن، ده طبيعي، اللي مش طبيعي هو توقع الأمن من نفس الأشخاص اللي بيعتدوا

على آمنين، توقع الأمن من الأشخاص اللي اقتحموا قناة 25 واعتدوا على أحد العاملين فيها لمجرد إنه مسيحي، توقع الأمن من اللي لا مؤاخذة بعبص البنات وهتك عرضهم تحت مسمى كشوف العذرية، توقع الأمن من اللي دهس المتظاهرين كأنهم نمل، سواء عن قصد، أو بسبب ارتباك، لو جنود الجيش اللي المفروض مدربين على ضبط النفس مرتبكين امال باقي الشعب يعمل إيه؟

اللي مش طبيعي توقع الأمن من نفس القيادات اللي دهست المتظاهرين وضربتهم في مقتل بشتى أنواع الأعيرة النارية، توقع الأمن من قيادة لحد دلوقتي، وبعد الثورة بشهور، ماتعرفش غير العصايا، ماعندهمش أي حلول سياسية، مش بيعرفوا يحلوا أي مشكلة صغيرة كانت أو كبيرة غير بالعصايا، ومش مهم العصايا دي تضرب مين أو تقتل مين، المهم إن القائمين على شئون البلاد مايعرفوش حل غيرها، والأزمة إن الحل مش العصايا، الحل خطوات سريعة وحاسمة تحتوي غضب الناس، ده لو انتوا عندكوا ذرة شجاعة أو خوف على البلد.

عشان كده بستغرب جداً اللي ينادي إن الجيش يفضل مستمر في الحكم في المرحلة الانتقالية، على أساس إن اللي ماسك دلوقتي جوز خالتي، ومحتاس وكده. في حد عنده شك إن لو كان المجلس نواياه طيبة ماكانش هيعرف يظبط الأمن ويأمر الشرطة بالقيام بدورها بعد ما يفصل العناصر الفاسدة اللي فيها، في خلال أسبوعين تلاتة بالكتير؟ حد عنده شك إن البلطجية معروفين بالاسم، وإنهم طالقينهم علينا عقاباً لينا عشان الناس تفضل خايفة وتأيد الحكم العسكري على أساس إنهم اللي هيحميهم؟ أقسم بالله اللي ماسك الحكم دلوقتي العسكر فعلاً مش جوز خالتي، ولو كان عايز يظبط الأمن في خلال أسبوعين تلاتة كان ظبط، ولو كان نيتهم سليمة كانوا سابوا السياسة لبتوع السياسة مش بتوع السلاح وادوا صلاحيات كاملة لحكومة انتقالية حركة شوية وبتعرف تتصرف في الأزمات، لكن لا حياة لمن تنادي.

مش عايزة حد يقول جملة لازم الجيش يحكم عشان يظبط البلد ويحمينا تاني، الحامي ربنا، واللي ضرب المتظاهرين بالنار واعتدى جنسياً على المعتقلين والمعتقلات مستحيل يكون مصدر أمن وأمان، وبعد ربنا شرطة مدنية تكون عقليتها فعلاً حماية الناس من الخارجين على القانون، مش التظبيط معاهم عشان يوزعوا قيمة المسروقات بينهم وبين بعض. الحامي ربنا فاتكلوا على الله وارفضوا الحكم العسكري الظالم الفاشل سياسياً واقتصادياً بطبيعة الحال.

خلاصة الكلام

2011-11-07T02:24:00.001+02:00

مصر مافيهاش مسلم ومسيحي

مصر مافيهاش راجل وست

مصر مافيهاش إسلامي وليبرالي

مصر فيها ظالم ومظلوم

انتهى

عاطف يحيى الشهيد المنسي

2011-11-02T19:31:00.004+02:00

تحديث: مقال نجلاء بدير: عاطف

-----------

تسع شهور بعد الثورة حياتنا بتنتهي بدل ما تتولد. عاطف يحيى اتضرب بالرصاص في راسه

قدام سفارة إسرائيل في ذكرى النكبة، اليوم اللي زينة شباب مصر اتذل ونزل على ركبه واتشتم بالأم. من مين؟ من ظباط الجيش المصري. من ساعتها وهو بيعاني في المستشفى والحالة ميئوس منها، وكلنا نسيناه، كلنا انشغلنا بتغييرات وزارية وهمية وصراعات فكرية سخيفة وانتخابات أسخف منها، وانشغلنا بالشهيدة هدى الطهطاوي والشهيد محمود قطب والشهيد أحمد رمضان اللي دفناهم بعد إصابته وبعد ما الثورة "نجحت" وبدئنا "نشتغل عشان نبني مصر".

انشغلنا بالمحاكمات العسكرية للمدنيين والثوار وبعصام عطا اللي مات من التعذيب في سجن طرة، أصبحت المشاوير للزنازين والنيابات والمشرحة والمدافن هي الشغلانة الأساسية، والضحايا مش الجلادين، الضحايا عاطف يحيى.

ونسينا عاطف يحيى. دمه راح ما بين ثوار بيحاولوا ينقذوا الثورة بدمهم وحياتهم ومشغولين في 100 قضية، وناس بتجري ورا لقمة العيش، وعسكر ونخبة مايهمهمش غير مصالحهم وبيدوسوا على مصالح 80 مليون في الطريق، وشريحة فاشية موافقة على ضرب المتظاهرين بالنار، وفي نفس الوقت بيقولوا على اقتحام سفارة الأنجاس فعل صبياني وهمجي.

أيام سودا اللي الناس العادية والغلابة يلعنوا فيها الثورة، عشان لا عرفت تجيب لهم حقهم ولا افتكرتهم لما ماتوا، عاطف يحيى مات وماحدش خد باله إلا اللي كانوا معاه في اليوم المشئوم اللي الجيش والشرطة انتقموا فيه مننا، وتعتيم إعلامي وصحفي قذر على خبر استشهاده. عاطف يحيى استشهد لكن أنا مش هانساه ولا أنسى ال1000 شهيد وبما إني عايشة ذنبهم حيفضل في رقبتي ليوم الدين.

قل اغتصاب ولا تقل اختبار عذرية

2011-10-24T15:36:00.006+02:00

يعلم ربنا الحالة اللي فيها دلوقتي من ساعة ما قريت تفاصيل أكتر عن اللي حصل للمعتقلات في 9 مارس، وقد إيه ضاغطة على نفسي عشان ماشتمش وألعن سلسفين السجن الحربي واللي شغالين فيه والمسئولين عنه، لو اعتبرنا إن الانتهاكات بتحصل هناك بس.

ظابط جيش اغتصب المعتقلات، أيوة اغتصاب، كشوف عذرية ده الاسم الجميل كده اللي اتقال واتنشر في الجرايد عشان يطعن في شرفهم ويفقد تعاطف الرأي العام معاهم، لكن اللي حصل اسمه اغتصاب، وواحدة من الضحايا قايلة إنها مش عارفة إذا كانت لسة عذراء ولا لأ لإن الظابط حط إيده جواه لمدة خمس دقايق! يعني اغتصاب يا أفندية، حتى لو افترضنا إنه مافضش بكارتها، تعذيب واحدة بالكهربا وإجبارها على الإجراء الحقير ده حتى لو من غير فض البكارة يبقى اغتصاب. والأدهى والأمر هو اعتراف أحد قيادات الجيش بذلك، وقال هما ماكانوش عذراوات واحنا عملنا كده عشان ماحدش منهم يدعي إنها تم اغتصابها على إيد ظابط في السجن الحربي!

حد فاهم حاجة؟ يعني إنت بتعترف إنك اغتصبت واحدة عشان ماتخرجش بعد كده تقول إنك اغتصبتها؟

مين اللي بيخرب البلد؟ مين اللي بيشوه صورة الجيش؟ مين اللي بيقود الثورة المضادة عن طريق تشويه صورة المعتصمات في العلن واغتصابهن في الخفا؟ على أي أساس المجلس العسكري بيدعي إنه تم إصدار حكم إعدام على واحد اغتصب واحدة في السويس وفي نفس الوقت جنوده وظباطه يغتصبون وينتهكون الأعراض، سواء كان الضحايا ستات أو رجالة!!!!

منتهى الحقارة والجرم اللي حصل للمعتقلات، ومنتهى الخزي والعار التغطية عليه أو محاولة تشويه صورة الضحايا أو تكذيبهن لمجرد إننا معتقدين إن الجيش كله أبطال، ومنتهى الغباء هو انتظار العدالة من اللي بيرتكب الاغتصاب وبيشوه الثورة ومنتظرين منهم انتخابات نزيهة وتسليم السلطة للمدنيين بسهولة، منتهى الإجرام انتهاك حرمات السيدات وسفك دماء المسيحيين على أساس إنهم الحيطة المايلة في البلد دي، نبقى بلد مافيهاش رجالة لو سكتنا للعسكر، إياك تبص في المراية وتقول أنا راجل لو سكتت على الانتهاكات لأي شخص كان، وأنا مش منتظرة عدالة من حد ولا إن الناس تتحرك، ربنا يصبر الضحايا ويأخذ الظالمين أخذ عزيز مقتدر قريب جداً إن شاء الله.

الشرطة انهارت يوم 28 يناير

2011-10-23T06:06:00.005+02:00

كلمتان خادعتان أعضاء المجلس العسكري لا يكلوا ولا يملوا من ترديدها كلما وجدوا أنفسهم أمام شاشات التلفاز يخاطبون هذا الشعب العظيم. الشرطة انهارت يوم 28 يناير.

هاتان الكلمتان ليستا خادعتان فحسب، بل هو تزييف صريح للتاريخ، وأفهم محاولة أي شخص إنه يزيف حدث مرت عليه عشرات السنين ولم يتبق منه صور أو فيديوهات أو اختراع اسمه يوتيوب، لكن وصلت بهم الجرأة أن يزيفوا حدث لا يزال الخرطوش الذي ضرب فيه موجود في أجسام المصابين حتى الآن.

ما معنى انهيار الشرطة؟ أنا أفهم أن تنهار الشرطة إذا فقدت الآلاف من أعضائها، أو إذا دمرت جميع مقارها بالكامل، خصوصاً المقر الأم في لاظوغلي. تنهار الشرطة إذا انهار اقتصاد الدولة وعجزت عن صرف مرتبات أفرادها فكانت النتيجة تمرد واسع في صفوفهم، وليس مضاعفة رواتبهم واستيراد قنابل غاز جديدة لانك استخدمت في التاسع والعشرين من يونية والثالث والعشرين من يوليو في العباسية و9 سبتمبر و9 أكتوبر والبقية تأتي.

هذا هو مفهوم انهيار الشرطة بالنسبة لي، وإذا كان لديك عزيزي المضروب على قفاه مفهوم آخر رجاء مناقشتي فيه، أما بالنسبة للحقيقة التي لا نعرف منها حتى الآن سوى القشور، هو أن هناك ألف قتيل تقريباً من المدنيين، و10 آلاف مصاب مدني، منهم من فقد عينه بسبب خرطوش غادر، ومنهم أطفال قتلوا على يد شرطتنا قبل أن تنهار، منهم بلال سالم عيسى في رفح ومحمد إيهاب النجار في الغربية وهدير عادل سليمان في القاهرة على سبيل المثال لا الحصر. هل انهارت الشرطة بعد أن نفذت ذخيرتها في أجساد وعيون الأطفال والشباب العزل وكل جريرتهم هي المطالبة بحياة كريمة؟ هل انهارت الشرطة بعد أن دهست العشرات من المتظاهرين بشكل متعمد وأخفت جثث البعض لتعبث بالأدلة؟ هل انهارت الشرطة بعد أن احترقت الأقسام في خطوة رمزية لإسقاط القهر وهي الحرائق التي لم تخلف شهيداً واحداً من أبناء الشرطة حسب علمي، بل إن الظباط ال26 الذين قتلوا في الثورة، رحمهم الله، قتلوا في أعمال بلطجة أو سرقة وليس مظاهرات، ومنهم من قتل لرفضه تهريب المساجين مثل اللواء البطران.

بعد هذه الأرقام والحقائق والصور المفزعة التي شاهدناها عن قتل المتظاهرين بدم بارد على أي أساس يتحدث أعضاء المجلس الأعلى للقوات المسلحة عن "انهيار" الشرطة؟ هل انهاروا حزناً بعد نفاذ ذخيرتهم في أجساد الثوار وعدم تمكنهم من قنص المزيد من الشرفاء؟ على أي أساس يتحدثون وكأن 25 يناير كان نكسة لجهاز الشرطة وتؤمن منى الشاذلي على كلامهم في استسلام غريب وعجيب، دون أن يحاسبوا من تسول له نفسه على قتل نفس بغير نفس، ومن يعترض من زملائه على المحاسبة ويرفض العمل فليخرج من جهاز الشرطة غير مأسوف عليه وفلنأت بمجموعة من ال9 مليون عاطل ندربهم ونجندهم للدفاع عن هذا الوطن بدلاً من إذلال أهله وتزوير انتخاباتهم وابتزازهم وتعذيبهم وهتك عرضهم وقتلهم!

الله وشرفاء الوطن والصور شاهدة على مجازر الشرطة تجاه هذا الشعب العظيم، ولن ينجح عشرون مجلس عسكري في تزييف التاريخ، ألا لعنة الله على الظالمين.

إسلمي يا مصر إنني الفدا

2011-10-21T02:58:00.000+02:00

قاطعوا منتجات شركة راميدا للأدوية

2011-10-19T13:24:00.001+02:00

نقلاً عن الاتحاد المصري للنقابات المستقلة

قاطعوا منتجات شركة راميدا للادوية

من يميت العمال جوعا لا يمكن أن يشفي أحدا

إلى كل الضمائر الحية في مصر والعالم وخاصة أولئك المتعاملين في قطاع الأدوية ، تجارة أو وصفاأو نقلا إليكم ما فعله مجرمو شركة راميدا للأدوية بعمالها .

قامت شركة راميدا للأدوية بالاعتداء على حقوق العمال فور قيامهم بإنشاء نقابتهم المستقلة , ورغم لقاءات واجتماعات المفاوضة بل وعقد اتفاقيات التفاوض لإنهاء الأزمة بحضور وزير القوى العاملةن إلا أن ممثلو الشركة ( مثل الشركة في التفاوض مدير الشئون الإدارية بها وهو في الأصل أمين شرطة ) كذبوا والتفوا على الاتفاق وتنكروا له ، بل وازداد تعسف الشركة ضد العمال حيث :

1- امتنعوا عن عودة العمال المفصولين تعسفيا

2- قاموا بحرمان مجلس إدارة النقابة من الحوافز والتهديد بحرمانهم من الترقيات في سعيهم لإجبار العمال على حل النقابة

3- قاموا بتهديد كل أعضاء النقابة بحرمانهم من الحوافز

4- مارسوا الضغط على العاملات باشتراط ترك النقابة لاستمرار إحضار أطفالهم للحضانة الملحقة بالشركة

5- تهديدكل من يحضر اجتماعا أو يلتقي بأحد أعضاء مجلس الإدارة بالفصل ( الشركة بها كاميرات للمراقبة )

6- وصل الأمر لاستخدام أساليب رخيصة (كالتحرش) لإزلال العاملات

ومن المعروف أن مالك الشركة (أيمن عباس )هو أحد ابناء رجال الأعمال الهاربين في ركاب المجرم الخائن حسين سالم وهو ما يؤكد أن الفساد والإجرام لا يتجزءان وأن من يقوم بالإجرام في حق وطن كامل لن يتوقف أبداء عن انتهاك حقوق العاملين والعاملات ، وايضا من لا يلتزم باتفاقية وقعها مع عماله الذين يقابلهم يوميا , هل يلتزم بتعاقدات أومواصفات لمنتج تعاقد عليه ؟ وهو ما يطرح تساؤلات كثيرة حول جودة منتجات الشركة(كولونا،الكون،راميتكس،ميجا فايل………..) وما يجعلنا نطالب بوقف التعامل معها ومقاطعة منتجاتها لحين وقف التعسف ضد العمال وتنفيذ اتفاقية المفاوضة التي وقعت عليها الشركة .

العثور على أحد المفقودين في السجن الحربي

2011-10-19T03:42:00.002+02:00

من ساعة الثورة مصر فيها أكتر من ألف مفقود، في ألف أسرة مش عارفة عيالها فين، وماحدش بيدور عليهم غير بعض النشطاء مشكورين، والنهاردة الناشط محمد مرعي نشر إن الراجل اللي في الفيديو لقى ابنه في السجن الحربي! ابنه اللي عند تسع عشر سنين، حابسينه في السجن الحربي بقى لهم شهور ومش مكلفين خاطرهم يتصلوا بأهله يقولوا لهم ابنكوا عندنا، عمل إيه؟ طفل عنده عشر سنين عمل إيه في دنيته عشان يفضل محبوس طول الشهور دي لحد ما أبوه بقى هايولع في نفسه من حزنه عليه؟

نفسي أفكر المجلس العسكري والمسئولين عن السجن الحربي بالمقولة دي: من الغباء تكرار نفس العمل وانتظار نتيجة مختلفة!

مش فاهمة البطش اللي شغال والاعتقالات اللي على ودنه والتنكيل بالشعب مستمر ليه، يعني هل المجلس متوقع إننا هانتهد ونخاف؟ كنا خفنا من أمن الدولة، متوقع إن الثورة هتموت؟ وافرض ماتت، البطش مالهوش غير نتيجة واحدة وهي ثورة تانية، ماحدش عارف حتيجي امتى لكن بتصرفات المجلس والشرطة العسكرية الموضوع متوقع جداً. سيبكم من الشعب أنا نفسي أخش جوه مخ أي حد من المسئولين عن مهازل السجن الحربي والمحاكمات العسكرية والشرطة المدنية والعسكرية وأعرف هم بيفكروا إزاي؟ إزاي مستمرين على نفس سياسة مبارك ومتوقعين نتيجة غير ثورة تانية؟

The Maspero Massacre; it won't be the last

2011-10-13T07:42:00.004+02:00

Before the 9th of October some Egyptians were looking forward to a smooth transition of power to civilians through elections, social networking sites were abuzz with debates about the parliamentary elections scheduled to start next month and the shameful statement signed by some party leaders pledging allegiance to the military junta in return for amendments in the elections law to assure they win ample chairs in the parliament, trampling upon the right of millions of Egyptians not to face military tribunals or emergency law in the process.

But the regime had other plans.

On the 30th of September, a mob of thousands headed to burn down the Marynab Church in Aswan, incited by a police officer as local newspaper Al-Shorouk has published and a Sheikh as the governor says. What with Aswan's governor stating that it is not a church and that Christians built a dome contrary to the law, and what with the army violently dispersing a peaceful protest by Christians at Maspero on the 5th of October using batons and tasers, the situation worsened.

Christians decided to organise another march on this Bloody Sunday from Shubra to Maspero to call for the Aswan Governor to step down, and for the Church to be rebuilt and for the state to just take heed that they are Egyptians with supposedly full rights to worship without being threatened or persecuted; it was the third church to be burnt down or demolished by after the Senior Council of Armed Forces took over, and the fourth attack this year.

Numbers were unexpectedly huge, eyewitnesses estimate them to be twenty thousand at least, men and women, children and grandparents, chanting for Christians rights and after briefly being attacked by stones, against Tantawi.

As soon as the march reached Maspero all hell broke loose. Eye witness Lobna Darwish has testified on her Facebook account that the police and army stationed at Maspero just started firing in the air then at people as soon as the march arrived. A video footage apparently recorded a few minutes later showed angry protesters attacking an empty military bus while others are trying to stop them. Out of the blue, APCs started driving at an insane speed among protesters, with the soldiers aiming their fire directly at protesters and the vehicles deliberately mowed them down, in a scene Egyptians had thought they would never witness again since January 28th, especially not at the hands of the army that has prided itself in claiming to 'protect' the revolution.

The nightmarish scene was fuelled when the Egyptian State TV underneath which the massacre was taking place only alarmed viewers that armed Christian protesters were killing our great Egyptian army, with three soldiers killed and 200 wounded, and that it was our duty to protect the army against this "sect"! Of course, some gullible Egyptians actually responded to the call and rushed to the streets armed with sticks and swords, preparing to protect the army. Some of them, finding that the Christians were unarmed, actually joined the protests and started chanting "Muslim, Christian, one hand".

The scene continued being chaotic and people did not know who was the 'enemy', even those who were caught in the mayhem, until reporters and activists took horrifying pictures of the bodies and circulated them via Twitter. Some had been shot several times, some had been crushed beneath the APC with their brains leaking out of their skulls, one had half of his head missing.

Indeed, the pictures and the videos of the massacre do not lie, no matter how much neutral anyone tries to be; the truth is the Egyptian army committed a massacre against protesters, whether violent or not. Not only that, but its media machine could have pretty much instigated a civil war on that day. At least one person was killed using a sword and videos are surfacing on Muslims randomly attacking Christians. The SCAF unfortunately relied on sectarianism and the air of frustration towards the revolution to cover up their massacre and come up with lame and ridiculous excuses to how their soldiers behaved. It did not expect public outrage, since most of the victims were among the religious minority, and that the nature of the massacre is unclear to many, so many Muslims would rather not join Christian protests in fear of fitna. Thus the statements by SCAF were ridiculous, ranging from claiming the APCs were stolen, or that the army was not actually armed, or that mowing down protesters was not a principle in the Egyptian amry's doctrine and that the soldier was perplexed!

We are thus witnessing a dangerous and very ugly turn of events in Egypt. I just do not want to look down that way. I am afraid that after this massacre, it will be even more difficult for SCAF to leave power willingly, fearing possible legal persecution. On the other hand, it is impossible for Egypt to keep being governed by those Mubarak's generals who have changed nothing in the political or economic conditions in Egypt after the revolution. In fact no one should expect them to, since they are the cornerstone of the regime of corruption. The people will not stop protesting, they haven't for more than ten years, not even after the massacres committed by the Egyptian police on the 28th and 29th of January; the number of protesters doubled later. If SCAF does not leave power as soon as possible, there will be more massacres to come, but in fact they will only be digging their own graves.

مجزرة ماسبيرو والصامتين عليها

2011-10-11T23:44:00.004+02:00

25 شهيد، نتيجة لاستقتال المجلس العسكري للبقاء في السلطة، نتيجة لاستمرار الوضع الشاذ في تواجد عساكر وظباط مسلحين بكثافة وسط مدنيين ثائرين لأسباب مختلفة على مدى شهور طويلة، نتيجة للجهل التام بأبسط قواعد العمل السياسي اللي العسكر بطبيعتهم مش عارفينه.

وأوسخ ما في الصورة، شوية الحيوانات اللي بيبرروا مجزرة الجيش، بحجة إن المظاهرات زادت بقى ولازم يبقى في موقف "حاسم"، أو إنهم مسيحيين فدي شئون داخلية مانتدخلش فيها.

اللي حصل إن الجيش قتل متظاهرين، في مسيرة ضخمة فيها أطفال وسيدات وعواجيز عزل من السلاح، وشهود العيان* زي لبنى درويش بيقولوا إن الأمن المركزي وبعديه الجيش بدأ بضرب النار أول ما المسيرة وصلت بدون سبب واضح، وهافترض معاكوا أسوأ الفروض إن في حد من المسيرة ضرب الجيش، ليه مايقبضوش عليه أو يفضلوا محتمين داخل المدرعة، هل رد الفعل الطبيعي إنك تضرب نار على عزل من السلاح ومدرعتين تجري وسطهم بطريقة جنونية وتلف وتدهس الناس!

ومش أول مرة، خلونا نفتح الملف الإسود للمجلس العسكري والجيش من الأول بقى، في حالات القتل غير هتك العرض والتعذيب بالكهرباء والضرب والكرباج، علي ماهر اللي اتقتل يوم 9 إبريل بعد ما الجيش فض الاعتصام في التحرير ومنشية ناصر اللي اتقتل فيها 13 واحد وال3 شهداء اللي سقطوا قدام السفارة الإسرائيلية ومديرية الأمن يوم 9 سبتمبر مش عارفين شرطة ولا جيش، لحد ما وصلنا لليوم الإسود اللي جريمة الجيش فيه اتوثقت أهي صوت وصورة، ومبقاش في مجال للإنكار أو النفي.

وبنفس القدر من القذارة، اكتشفنا بعد المجزرة بيومين إن مش كل القتلى مسيحيين ولا حاجة، في مسلمين ماتوا والإعلام مش جايب سيرتهم طبعاً عشان يعزل المسيحيين ويضرب الناس في بعض، ده غير دور التلفزيون المصري القذر في تأجيج الفتنة ضد المتظاهرين بشكل عام، خصوصاً إنهم مسيحيين.

بالنسبة لقتلى القوات المسلحة اللي التلفزيون أعلن عنهم بتوجيهات من المجلس العسكري، الأول قالوا 3، طب اسمائهم إيه؟ قالوا لنا مانقدرش نقول حفاظاً على معنويات الجنود. طب سؤال، إنت دلوقتي عرفت الجنود بتوعك إن زملائهم ماتوا، فكد كده معنوياتهم اتأثرت، هاتفرق إيه إنك تعلن أسمائهم أو عددهم؟ ما هم كده كده عارفين إن زملائهم ماتوا! هاتفرق إيه! ومن شوية فريد حشيش من الطب الشرعي صرح على أون تي في إن في عسكري استشهد فعلاً، اتقتل بالرصاص وجثمانه فيه فتحات خروج يعني الرصاص مش موجود، زي مين؟ زي المتظاهرين المسيحيين اللي اتقتلوا برضو، جثامينهم فيها فتحات خروج والرصاص مش موجود. وعنده أخبار تانية مش عايز يقولها حفاظاً على الأمن العام لحد ما يتأكد.

المجلس العسكري إذن وقيادات الجيش بدءوا مرحلة جديدة في التعامل مع المتظاهرين، الضرب بالنار والدهس كأنهم حشرات، على أساس إن الناس هاتسكت عشان الاستقرار والجيش آخر عامود في البلد والكلام الفارغ ده، احنا دخلنا مرحلة المجازر، واللي مش شايف إن دي مجزرة وهايسكت عليها الدور بكرة هييجي عليه أو على حد يعرفه، وساعتها ماتلوموش غير نفسكوا، لكن أنا مش هاسكت، لا على استضعاف المسيحيين ولا استضعاف المتظاهرين ولا أي شخص.

بسم الله الرحمن الرحيم

إن فرعون علا في الأرض وجعل أهلها شيعا يستضعف طائفة منهم يذبح ابناءهم ويستحيي نساءهم إنه كان من المفسدين

صدق الله العظيم

مجموعة شهادات على مجزرة ماسبيرو *

مجزرة ماسبيرو - شاهدة عيان 4

2011-10-10T02:08:00.004+02:00

عديت 16 جثة بنفسي، البعض منهم مات بالرصاص والباقي اتدهسوا وبيقولوا إن في جثث تانية برة (المستشفى)

قسيس ماسك كيس فيه مخ واحد من الشهداء، رأس (الجثة) هابطة وفاضية، القسيس بيقول إن مدرعة دهسته

مجزرة ماسبيرو - شاهدة عيان 3

2011-10-10T01:48:00.010+02:00

مسيرة ضخمة في شبرا

احنا اتحبسنا تحت الكوبري والطوب بيتحدف علينا

أنا واقفة على كوبري 6 أكتوبر وشفت حوالي 15 شخص بيتدهسوا

ولد وراني أجزاء من جمجمة ومخ في تي شيرت

شفت على الأقل 12 جثة في مشرحة (المستشفى القبطي) وفي 3 تانيين في التلاجة

مشاهد مفزعة في المستشفى، الستات بيصوتوا والرجالة بيعيطوا ومتظاهر بيقول "الجيش دهسنا كأننا حيوانات"

مدرعات الجيش دهست عمد المتظاهرين، وضربتهم بالنار بشكل عشوائي، هو ده اللي حصل

أيوة في طائفية لكن إيه علاقة ده بإيه بجيش بيقتل شعبه

مجزرة ماسبيرو - شاهدة عيان 2

2011-10-10T01:03:00.007+02:00

ناس كتير اتضربت بالرصاص قدامي

أنا كويسة، شفت ناس بتتدهس وتتضرب بالنار، وشفت واحدة محجبة مسنة بتضرب بعصيان الشرطة العسكرية

مفيش متظاهرين بدئوا حاجة، كنا لسة هانحتفل بقدوم المسيرة ولقينا الطوب بيتحدف

باكرر تاني أنا كنت في ماسبيرو لما المصادمات بدأت، ماكانوش متظاهرينـ ماعرفش مين بس الجيش ضربنا

مجزرة ماسبيرو - شاهدة عيان 1

2011-10-10T00:39:00.008+02:00

يا مجلس يا عسكري اتق غضب الشعب

2011-10-09T03:36:00.003+02:00

مش هاقوللكوا اتقوا غضب ربنا لإن واضح إنكوا ماتعرفوش ربنا، وفاكرين إن الممارسات القمعية والأساليب الملتوية هتضمنلكوا الاستمرار في الحكم و/أو عدم المحاسبة، برضو هاقوللكوا كان غيركم أشطر، إنتوا ماشفتوش فيديوهات الثورة يا بعدا؟ ماشفتوش الناس وهي رايحة تقف قدام المدرعات وتنط عليها وتوقفها، ده الأمن المركزي حضراتكم اللي أعداده أكبر من الشرطة العسكرية، أخد اللي فيه النصيب لما الناس جابت آخرها، وكان زعلهم وحش.

اتقوا غضب الشعب، المصريين صابريييين صابريييين صابرييييين زيك كده يا طنطاوي بس آخر زعلهم وحش، وبيبقوا متهورين وانتحاريين ولو عسكري ضرب النار علينا (تاني) الجيش اللي انتوا خايفين عليه يتفكك ده هايتفكك فعلاً والبلد هاتروح في ستين داهية، سواء بسبب كده أو بسبب ال6 شهور اللي الاحتياطي النقدي فيهم هايخلص زي ما بيقولوا، هم طبعاً بيقولوا كده عشان نبطل إضرابات ومظاهرات ونخاف، بس إفرض حصل يعني، الناس حتخاف؟ الجعان حيخاف من إيه ما هو كده كده ميت، بس هيقوللك أنزل المظاهرات يا قاتل يا مقتول بدل ما أموت من الجوع في بيتنا!

اتق غضب الشعب يا مجلس

فصبر جميل #SCAF

2011-10-08T03:08:00.003+02:00

قاللك احنا صابرييييين صابريييييييين صابرييييييين هههههههه كان غيرك أشطر، صابرين على إيه يا مجلس؟ إنتوا فقرا؟ مرتبكوا 700 جنيه في الشهر؟ مش لاقيين علاج لعيالكوا؟ عيالكوا اتقتلوا ومش عارفين تجيبوا حقهم؟ خايفين من قانون الطوارئ والمحاكمات العسكرية؟ صابرين على إيه بالظبط عايزة أفهم؟

ما علينا...أنا مش عارفة إيه بالظبط اللي المفروض يتعمل دلوقتي عشان نكمل الثورة، أول مرة أبقى محتاسة كده، بس هو عامةً الشعب المصري بقى له 8 شهور بيفاجئني مفاجآت سعيدة، وربنا ماخيبش ظني، فإن شاء الله ليها حل، إن شاء الله ربنا مش هيسيبنا بعد البهدلة والذل والغدر اللي شفناه، إن الله لا يضيع أجر من أحسن عملا، أنا لولا إيماني بربنا كان زماني اتجننت من اللي بيحصل دلوقتي في البلد، بس أنا مؤمنة وعلى يقين تام إن طول ما احنا شغالين عشان البلد ربنا مش هيخيب ظننا وهينصرنا، احنا عارفين إن المعركة طويلة، صحيح أنا ماكنتش متخيلة بقصر نظري إن المعركة هتبقى مع العسكر، بس إن شاء الله أمرهم سهل، اللي غلب الأمن المركزي في يوم يقدر يغلب الشرطة العسكرية الله ينتقم منهم.

نشتغل ونصبر، أنا شخصياً هاشتغل بإني أفضح انتهاكات العسكر على مدونتي وده دورنا كلنا، لحد ما ربنا يورينا فيهم آية من آياته زي ما ورانا في مبارك وجزء من عصابته كده، فصبر جميل والله المستعان على ما تصفون.

قاطعوا الأحزاب الانتهازية

2011-10-02T21:39:00.002+02:00

من ساعة ما قريت البيان الكارثي اللي مضى عليه 13 رئيس حزب من غير ما حد من المجلس العسكري نفسه يمضي عليه وأنا هاطق من الغيظ وحاسة إني لو نمت مش هاصحى، أينعم أنا عارفة إن السياسة لعبة قذرة بطبيعتها بس هو احنا في وقت سياسة دلوقتي؟ هو خلاص كده مطالب الثورة اتحققت أو في طريقها للتحقيق فيلا بقى نروح ننافس على مقاعد البرلمان ونبيع الشعب عشان نلحق كراسي؟ ياخي اياكش تولع الكراسي بيكوا يا انتهازيين، بتأيدوا المجلس العسكري تأييد تام وبتقدروا دوره في حماية الثورة؟ حماية الثورة في اعتقال المتظاهرين وسحلهم وتشويه صورتهم وكهربتهم وهتك عرضهم؟

ويطلع واحد من الموقعين مصطفى النجار (بعد ما سحب التوقيع) يقوللك أنا شفت مصلحة الوطن في البيان: أه طبعاً ما أنت ماحدش حياخدك تحري أو يلف بيك في الميكروباص يضيع عليك أجرة يوم ويروحك البيت من غير عشا للعيال أو يحط عصايا في المكان اللي إنت عارفه أو يلبسك خمس سنين سجن في محكمة عسكرية عشان شاركت في الثورة، إنت راجل ابن ناس وبتطلع في التلفزيون ومش مهم الشعب ابن الكلب ده اللي هيلبس حكم عسكري سنة ونص كمان وإنتوا سبب من الأسباب.

اتفو

اتفو على أي حد في البلد يفضل مصلحته الشخصية اللي هتودي مصلحة البلد في ستين داهية، اتفو على أي حد بيساهم في تمديد الحكم العسكري الظالم غير الشرعي واحنا عيالنا كل يوم يتحبسوا ومش عارفين نلاحق عليهم، اتفو على أي حد وافق على تمديد قانون الطوارئ في مقابل مكاسب سياسية ضئيلة.

وأرجع أسأل هو مفيش حد بيسأل في أم الشعب ده ليه؟ الأحزاب الأشاوس دي ماخدتش بالها إن البيان ده بيفتتها أساساً عشان مش كل الأعضاء هيوافقوا عليه؟ بجد يعني إيه الدنائة والحقارة دي، الأحزاب في أي حتة في الدنيا بتمثل قطاع من الشعب وتتكلم بمصالحه، مش بت*** للسلطة وترجع بعد كده تعيط لما تتاكل على قفاها!

أنا مقاطعة الأحزاب دي وخلاص اتحطوا في البلاك ليست كده هم وأي حد يجتمع مع المجلس العسكري الظالم، حتى لو الأحزاب فيها أعضاء محترمين مش راضيين على المحتوى فأنا مقاطعة أي حزب فيه فرد واحد م*** بالشكل ده.

إيه اللي حصل في مسيرة وزارة الدفاع 30/9؟

2011-10-01T00:33:00.003+02:00

بعد 8 شهور من الثورة وسقوط الشهداء وهروب الحرامية واختفاء القناصة وسائق السيارة الدبلوماسية والحد الأدنى للأجور و12 ألف محكوم عليه عسكرياً وكرامتنا وشهادة المشير ماعرفش جايز كان طبيعي إن الناس تتجمع تاني في الميادين، وإن الهتاف يبقى ضد حكم العسكر اللي هو حتى لو اتهبلت في مخي وبقيت حيادية برضو هاقول عليه فاشل بالتلاتة.

على الساعة 6 تقريباً لقيت مسيرة كبيرة تشرح القلب خارجة افتكرتهم رايحين على النائم العام اللي موقف حال العدالة الله يخرب بيته، بس لقيتهم مكملين، وعرفنا إنهم رايحين لوزارة الدفاع، أو للعباسية لإني كنت متأكدة إن الجيش هايعمل الاستعدادات بتاعت يوم موقعة العباسية.

بيني وبينكم مابقتش عارفة أكمل ولا لأ، خفت من تكرار السيناريو المهبب وسقوط شهداء ومصابين، بس قلت المجلس العسكري ظالم، وطالما في حوالي 5 آلاف غيري رايحين من حقهم علي إني "أحميهم" وأدافع عن حقهم في التظاهر السلمي من غير ما حد يرهبهم أو يضربهم أو يقتلهم. الناس كانت جاية في الاتجاه المعاكس بتقول لنا خلوا بالكوا الجيش قافل الطريق، لقيت واحد جنبي بيقول الشهادتين، قمت قايلاهم في سري.

لما وصلنا كنا منهكين جداً وهتفنا شوية وسكتنا، وطبعاً كان الجيش عامل استعدادات مهولة من المدرعات والأفراد المسلحين والمواطنين الشرفاء اللي بيشتمونا من ساحة جامعة النور، الكلام ده كان في شارع لطفي السيد، استعدينا إننا نرجع ولقيت العميد ممتاز اللي كان بيسلم على حبيب العادلي بحرارة بيكلمنا يقول لنا إنتوا في عيوننا! واللي اسمه ممدوح أبو الخير اللي ظهر في فيديو بيتهم متظاهرة إنها قابضة، ولقيت الناس بتتكلم معاهم، وموتوسيكلات مريبة رايحة جاية، ومواطنين شرفاء في الجامع فقلت طبعاً المظاهرة فيها مندسين، وجمعنا بعض ورجعنا لحد الدمرداش، بس ساعتها كان في ناس بتقول هانرجع على كوبري القبة ومابقتش فاهمة ليه؟

نزلت كوبري القبة كده كده عشان أعرف أروح لقيت ناس من المسيرة متجمعين، مفيش 5 دقايق ومئات خرجوا يهتفوا بالحرية وبسقوط حكم العسكر، وطبعاً كانوا عاملين استعدادات مشابهة في كوبري القبة، وحد حدف طوبة تقريباً من فوق الكوبري والناس تجري، العساكر تقدم شوية والناس تجري، مشيت ناحية الخليفة المأمون لقيت الجيش قافله برضو بدون مبرر، لإننا ماكانش معانا سلاح غير صوتنا، لا حد فينا حدف طوب ولا مسلح ولا حاجة، عشان كده أي إعلامي هايقول إن المسيرة كانت بتهاجم قوات الجيش أو وزارة الدفاع يبقى كداب ومنافق لإن ده ببساطة ماحصلش، ايها المجلس العسكري لقد ورمنا بقى، إنت فاشل وبتعاملنا كأننا مالناش قيمة ومستهتر بحياتنا وكرامتنا واحنا كرامتنا غالية علينا، ارحل بقى!

لا أرتضي بالخلود بديلاً

2011-09-27T20:53:00.003+02:00

من ساعة ما ربنا ابتلانا بحكم المجلس العسكري يوم 10 فبراير وبعد الكوارث اللي حصلت من ساعتها، في أصوات كده بتطلع من عينة يا ترضوا بالحكم العسكري يا تجيبوا حكم مدني مايسألش العسكر هم بيعملوا إيه ولا يحاسبهم على انتهاكاتهم الحالية ضد المعتقلين أو أي وقائع فساد أو فحوص العذرية المهينة، أحب أقول لهم يفتح الله. احنا مش بنهزر، دي ثورة، ودفعنا تمن الشوارع دم والدم غالي، الناس ماتت عشان كل مليم طالع وداخل البلد نبقى فاهمين بالظبط رايح فين وجاي منين ولمين، وكل معتقل يتعامل باحترام، مش عايزين شاي يا سيدي زي شاي أحمد عز كده، بس مش تقلعوهم هدومهم وتكهربوهم طالما فقرا ومالهمش ضهر، احنا مادفعناش تمن الشوارع دم عشان نقبل ببلد نص محترمة أو بنص ثورة، احنا نزفنا عشان البلد دي تبقى أحسن بلد في الدنيا، واحنا نقدر نخليها أحسن بلد في الدنيا في خمستاشر عشرين سنة، ومش هنرضى بحلول وسط، مدنية يعني مدنية وعدالة يعني عدالة.

أنا أدعم سميرة محمد

2011-09-27T08:07:00.005+02:00

سميرة محمد واحدة من المعتقلات اللي خضعوا لفحوصات العذرية المقززة في السجن الحربي مقدمة بلاغ، على طريقة فيك الخصام وأنت الخصم والحكم يا عيني، وبيهددوها بالقتل، كأن كل اللي حصل فيها مش كفاية، وكأن الجيش المصري ماتفضحش فضيحة المتطاهر بعد الأساليب المقززة دي، كشوف عذرية، تعذيب الشباب، اعتقال الأطفال، هو فيه إيه؟ هو ده الجيش اللي حمى الثورة؟ إشهد يا تاريخ.

وأنا من مزنقي كمصرية مصدومة من تصرفات العسكر ومش لاقية لها تفسير إلا مؤسسة عايزة تجهض الثورة بأي طريقة ونجحت في كده للأسف إلى حد ما، وكواحدة بيجيلها كوابيس من موضوع فحوصات العذرية ده، أدعم سميرة محمد بشدة، وأبوس إيدها ماتسيبش حقها لإنه حق كل المصريين

ارحل يعني إمشي

2011-09-26T19:35:00.002+02:00

.. أٌعلن أنا وايلد آت هارت عدم اعترافى بشرعية المجلس العسكرى كحاكماً لمصر

وأُعلن أيضاً أنه لا يمثلنى كمواطن مصرى

وأنه يحكم مصر حاليا بقوة السلاح بعد انتهاء شرعيته التى من المفترض أنه إكتسبها من

شرعية الثورة التى أجهض كل مطالبها وماطل فى تنفيذ أهدافها

... بل وتمادى فى الحفاظ على كيان النظام الذى قامت الثورة من أجل إسقاطه

إمضاء مواطنة مصرية

إضافة مني: المجلس ماستمدش شرعيته من الثورة ولا حاجة، احنا بس كنا واثقين فيه على أساس إنه جيل حرب

أكتوبر المجيدة وكده، بس خذلنا

وأوكد للمجلس العسكري أن رحيله بل ومحاسبته أمر حتمي نظراً لما ترتكبه قواته من بطش وظلم

ضد كافة طوائف الشعب خصوصاً الفقراء

والله الموفق

شهادة المشير

2011-09-25T17:33:00.005+02:00

وحسبنا الله ونعم الوكيل:

س١ : حصل اجتماع يوم 22 يناير، هل ورد إلي رئيس الجمهورية السابق ما دار في هذا الاجتماع وما أسفر عنه وما كان مردوده؟

ج1 : الاجتماع كان برئاسة رئيس الوزراء واعتقد أنه بُلغ

س2 : بداية من أحداث 25 يناير وحتي 11 فبراير هل تم اجتماع بينك وبين الرئيس السابق حسني مبارك؟

ج2 : ليست اجتماعات مباشرة ولكن يوم 28 يناير لما أخذنا الأمر من السيد رئيس الجمهورية كان هناك اتصالات بيني وبين السيد الرئيس

س3: ما الذي أبداه رئيس الجمهورية في هذه اللقاءات؟

ج3: اللقاءات بيننا كانت تتم لمعرفة موقف القوات المسلحة خاصة يوم 28 وعندما كلفت القوات المسلحة للنزول للبلد ومساعدة الشرطة لتنفيذ مهامها وكان هناك تخطيط مسبق للقوات المسلحة وهذا التخطيط يهدف لنزول القوات المسلحة مع الشرطة وهذه الخطة تتدرب عليها القوات المسلحة والقوات المسلحة بتنزل لما الشرطة بتكون محتاجة المساعدة وعدم قدرتها علي تنفيذ مهامها وأعطي الرئيس الأمر لقائد القوات المسلحة وأعطي الرئيس الأمر لقائد القوات المسلحة اللي هي نزول القوات المسلحة لتأمين المنشآت الحيوية وهذا ما حدث

س4 : هل وجه رئيس الجمهورية السابق المتهم محمد حسني مبارك أوامر إلي وزير الداخلية حبيب العادلي باستعمال قوات الشرطة القوة ضد المتظاهرين بما فيها استخدام الاسلحة الخرطوش والنارية من 25 يناير حتي 28 يناير؟

ج4 : ليس لدي معلومات عن هذا واعتقد ان هذا لم يحدث

س5 : هل ترك رئيس الجمهورية السابق للمتهمين المذكورين من أساليب لمواجهة الموقف؟

ج5 : ليس لدي معلومات

س6: هل ورد أو وصل إلي علم سيادتك معلومات أو تقارير عن كيفية معاملة رجال الشرطة؟

ج6 : هذا ما يخص الشرطة وتدريبها ولكني أعلم ان فض المظاهرات بدون استخدام النيران

س7 : هل رصدت الجهات المعنية بالقوات المسلحة وجود قناصة استعانت بها قوات الشرطة في الأحداث التي جرت؟

ج7 : ليس لدي معلومات

س8 : تبين من التحقيقات إصابة ووفاة العديد من المتظاهرين بطلقات خرطوش أحدثت إصابات ووفيات..هل وصل ذلك الأمر لعلم سيادتك وبم تفسر؟

ج8: أنا معنديش معلومات بكده.. الاحتمالات كتير لكن مفيش معلومة عندي

س9 : هل تعد قوات الشرطة بمفردها هي المسئولة دون غيرها عن إحداث إصابات ووفيات بعض المتظاهرين؟

ج9 : إنا معرفش ايه اللي حصل

س10 : هل تستطيع سيادتك تحديد هل كانت هناك عناصر أخري تدخلت؟

ج10 : هيا معلومات غير مؤكدة بس اعتقد ان هناك عناصر تدخلت

س11 : وما هي تلك العناصر؟

ج11 : ممكن تكون عناصر خارجة عن القانون

س12 : هل ورد لمعلومات سيادتك ان هناك عناصر اجنبية قد تدخلت؟

ج12 : ليس لدي معلومات مؤكدة ولكن ده احتمال موجود

س13 : وعلي وجه العموم هل يتدخل الرئيس وفقا لسلطته في ان يحافظ علي أمن وسلامة الوطن في إصدار أوامر أو تكليفات في كيفية التعامل؟

ج13 : رئيس الجمهورية ممكن يكون أصدر أوامر - طبعا من حقه ولكن كل شئ له تقييده المسبق وكل واحد عارف مهامه

س14 : ولمن يصدر رئيس الجمهورية علي وجه العموم هذه الأوامر؟

ج 14 : التكليفات معروف مين ينفذها ولكن من الممكن ان رئيس الجمهورية يعطي تكليفات مفيش شك

س15 : وهل يجب قطعا علي من تلقي أمر تنفيذه مهما كانت العواقب؟

ج15 : طبعا يتم النقاش والمنفذ يتناقش مع رئيس الجمهورية وإذا كانت الأوامر مصيرية لازم يناقشه

س16: هل يعد رئيس الجمهورية السابق المتهم محمد حسني مبارك مسئول مسئولية مباشرة أو منفردة مع من نفذ أمر التعامل مع ألمتظاهرين الصادر منه شخصيا

ج16 : إذا كان أصدر هذا الأمر وهو التعامل باستخدام النيران أنا اعتقد ان المسئولية تكون مشتركة وأنا معرفش ان كان أعطي هذا الأمر أم لا

س17: وهل تعلم ان رئيس الجمهورية السابق كان على علم من مصادره بقتل المتظاهرين؟

ج17: يسأل في ذلك مساعديه الذين ابلغوه هل هو علي علم أم لا

س18: وهل تعلم سيادتكم ان رئيس الجمهورية السابق قد تدخل بأي صورة كانت لوقف نزيف المصابين؟

ج18 : اعتقد انه تدخل وأعطي قرار بالتحقيق فيما حدث وعملية القتل وطلب تقرير وهذه معلومات

س19: هل تستطيع علي سبيل القطع والجزم واليقين تحديد مدي مسئولية رئيس الجمهورية السابق عن التداعيات التي أدت إلي إصابة وقتل المتظاهرين؟

ج19 : هذه مسئولية جهات التحقيق

س20: هل يحق وفقا لخبرة سيادتكم أن يتخذ وزير الداخلية وعلى وجه العموم ما يراه هو منفردا من اجراءات ووسائل وخطط لمواجهة التظاهرات دون العرض علي رئيس الجمهورية؟

ج20: اتخاذ الاجراءات تكون مخططة ومعروف لدى الكل في وزارة الداخلية ولكن في جميع الحالات يعطيه خبر بما يخص المظاهرات ولكن التظاهر وفضه هي خطة وتدريب موجود في وزارة الداخلية

س21 : وهل اتخذ حبيب العادلي قرار مواجهة التظاهر بما نجم عنه من إصابات ووفيات بمفرده بمساعدة المتهمين الاخرين في الدعوى المنظورة وذلك من منظور ما وصل لعلم سيادتك ؟

ج 21 : معنديش علم بذلك

س22 : علي فرض إذا ما وصلك تداعيات التظاهرات يوم 28 يناير إلي استخدام قوات الشرطة آليات مثل اطلاق مقذوفات نارية أو استخدام السيارت لدهس المتظاهرين..هل كان أمر استعمالها يصدر من حبيب العادلي ومساعديه بمفردهم ؟

ج 22 : ما أقدرش أحدد اللي حصل أيه ولكن ممكن هو اللى اتخذها وأنا ما أعرفش واللى اتخذها مسئول عنها

س23: هل يصدق القول تحديداً وبما لا يدع مجالاً للشك أو الريبة أن رئيس الجمهورية السابق لا يعلم شيئاً أو معلومات أيا كانت عن تعامل الشرطة بمختلف قواتها أو أنه لم يوجه إلى الأول سمة أوامر أو تعليمات بشأن التعامل والغرض أنه هو الموكل إليه شئون مصر والحفاظ على أمنها ؟

ج23 : أنا ما أعرفش اللى حصل أيه لكن أعتقد إن وزير الداخلية بيبلغ وممكن ما يكونش مش عارف بس أنا ما أعرفش

س24 : هل هناك اصابات أو وفيات لضباط الجيش ؟

ج 24 : نعم هناك شهداء

س25 : هل تعاون وزير الداخلية مع القوات المسلحة لتأمين المظاهرات؟

ج 25 : لأ

س26 : هل أبلغت بفقد ذخائر خاصة بالقوات المسلحة؟

ج26: مفيش حاجة ضاعت لكن هناك بعض الخسائر في المعدات واتصلحت ومفيش مشكلة

س27: هل أبلغت بدخول عناصر من حماس أو حزب الله عبر الأنفاق أو غيرها لإحداث إضرابات ؟

ج27 : هذا الموضوع لم يحدث أثناء المظاهرات واحنا بنقاوم الموضوع ده واللي بنكتشفه بندمره وإذا كان فيه حد محول لمحكمة فهذا ليس أثناء المظاهرات

س28: هل تم القبض على عناصر أجنبية في ميدان التحرير وتم إحالتهم للنيابة العسكرية ؟

ج28: لا ..لم يتم القاء القبض على أى أحد

س29: فى الاجتماع الذي تم يوم 20 يناير هل تم اتخاذ قرار بقطع الاتصالات؟

ج29 : لم يحدث

س30: بعض اللواءات قالوا طلب منا فض المظاهرات بالقوة..هل طلب من القوات المسلحة التدخل لذلك؟

ج30: أنا قلت فى كلية الشرطة في تخريج الدفعة إن أنا بأقول للتاريخ إن أي أحد من القوات المسلحة لن يستخدم النيران ضد الشعب

شهدائنا مش بلطجية يا عيسوي

2011-09-21T19:08:00.003+02:00

تحديث: أهالي الشهداء قدموا بلاغ ضد العيسوي

ظباطك هم اللي بلطجية يا عيسوي، وتعرف بقى؟ إنت اللي بلطجي يا عيسوي، عارف ليه؟ عشان مش بتطبق القانون يا عيسوي.

واحد من ظباط الأمن المركزي قال في تحقيقات النيابة إن لما تكون الشرطة عايزة تفض المظاهرة بتدي إنذار الأول، إنذار مش "هنفشخكوا يا ولاد الم*****"، وبعدين بيرشوا مياه، بعد كده الغاز، بعد كده الكارتشوك (؟) من مسافة 5 أمتار، بعدين خرطوش من مسافة 50 متر، بعدين طلقات دافعة بعدين سلاح آلي.

وخدوا بالكوا إن من بين كل خطوة وخطوة بعد الغاز عرض الأمر على مدير الأمن والخرطوش مش بيتضرب غير بعد عرض الأمر على وزير الداخلية. ده بغض النظر عن إن إطلاق النار أو الغاز المسيل للدموع على مسيرة سلمية قانون قمعي أساساً ولازم يتلغي.

وبالنسبة لأعمال الشغب ضرب النار بيكون على الرجلين مش في الراس والصدر يا عيسوي، زي ما رئيس لجنة تقصي الحقائق قال.

بناء على ما سبق يا عيسوي بيه لما كل ما نشوف خلقتك تقول لنا اللي ماتوا جنب الأقسام كانوا بلطجية بيحاولوا يقتحموه، وماعندناش قناصة، يبقى إنت شخص ضلالي وبتزيف التاريخ كأن مثلاً الشرطة دي كانت فعلاً معظمها شرفاء لا بيهتكوا أعراض الناس ولا بيرتشوا ولا بيعذبوا ولا بيقتلوا بدون حساب ولا أي حاجة، وكأن الثورة ماقامتش يوم عيد الشرطة أساساً كأسوأ جهاز في عهد المخلوع.

لما يطلع عليك الهسهس بتاع اللي ماتوا بلطجية يبقى إنت اللي بلطجي وبتدافع عن بلطجية قتلوا شباب وأطفال عزل من السلاح جنب الأقسام أو في الميادين - واللي استشهدوا جنب الأقسام أكتر بكتير.

كل شهادات العيان اللي قريتها بتقول إن ظباط الأقسام ضربوا النار في الأحياء عشان يمنعوا الناس إنهم يوصلوا للتحرير والمظاهرات تكبر، ويوم الجمعة اللي فاتت واحد من إمبابة بيقول أنا شفت بعيني ظباط القسم جايبين بلطجية بالليل وبيولعوا فيه بنفسهم، والعيسوي لازم يمشي. يبقى ماتجيش تبلطج على الناس يا عيسوي وتقول عليهم بلطجية، البادي أظلم، مين اللي كان مروح عادي طلع له مخبرين لابسين مدني وضربوه بالشوم لحد ما مات عشان افتكرهم حرامية وجري منهم؟ مين اللي كان داخل محل سايبر طلع له مخبرين ضربوه لحد ما مات؟ مين اللي كان نازل في مظاهرة عشان زهق من الظباط اللي كل شوية بياخدوا الميكروباص يلفوا بيه وهو في عرض ساعة يشتغلها عشان يأكل أهله؟ مين اللي كان نازل المظاهرة عشان قرف من الفساد والظلم والرشاوى واتضرب برصاص خرطوش من مسافة قريبة ومات؟

فين إسلام حجازي يا مجلس؟

2011-09-14T19:31:00.004+02:00

تحديث: إسلام خرج، وكفاية اعتقلات بالطريقة دي بقى

احنا قاعدين بنتويت لا بينا ولا علينا لقينا واحد مسمي نفسه سحلوب المكار بيقول الآتي

واللي عارفينه لحد دلوقتي إن اسمه إسلام حجازي وساكن في الهرم، وبيكلموه التليفون مقفول، بركات قانون الطوارئ بقى!

مبدئياً أنا باحمل المجلس العسكري مسئولية أي حاجة تحصل له هو وال12 ألف مسجون عسكرياً وبيتعاملوا معاملة سيئة وبيتعرضوا للتعذيب، سواء بقى اللي خطفوه أمن دولة أو مخابرات عسكرية، احنا مش حانخلص من القرف ده؟؟ يعني نعمل لكوا إيه أكتر من ثورة، إنتوا كل ما نهشكوا تطلعوا لنا من الجحور تاني؟

عباس الضو بيقول لأاااا

2011-09-04T18:39:00.000+02:00

هيبة الدولة؟

2011-09-02T12:34:00.001+02:00

الدولة التي تختذل هيبتها في أقسام وأفراد الشرطة والجيش والقوات المسلحة بينما تمتهن كرامة المواطن ويتعرى قسراً ويتعرض للتعذيب والإهانة والقتل دون حساب

هي دولة فاشية

يلا يا مصري إنزل من دارك

2011-09-01T07:33:00.001+02:00

مصر عجيبة حتى في ثورتها...دلوقتي ناس كتير بدأ يظهر لها إن حاجات بسيطة هي اللي اتغيرت، وإن مطالب الثورة لسة ماتنفذتش والأسوأ إنها مش في طريقها حتى للتنفيذ. وبدأت نغمة غريبة تنشتر بين الناس على الأقل على تويتر إن الثورة خسرت الشارع، ورغم المحاولات المستميتة من البعض إنهم يفهموني إزاي يبقى الشارع هو اللي قام بالثورة - وثورة عظيمة - بعد كده نفس الشارع ده تخسره الثورة، مش قادرة أفهم. يعني مثلاً، لو شاب نزل يتظاهر عشان مش لاقي شغل، وبعد الثورة لسة مش لاقي شغل، هو هو السبب ماتغيرش، غن القيادة الحالية ماعندهاش رؤية لحلول قصيرة أو طويلة المدى لحل أزمة البطالة، الثورة هتخسره إزاي؟ لو عامل نزل عشان الحد الأدنى للأجور وحقه في حياة كريمة، وجه بعد الثورة عصام بيه شرف قال له إنت فئوي وأناني إركن على جنب دلوقتي، وجم العسكر حولوه محاكمة عسكرية لممارسة حقه الطبيعي جداً والمنطقي جداً في الإضراب، يبقى الثورة خسرته إزاي؟ بالعكس ده هيبقى وقود للنضال من أجل حقه وحق زمايله في مصنعه أو شركته.

يبقى موضوع إن الثورة خسرت الشارع ده محض افتراء، أي شخص واعي عارف إن المجلس هو اللي كان متوقع منه ينفذ مطالب الثورة ولم ينفذ - بالعكس - اتهم الثوار بالتخطيط لتخريب الوطن زي ما الرويني قالها بمنتهى الوضوح لدينا عبد الرحمن. الشارع ممكن يتضايق من قفل الطريق بدون داعي مثلاً، ممكن يتضايق ويخاف لو الثوار ماسكين شوم، ممكن يتضايق لو الثوار بيتخانقوا مع بعض، لكن فكرة إنه يكفر بالثورة نفسها رغم إن الثورة لا تحكم ورغم إنه عارف إن أي تحرك سلمي في الشارع قد يعرضه للهجوم من البلطجية تحت مرأى ومسمع الجيش والشرطة، أو هجوم من الجيش والشرطة نفسهم، أو الاعتقال والتعرض للكهرباء في أماكن حساسة، فهو أمر غير وارد.

الثورة دلوقتي لازم تمشي في اتجاهين، اتجاه القضايا العامة، نتحرك فيه كلنا، عشان نمنع إن أي حد فينا يتضرب بالنار في لجنة شرطة، أو يتعرض للتعذيب والإهانة تحت إيد ظابط سادي، أو يضيع سنين من عمره في السجن الحربي عشان بيطالب بحقه وحق عياله، أو يتحبس في قضايا الرأي...أكمل

الاتجاه التاني هو الثورة على مبارك الصغير في كل مصنع وشركة وجامعة ومدرسة ومصلحة حكومية والعمل على إصلاحها، أساتذة الجامعة مثلاً بيدعوا لإضراب احتجاجاً على عدم انتخاب قيادات جامعية جديدة رغم إن حكومة شرف حاولت تنيمهم وقعدت تقول لهم طب استنوا آخر العام الدراسي، طب استنوا أغسطس، عدى العام الدراسي وعدى اغسطس ومفيش حاجة اتغيرت، عايزين ينتخبوا شوية ويسيبوا الباقى معينين، طبعاً الهدف من الخطوة دي تفريقهم! قيس كلامي على عمال هيئة النقل العام مثلاً اللي بيدعوا لإضراب عشان مرتباتهم الهزيلة رغم شغلهم الشاق جداً، والنقابات المستقلة ال90 اللي اتأسس معظمهم بعد الثورة وممكن يشكلوا ضغط حقيقي على السلطة الحالية وأي سلطة، وهو ده المطلوب.

بالنسبة لصينية التحرير، هي رمز قوي، ولازم نبقى فاهمين مغزاه كويس، العسكر مصممين يبقوا فوق إرادتنا وأي حد ينطق يتدهس بالجزمة، والدليل على كلامي إن العسكر مش بس محتلين الميدان دلوقتي، طلاب كلية إعلام اتضربوا في الحرم الجامعي العمال اتحولوا محاكم عسكرية بسبب اعتصام سلمي 6 إبريل اللي هم أجدع ناس على الساحة السياسية دلوقتي بدون منازع بيتهموهم بالتخريب والعمالة، دي مش أول مرة العسكر يفرض سيطرته بشكل رمزي زي التحرير أو بشكل فعلي زي فض اعتصام سلمي.

وكل واحد حر بقى يا مصريين اختاروا مصيركوا بنفسكوا، كان واحد على تويتر قاللي ماتتنرفزيش، أنا مش متنرفزة خااااالص عشان أنا عارفة سكتي، أنا أي حد مظلوم في البلد دي هدافع عنه هنا على المدونة أو أنزل معاه الشارع إن شالله لو لوحدي، الدور والباقي على اللي شايفين إن الثورة اكتملت، أو إننا ممكن نكمل المسيرة بالانتخابات بس، آسفة أقول لكوا ماتأمنوش لغدر اللي بالي بالكوا.

المجلس العسكري وفرعون

2011-08-29T10:49:00.004+02:00

بسم الله الرحمن الرحيم

إن فرعون علا في الأرض وجعل أهلها شيعاً: الاستفتاء

يستضعف طائفة منهم: 6 إبريل - تعذيب المعتقلين

يذبح أبناءهم: رامي فخري على الأقل

ويستحى نسائهم: كشوف العذرية

إنـــه كـــان مـــن المفســـدين

صدق الله العظيم

مش هنمشي السفير يمشي

2011-08-21T04:32:00.005+02:00

أيها الأخوة المواطنون في هذه الظروف التاريخية التي تمر بها البلد ماتسيبوش أم السفارة قبل ما السفير يغور وده أقل واجب تجاه شهدائنا

أبوس الأيادي ماتغلطوش غلطة 11 فبراير وتتطمنوا إن مطالب الثورة هاتتنفذ وتروحوا، احنا مات لنا 25 شهيد على الأقل على الحدود في الكام سنة اللي فاتوا وقبل كده مبارك كان كاتم على نفسنا ومقلل قيمتنا لكن دلوقتي احنا مقدرين قيمة نفسنا ومفيش حد حيجيب لنا حق اللي ماتوا غيرنا

ولما بنقول السفير يمشي وحتى وقف تصدير الغاز وإلغاء اتفاقية كامب ديفيد كل ده مش إعلان حرب ولا حتى تلويح بإعلان الحرب دي اسمها هيبة دولة، هيبة الدولة وقوتها في إنها ماتسمحش لأي حد أياً كان إنه يمس طرف من أرضها فما بالك يقتل ولادها، ودم ولادها غالي

في 100 حل وسط ما بين الخنوع والذل وخيانة دم شهداء الواجب وبين إعلان الحرب، استجدعوا وخليكوا ورا السفير لحد ما يغور

وماحدش يقول مش وقته، المثل الإنجليزي بيقوللك أطرق الحديد وهو ساخن إنت لو قعدت تقنع الناس سنة إن إسرائيل مش عايزة نظام ديمقراطي ولا انتخابات حرة ولا نزرع قمحنا ولا نصنع ولا نبني ماحدش حيعتصم جنب السفارة عشان يساهم في إسقاط هيمنة إسرائيل علينا، لكن بما إنهم استغبوا وقتلوا إخواتنا ومتوقعين مننا نسكت زي ما كان المخلوع بيسكتنا، يبقى لازم تستغل الزخم اللي في الشارع وتكسر عين إسرائيل واللي ساند إسرائيل واللي مطاطي راسه قدام إسرائيل وكل واحد عارف نفسه

ماتســــــيـــــــبـــــــوش أم الســــــــــفـــــــــــــارة

الفرق بين المحاكمات المدنية والمحاكمات العسكرية

2011-08-17T06:10:00.002+02:00

المحاكمات المدنية : تشكل المحكمة ,, من قضــــــاة مدنيون , حاصلون على ليسانس القانون , تصدر المحكمة حكمها بعد المشاورة بين رئيس المحكمة وعضوى المحكمة اليمين واليسار، يجوز الطعن على الحكم بطرق الطعن العادية سواء بالاستئناف أو النقض.

للمتهم الحق فى رد { مخاصمة } القاضى اذا أخل بالقانون او بإجرءات المحاكمة .

يتم تنفيذ العقوبة داخل سجن تابع لوزارة الداخلية تحت راقبة وتفتيش ومتابعة من القضاء ومنظمات المجتمع المدنى .

المحاكمات العسكرية : تشكل المحكمة من قضـــــاة عسكريون , ولا يشترط ان يكون القضاة دارسين للقانون بإستثناء رئيس المحكمة , وتصدر المحكمة العسكرية حكمها على المتهم ويكون حكمها نهائى وبات بعد التصديق عليه من الحاكم العسكرى , ولايشترط فى الحاكم العسكرى ان يكون دارساً للقانون .ولا يجوز رد المحكمة او مخاصمتها اذا تجاوزت أو اخلت بالقانون .ولايجو الطعن على الحكم الصادر من المحكمة العسكرية لا بالنقض ولا بالاستئناف .ويسمح للمتهم فقط التظلم امام الحاكم العسكرى , ويجوز للحاكم العسكرى قبول التظلم او رفضة دون إبداء أسباب .يتم تنفيذ العقوبة داخل سجن حربى ولا تستطيع اى جهة قضائية أو أى منظمة حقوقية الرقابة على السجن .

(منقول)

بيان أسر الشهداء المعتصمين بميدان التحرير

2011-07-23T23:01:00.001+02:00

نظرا لما نشهده من تعتيم اعلامي وتضليل متعمد تجاه كل ما يتعلق بقضية شهداء ومصابي الثورة - وهي القضية التي فجرت الثورة المصرية – ولأن حتى الآن لم يحاسب القتلة بل تتم ترقيتهم ومكافأتهم وليس هذا فحسب بل وتطلق يديهم للممارسة الضغوط والتهديدات بشتى الطرق والأساليب مرورا بأحداث البالون وثلاثاء الغاز.. لذلك كله نحن معتمصون منذ ٢٤ يونيو وحتى الآن على أمل أن نجد من شرفاء مصر من يحمينا من البلطجية الذين يمارسون بلطجتهم في ثياب العمل الرسمي.

إن محاولة تصدير قضية دم شهداء هذه الثورة المباركة باعتبارها قضية مادية نسعى من خلالها لتحقيق بعض المكاسب أو تشويه ملامحها عبر إلصاق تهمة البلطجة بالشهداء وترويج أن الضباط القتلة كانوا يدافعون عن أنفسهم وعن مقار عملهم، هو تضليل وتزييف للحقائق التي تشهد عليها الكاميرات والوثائق. وعليه فإننا نؤكد نحن أهالي شهداء ٢٥ يناير على أن مطالبنا هي التالية:

١- حبس الضباط المسئولين والقيادات المتهمين بقتل خيرة أبنائنا وأخوتنا وذلك لمنعهم من الاستمرار في التأثير علي الشهود وطمس الأدلة وترويع أهالي الشهداء والشهود

٢- الاسراع في إحالة بقية قضايا قتل المتظاهرين التي لم تحال الي المحاكم الجنائية وتقصير مدة تأجيلات القضايا المنظورة بالفعل وسرعة تفريغ الدوائر

٣- تكوين فريق متفرغ من أكفأ رجال النيابة العامة يختص بالتحري وجمع الأدلة والمعلومات المتعلقة بالقضايا التي أحيلت من قبل

٤- اصدار بيان رسمي من وزارة الداخلية يتضمن اعتذارا رسميا للشعب المصري عامة ولأهالي الشهداء خاصة عن الممارسات التي حدثت تجاه هذا الشعب ويقر بأن شهداء ٢٥ يناير ليسوا بلطجية

٥- تشكيل لجنة دائمة من أهالي الشهداء ومحامييهم ورئاسة الوزراء وأعضاء من فريق النيابة العامة تكون مهمتها تذليل كافة العقبات التي تحول دون سرعة الفصل في هذه القضايا

٦- بث محاكمات المتهمين بقتل الثوار على محطات التليفزيون بثا مباشرا دون تعليق ذلك علي إذن القاضي أو أي جهة أخرى

٧- تكريم شهداء الثورة والمصابين ومساواتهم بشهداء الحرب وإعطائهم وسام الدولة

٨- إقالة وزير الداخلية والنائب العام لعدم قيامهما بواجبهما نحو دماء الشهداء وملاحقة قاتليهم

أخيرا، نؤكد أن مطالبنا ليست مستحيلة وليست مخالفة للقانون فأصل القانون هو إقامة العدل وأداء الحقوق ونحن فقط نطالب بحق دماء أبنائنا

أسر شهداء ومصابي ٢٥ يناير

٢٢-٧-٢٠١١

قنبلة دخان استخدمت ضد المتظاهرين مصنعة سنة 1990 ولازقين عليها... on Twitpic

2011-07-01T21:57:00.001+02:00

قنبلة دخان استخدمت ضد المتظاهرين مصنعة سنة 1993 والتقارير بتق... on Twitpic

2011-07-01T21:55:00.002+02:00

دم الشهداء في رقبتنا

2011-06-20T19:51:00.002+02:00

احنا آسفين يا شهداء، آسفين على عجزنا وضعفنا، آسفين على إن النهاردة جه واللي قتلوكوا هايخرجوا 4 شهور بحريتهم، يرجعوا الأقسام يبتزوا أهلكوا ومش بعيد يخطفوهم ويقتلوهم وماحدش حايعرف يدافع عنهم أو عنكوا

احنا آسفين، يمكن الأيام تجيب أخبار أحلى، ويمكن نحصلكوا

الواحد ماعرفش يحصل لكوا ولا يدافع عنكوا ولا يلحقكوا من الموت، مش بس كده، كمان عشنا وشفنا الذل والهوان

آسفين

روابط المدونات ضد قانون تجريم المظاهرات #right2strike

2011-06-16T18:09:00.014+02:00

عمري ما فقدت الثقة في المدونات، من 5 سنين مع بداية انتشار المدونات المصرية بدأ نظام مبارك يتفضح، المدونين هم اللي فجروا قضايا التحرش الجنسي والتعذيب في أقسام الشرطة، باختصار كانوا أحد مقومات الثورة. والنهاردة كان في اتفاق على التدوين ضد قانون تجريم التظاهر أو الاعتداء على حرية العمل ده، دي روابط اللي كتبوا عن الموضوع وجاري التحديث:

1) الاعتصامات أسقطت النظام الفاسد فأصبحت جريمة - محمد رزق

2) حكومة الثورة المضادة - مؤمن مهدي

3) عن الإضراب في قاهرة المعتز بالله عبد الفتاح - مواطن مفروس

4) تجريم الإضراب سلاح الثورة المضادة الأخير - تامر موافي

5) المفروض في مصر عند المكوجي - أحمد طلعت

Banning protests and handling labor problems: an email to Dr. Sharaf -
Perfectionatic

7) قانون تجريم الاعتصام جريمة في حق الشعب - لولو ديرافن

8) أنتم مصر - المواطن مصري

9) خالتك فئوية وخالتك فوقية بيقولولك ليه تعتصم لما ممكن تتبلطج - Me, Myself and my Imaginary World

10) اعتصم الصورة تطلع حلوة - هشام سري

11) عن قانون الاعتداء على حرية العمل وتخريب المنشآت - أحمد العش

12) عن القانون المجحف الذي يطبق حسب التساهيل - ليليان وجدي

13) قانون مصادرة الحقوق (تجريم الإضراب سابقاً) - محمد سمير

14) تجريم الاعتصام مش شرف يا دكتور عصام - محمد حمدي

15) العمال دائماً بيشيلوا الليلة - أحمد منيريان

16) لا تعتصم ولا تتظاهر بعد الثورة إنت تتاخر - أسور

17) اقرأوا التاريخ أولاً - أنا حرة

18) فئوية - أمنية نجيب

19) سلاح العمال

20) قانون تجريم الاعتصام باطل - لولو ديرافن

21) فيديو مينا نجيب: ضد تجريم الاعتصامات

22) الإضراب مشروع مشروع ضد الفقر وضد الجوع - خمسة فضفضة

23) ثورة سياسية واجتماعية - كمال المناوي

24) ليه فئوية تبقى خالتك - ساح يا بداح

25) قانون تجريم الإضرابات والاعتصامات انتكاسة ديموقراطية واجتماعية - عزة خليل

26) يعني إيه ثورة؟ - يوسف هشام

27) مدونة أي كلام - محمد سيد

قانون تجريم الاعتداء على حرية العمل ظاهره الرحمة وباطنه العذاب #right2strike

2011-06-16T16:15:00.004+02:00

حيث أن المجلس الأعلى للقوات المسلحة تفهم كافة المطالب الفئوية لجميع فئات المجتمع، ويقر بحقوقهم في الوقفات والمظاهرات السلمية، ويسعى إلى العمل الجاد على تنفيذها دونما إخلال بدولاب العمل ودونما تأثير على استقرار العمل في قطاعات الدولة المختلفة وكافة المؤسسات العامة أو الخاصة، وفي ظل ما تمر به البلاد من مرحلة حرجة في تاريخها تتطلب حماية أمنها واقتصادها من التلاعب بهما بهدف تخطي أزمتها الحالية والاستجابة لما ظهر من مطالب مشروعة لكافة فئات المجتمع وتلبيتها، فإن المجلس الأعلى للقوات المسلحة يعاود التأكيد على رغبته الصادقة في تكريس دولة القانون خلال هذه المرحلة من تاريخ البلاد ويعلن بمقتضى الصلاحيات المخولة له وبعد موافقة مجلس الوزراء المرسوم بقانون الآتي نصه وقد أصدرناه (المادة الأولى):

مع عدم الإخلال بأية عقوبة أشد منصوص عليها في قانون العقوبات أو في أي قانون آخر، يعاقب بالحبس والغرامة التي لا تقل عن عشرين ألف جنيه ولا تتجاوز خمسين ألف جنيه أو بإحدى هاتين العقوبتين كل من قام أثناء سريان حالة الطوارئ بعمل وقفة أو نشاط ترتب عليه منع أو تعطيل أو إعاقة إحدى مؤسسات الدولة أو إحدى السلطات العامة أو إحدى جهات العمل العامة أو الخاصة عن أداء أعمالها.ويعاقب بذات العقوبة المقررة في الفقرة السابقة كل من حرض أو دعا أو روج بالقول أو بالكتابة أو بأية طريقة من طرق العلانية المنصوص عليها في المادة ١٧١ من قانون العقوبات لأي من الأفعال السابقة ولو لم يتحقق مقصده."

كلام جميل وكلام معقول ماقدرش أقول حاجة عنه؟ مش كده؟

لأ الحقيقة مش كده. للأسف، ما يسمى بقانون تجريم الاعتداء على حرية العمل وتخريب المنشآت أكبر انتكاسة للثورة. الثورة العظيمة دي قامت بعد تراكمات من تضحيات العمال واحتجاجاتهم منهم مات قبل ما ياخد حقه ومنهم اتشرد وهو قادر على العطاء بعد ما مبارك باع أرضه يا ولاد برخص التراب للمستثمرين الأجانب اللي قفلوا المصانع وشردوا العمال ووقفوا عجل الإنتاج بتاعة عصام شرف. غير مقبول، وغير مفهوم إن يصدر قانون تجريم التظاهر في أثناء ثورة، إلا إذا كان اللي أصدره عايز يجهض الثورة دي. هو ده كان اسمه، قانون تجريم التظاهر، بعد ما تعرض لهجوم غيره الاسم، وبقى المحتوى زي ما هو زي ما إنتوا شايفين.

ييجي واحد يقول لي يا جماعة إهدوا شوية البلد اقتصادها متضرر ومش مستحملة. ضحكوا عليك يا أفندي. البلد دي قاعدة على زكايب فلوس من الآخر كده، واللي عايز ينصف كل المصريين من ناحية فرص العمل والأجور والرعاية الطبية هايعرف. أمال مبارك جاب ال40 مليار دولار على الأقل يعني منين؟ وصفوت الشريف جاب ال30 مليار جنيه منين؟ وال150 مليار اللي في الصناديق الخاصة المعقربة دي بتعمل إيه؟ والساعات الألماظ اللي عند زكريا عزمي وما خفي كان أعظم. ما هو كل ده من موارد البلد، زي ما في موارد نهبوها في موارد دلوقتي لإنصاف العاملين. قريت دراسة إن رجال الأعمال ثرواتهم قد ميزانية الدولة 5 مرات. يبقى مانقولش مفيش موارد بقى، نقول في موارد والخير كتير، بس منهوبة.

ييجي واحد تاني يقول لي طب إنتوا زعلانين ليه، من حق الناس تشتغل من غير ما حد يعطلها. كلام جميل، بس لو حضرتك فاكر إن القانون ده فعلاً بيتطبق على بلطجية بيمنعوا الناس من إنهم يشتغلوا تبقى غلطان. حكومة عصام شرف اللي هي المفروض خرجت من رحم الثورة نازلة تنكيل في العمال اللي قاموا بيها. خد عندك أوائل خريجين الأزهر، كانوا معتصمين قدام مجلس الوزراء عشان عايزين يتعينوا، متفوقين وعايزين يفيدوا بلدهم، وفي ناس تانية اتعينت بدالهم أقل كفاءة، حكومة عصام شرف تضربهم وتعتقلهم كأنهم مجرمين وتفرض عليهم 10,000 جنيه كفالة!

شوف عمال أسمنت بني سويف، مش عايزين يطلعوا معاش مبكر، عايزين يشتغلوا ويقوموا اقتصاد البلد على رجليه، يتعامل معاهم عصام شرف بنفس أسلوب مبارك، البطش الأمني بدل من حل المشكلة وإكرامهم ومنع الشركة من الضياع.

عندك الفلاحين أجدع ناس، اللي بيزرعوا أرضك وبينقذوا مصر من المجاعة بدل ما نشحت دقيقنا من اللي يسوى واللي مايسواش، أرضهم اتاخدت منهم من أصحاب نفوذ وعايزين ياخدوها يزرعوها تاني، يتقبض عليهم مع خريجي الأزهر ويضطروا يدفعوا 10,000 جنيه برضو!

فين تعطيل العمل هنا؟ كل المعتصمين عايزين يشتغلوا، فلما الحكومة تعتقلهم وتلوي دراعهم وتعاقبهم واحنا نقول عليهم مظاهرات فئوية، هذا اللفظ اللي أطلقه واحد شرير كده، ونقلب الحقيقة 180 درجة، يبقى ده ظلم ولا لأ؟ لما الظلم يستشري على قطاعات كبيرة من المصريين، معظم الفلاحين والعاملين والموظفين، حاييجي منين الاستقرار؟ مين اللي موقف عجلة الإنتاج يا سادة؟

شهداء الثورة المصرية ... قتلوا غدراً

2011-06-13T20:26:00.005+02:00

بادعي دعوة مظلومة، ودعوة المظلوم لا ترد ومفيش بينها وبين ربنا حجاب. كل ما أقرا شهدائنا ماتوا إزاي والمصابين حالتهم إيه

أتقهر، اللي أخد 15 رصاصة، اللي نزل من بيته يغير مكان الموتوسيكل عشان مايتسرقش، اللي كان بيشرب المصابين، اللي كان بينقذ ناس من الرصاص، اللي كان بيوصل أهله، اتقتلوا من غير أي جرم أو ذنب. عشان بس الناس تعرف إن النظام الظالم مش بيفرق بين متظاهر وواحد ماشي جنب الحيط، إنما برضو الناس مش فاهمة.

إنتوا عارفين يعني إيه وزارة الداخلية دلوقتي حالاً يبقى فيها قتلة؟ فاهمين يعني إيه دلوقتي حالاً الوزارة فيها ناس فضلت تكهرب في سيد بلال لحد ما ربنا رحمه، وناس خططت لتفجير كنيسة يوم عيد، وناس فضلت تكهرب متهمين في أعضائهم التناسلية لحد ما ماتوا، متخيلين يعني إيه؟ هم دول اللي منتظرين منهم يحمونا ويحفظوا الأمن؟ عارفين يعني إيه الحيوان اللي كان سايق العربية الدبلوماسية اللي فرمت المتظاهرين لسة عايش ومبرطع وماحدش عرف يمسكه ولا حايمسكه؟ قبل كده عربية خبطتني خبطة بسيطة وكان الألم رهيب، مش قادرة أتخيل إحساس الشهداء وهما بيتعجنوا تحت العربيات.

حسبي الله ونعم الوكيل.

إنتوا عارفين إن الولد اللي اتقتل في الفيديو ده تقريباً في تالتة إعدادي؟ ذنبه إيه عشان يتقتل ويطلع بعد كده ناس تقول على الثورة 25 خساير، إنتوا جنس ملتكوا إيه يا بعدا؟

إنتوا عارفين إن القناصة اللي استهدفوا الناس بدون تمييز ماحدش قبض عليهم ولا حد عايز يعترف هم مين؟ قوات مكافحة الإرهاب معروفة، وصور الظباط اللي بيقتلوا معروفين، إنما كفاية كده البلد خربت.

الشهداء اتعمل فيهم جرايم لسة ماحدش عارفها، وكل يوم نكتشفها وكل يوم محاكمات الظباط المقبوض عليهم تتأجل بالشهور، يعني الداخلية قتلتهم والطب الشرعي ضيع حقهم والنيابة ماشية ببطء السلحفاة، ومش عايزينا نثور.

ماحدش كان نازل ماسك عصايا، والشهداء كانوا بيقولوا لأهاليهم ماتخافوش دي مظاهرات سلمية، ماتخافيش ياما دي مظاهرات سلمية، تيجي بعد كده أم الشهيد تستلم ابنها من زينهم.

اتقتلوا غدر ليه؟ ليه تقتلوا مريم مكرم والصحفي أحمد محمود ودكتور أحمد بسيوني لمجرد إنهم كانوا بيصوروا؟ ليه تقتلوا ناس عايزة تعيش؟ ليه تقتلوا ناس تستاهل تعيش وسايبين السفاح الكبير مبارك مبرطع في شرم؟

كل ما أسمع حكاية شهيد أحس إني مطعونة في ضهري وبانزف لكن مش باموت، ولما 19 شهيد يتدفنوا سكيتي من غير ما نعرف مين اللي قتلهم باحس إن كرامة مصر كلها بتدفن معاهم. لو هي دي الضريبة اللي لازم ندفعها إيه اللي يخلي ظباط متهمين بالقتل يترقوا ويروحوا يحضروا المحاكمة، أو مايحضروش، ويرجعوا يشتغلوا تاني! لو هي دي الضريبة اللي لازم ندفعها ليه المجلس والحكومة مش عايزة تدي الناس حقوقها ومطلعين قوانين تلوي دراعهم ولا كإننا عملنا ثورة! إيه اللي خلانا ننشغل شهور بالاستفتاء وطلع في الآخر مالوش لازمة ونعمل مليونيات عشان الفاسدين يتحبسوا؟ إيه اللي خلانا قيمتنا قليلة لدرجة وزير المالية يطاطي لرجال الأعمال ويرمي لنا عضمة ال700جنيه ولا كلاب السكك؟ الشهداء ماتوا عشان مصر دي تقوم، وإن شاء الله هاتقوم غصب عن أتخن تخين فينا، لكن قرارات "حكومة الثورة" والقوانين اللي بتطلعها مش بتبشر بالخير.

حسبي الله ونعم الوكيل تاني، على كل واحد رفع سلاحه على شهدائنا، هتروحوا من ربنا فين ... بكرة تتاخدوا بالنواصي والأقدام وتترموا في نار جهنم مانشوفكوش تاني، وساعتها ابقوا قولوا ماحصلش، يا كدابين يا قذرين.

بعد كل المآسي دي، وناس تطلع تقول لنا بمنتهى البساطة كفاية يا جماعة إهدوا شوية البلد خربت، في منهم محترمين بس مش فاهمين، أحب أقول لهم الهدوء ده هو اللي ساب عصابة مبارك شهرين تستف ورقها وآدي دقني إن طلعوا منهم بأبيض ولا إسود، الهدوء ده هو اللي خلى المتهمين بقتل الشهداء يترقوا بدل ما يتحاسبوا، الهدوء ده هو اللي خلى التجار يغلوا الأسعار على الغلابة لحد ما بقوا بيلعنوا في الثورة والحكومة سايباهم وعمالة تقبض على المعتصمين عشان عايزين حقوقهم وعايزة تدفعهم 10,000 جنيه، الهدوء ده هو اللي خلى الحد الأدنى للأجور يصفصف على 700 جنيه بعد ما كان الناس بتطالب ب1200 جنيه اللي هم مابقوش كفاية أساساً، الهدوء ده هو اللي خلى عندنا ألف مفقود، معتقل أو شهيد، ألف، عارف يعني إيه ابنك أو أعز أصحابك يبقى مفقود مش عارف له طريق، مش لاقي له جثة عشان قلقك ينتهي وتبدأ مرحلة الحزن؟ عشان ظباط واطيين وطب شرعي متواطئ مش عارف ياخد منك عينة ويقارنها بالجثث اللي عنده أو حيلاقوها!

البلد دي لازم تنضف، دم الشهداء بدء يطهرها واحنا لازم نكمل، يمكن دي حكمة ربنا إننا لسة عايشين، إننا نطهر البلد من البلاوي دي، القتلة مايبقوش حاكمينا، يبقوا في السجون، الحرامية يبقوا في السجون اي حد ماعندوش ضمير مايمسكش منصب مهم ومصيري، دم الشهيد غالي، وماينفعش يروح هدر.

أما أيتام مبارك ونظامه اللي عايزين يقتلوا الثورة بأي طريقة أو اللي بيتبعوا نفس سياسات مبارك، ربنا ينتقم منكم، ربنا ينتقم منكم، ربنا ينتقم منكم، ربنا يخرب بيوتكوا زي ما إنتوا مش حاسين بخراب البيوت اللي نظام مبارك عمله، ربنا يحرق قلبكوا على عيالكوا زي ما الظباط اللي بتدافعوا عنهم قتلوا عيالنا وماتحاسبوش، حرمت عليكوا عيشيتكوا ياللي بتقولوا على أطهر ثورة في تاريخ مصر 25 خساير، مصر حاتقوم من غيركوا، ومهما حاولتوا ترجعونا لورا لازم تعرفوا إن اللي واجه الموت مش حيخاف من أي حاجة تانية، احنا خلاص كلنا مستنيين الشهادة، يا ننتصر ومصر تعلى يا نستشهد.

لغز الشهداء التسعة عشر

2011-06-11T13:29:00.003+02:00

هي مش بس لغز، هي مهزلة. إذا كان نظام مبارك كان بيقتل بعض المصريين عمد ويستهتر بحياة الباقي فماينفعش ده يكون موقفنا بعد الثورة. فجأة وبدون مقدمات اكشتفنا يوم الأربع 8 يونيو إن في 19 شهيد مجهول الهوية حيتدفنوا تاني يوم وتشيع جنازتهم من مسجد السيدة نفيسة.

كده وبدون مقدمات، وماحدش فهمنا مجهولين إزاي؟ يعني هم الحمض النووي بتاعهم موجود وحالتهم على الأقل لما وصلوا مشرحة زينهم كانت تسمح بالتعرف عليهم، يبقى مجهولين إزاي؟ أصلاً أنا مش متخيلة إن يبقى في شخص "مجهول" في مصر ده حتى لما يبقى في شحات في منطقة بيبقى الناس عارفينه وياخدوا بالهم لو مختفي.

جه يسري فودة كلم ماجدة هلال نائب رئيس مصلحة الطب الشرعي بيسألها الشهداء حكايتهم إيه؟ وساعتها كانت الكارثة: الشهداء كانوا جايين بلبس السجن.

كارثة ما بعدها كارثة، مساجين يتقتلوا وماحدش عارف مين قتلهم وماحدش عارف أساميهم؟ لأ احنا طيبين بس مش عبط. لأ وإيه، جه كمان واحد يا عيني مش لاقي ابنه من يوم 29 يناير سأل عليه في الطب الشرعي كذا مرة وماحدش أخد منه عينة عشان يقارنها بجثث الشهداء!!!

اسئلة كتير قوي لازم تتسأل وكل سؤال وراه كارثة. لو الشهداء دول مساجين، إزاي مالهمش سجلات؟ 100% ليهم، ومش صعب إنك تدور في السجلات وتعرف مين موجود ومين مش موجود، إزاي الطب الشرعي يبقى عارف إنهم مساجين ومايعرفش أساميهم من مصلحة السجون؟ ولا يفهمنا ماتوا إزاي؟ ولا هم سئلوا مصلحة السجون والمصلحة ماردتش، في مجزرة بشعة حصلت واحنا مانعرفش عنها حاجة، وماحدش عايز يقول لنا عشان نفضل نايمين على وداننا بنفكر في فئوية وعذرية وهباب أزرق.

المجموعة التانية من الأسئلة: ماتوا إزاي؟ هل رفضوا الهروب فالظباط قتلوهم زي ما شاهد عيان قال في قسم إمبابة مثلاً؟ هل هربوا ولما لقيوهم اتقتلوا بدل ما يتقبض عليهم؟ هل ماتوا في هجوم على القسم لما بلطجية حاولوا يهربوا مساجين تانيين؟

إزاي كل الأسئلة دي ماحدش يبقى عنده إجابة ليها؟ احنا مش بهايم، احنا بني آدمين ولينا قيمة وكرامة وعايزين نعرف شهدائنا أساميهم إيه وماتوا إزاي ونقدم مين للعدالة لتورطه في المذبحة دي!

فوق كل ده بقى، سجن الفيوم ده هو اللي اتقتل فيه اللواء محمد البطران، ماقدرش ماربطش بين القضيتين. أخت اللواء بتقول إنه اتقتل عشان رفض يهرب المساجين، وماحدش حقق في قتله حسب علمي، وماحدش عايز يحقق، هل اللي قتل اللواء البطران هو اللي قتل المساجين؟ هل حصل اتفاق بين مصلحة السجون والطب الشرعي عشان يفضل لغز ال19 شهيد لغز، ماحدش عارف عنه حاجة؟

واضح إن مشكلة الطب الشرعي مش في السباعي بقى ولا نيلة، المشكلة في غياب القانون والضمير واستمرار دراعات أمن الدولة ونظام مبارك القذر في كل المصالح وأولها الطب الشرعي عشان يخبوا على جرايم.

أنا مش عايزة أظلم حد، بس الموضوع واضح زي الشمس، إزاي مساجين ومالهمش سجلات؟ مين هايجيب لهم حقهم؟ وكارثة تانية لما الدستور نشرت امبارح جواب النيابة للطب الشرعي، فيه خمس شهداء أساميهم معروفة، طب مجهولين إزاي بقى؟

وليه بعد كل الكوارث اللي عمالة تظهر دي الناس معتبرة إن الثورة انتهت ومش مهم نسقط النظام، المهم نبني البلد، نبني إزاي وإنت عندك أساس السوس بيهد فيه؟ نبني إزاي وإنت لو ظابط شرطة قتلك جثتك هاتنتهك وحايقولوا عليك بلطجي وحشاش وعميل لأسرائيل عشان مايجيبوش حقك؟

مين اللي قتل الشهداء؟

رسالة إلى الشرطة والشعب

2011-06-08T00:19:00.000+02:00

من هنا ورايح ماحدش يتقبض عليه من غير إذن نيابة، يا إما نموت كلنا زي خالد سعيد بقى

Khaled Said Graffiti Sprayed on the Ministry of Interior

2011-06-07T15:29:00.001+02:00

On the first anniversary of the murder of Khaled Said, Egypt commemorated it uniquely. This time last year was a time of anguish and anger for all those who saw Khaled's photos and knew the details of his death. This year, and although his murderers are yet to be indicted (or released!) on the 30th of June, the feelings of anger have to some extent turned to hope and determination after the Khaled Said Facebook Page helped mobilised for the revolution.

Sadly, there have been two cases of torture to death after the revolution, and others of policemen shooting detainees despite not particularly being in a threatening situation. Just a show of power, and perhaps vengeance. That's why activists called for a protest in front of the Ministry of Interior at the same time that Wael Ghonim called for the usual silent stands downtown all over Egypt.

The police cordoned off two intersecting streets and at the beginning their numbers were bigger than us. Soon the numbers started to increase and it got interesting when some brilliant Egyptian Banksy sprayed a Khaled Said graffiti in front of the Ministry.

When one graffito passed peacefully, the artist was encouraged to spray it over and over till it filled the facing wall. Dying for some water, I briefly left, and soon heard whistling and cheering sounds. I flew back to find the Khaled Said graffiti sprayed in red ON THE MAIN GATE!

I couldn't help crying, it was like his blood has returned to the ministry to remind them of their crime, though they had probably not forgotten it for a year every second of their lives. Neither did or will we.

الشرطة تنتقم من الشعب

2011-06-04T19:55:00.005+02:00

عملنا لهم إيه ماتفهمش، فاردين دراعتهم علينا ولما نقول أي يقولوا علينا بلطجية وعايزين نخرب البلد. قتلنا عيالهم وهم بيتفرجوا على المظاهرات من البلكونة؟ ضربناهم بالرشاش في وشهم وخليناهم يفقدوا البصر؟ ضربناهم على رف رخام وسور حديد بعد كده قلنا عليهم أصلهم بلعوا لفافة بانجو جابت لهم الكافية؟

نازلين فينا ضرب وشتيمة وإهانة ليه نفسي أعرف. ماحدش يقول لي قانون طوارئ ... قانون الطوارئ بيتطبق على الإرهاب والمخدرات رسمياً يعني، مش بيقول إن المتهمين يتضربوا ويتعروا ويتعلقوا من رجليهم لحد ما يموتوا.

احنا ماعملناش للشرطة حاجة. لو في متظاهرين حرقوا الأقسام وولعوا في المدرعات فده كان رد فعل لسنين طويلة من المهانة وقلة القيمة.، مش فعل في حد ذاته. أنا مش باشجعه لكن بأقول إن في سبب والشرطة هي اللي بادئة.

وعليه أيها السادة مفيش حاجة اسمها المتهمين أو الأبرياء يستاهلوا يتضربوا ويتهانوا بالشكل ده في الأقسام، تصرفات الشرطة كانت سبب رئيسي في الثورة، ومهما حصل مش هانسمح لهم بالوساخات دي تاني. الشرطة تنزل تهاجم على البلطجية زي مأمور الموسكي وتنقذ إعلامية من التحرش في التحرير ماشي، ده دورهم واللي بيأدي دوره مش هانيجي جنبه، لكن اللي يموت ناس من الضرب إن شالله يكونوا أعتى المجرمين مالهمش مكان في مصر بعد الثورة ومايستاهلوش مليم من الميزانية.

مش كل ما نلاقي واحد فلفص في القسم وكان داخل على رجليه خارج جثة مليانة سحجات الناس تقول عليه اصله أكيد غلط في الظابط، أصله أكيد بلطجي، أصل لازم الشرطة تبقى حازمة، دي حرمة أموات ولازم تفكروا ألف مرة قبل ما تشوهوا صورة واحد ميت، وبعدين الإحساس نعمة يا أخي ... السواق لو غلط في الظابط أو شتمه يتحول لمحكمة الجنح وياخد اللي فيه النصيب حبس أو غرامة، لكن مايفضلش يتضرب الله أعلم كام ساعة لحد ما يطلع في الروح. عمرك اتضربت قبل كده؟ عارف قد إيه بتوجع؟ عمرك مسكت سلك عريان لمدة ثانية بالصدفة؟ فاكر وجعك قد إيه؟ في أي بني آدم يستاهل يجرى له كده لأي جريمة ارتكبها؟

وبعدين هي الشرطة دي يا تختفي من الساعة 6 حتى عساكر المرور مانلاقيهاش يا إما ترجع تضرب في الناس، لا معلش ده كان زمان يا باشا، أنا مبسوطة جداً إن الناس تظاهرت قدام القسم وقلبوها ليلة سودا على دماغهم، يقولوا عليهم حاولوا يقتحموا بقى مايحاولوش، قبل ما تلوموا الناس إسألوا نفسكوا إيه اللي يخليهم يضطروا ياخدوا حقهم بدراعهم، إيه اللي يخللي جريمة عليها كذا شاهد بقى لها سنة بحالها تتداول في المحاكم ولسة الحكم 30 يونيو. وجرايم تانية واضحة زي الشمس واتقدم فيها بلاغات ولا حس ولا خبر.

لا يا باشا، البلد دي هاتنضف يعني هاتنضف، هاتيجي تقبض على البلطجية وتحسسنا بالأمان أهلاً وسهلاً، هاتضرب البلطجي ده في القسم لحد ما يموت يبقى هاتتجرر في المحاكم زي إسلام نبيه وأكرم سليمان والبلطجي الكبير العادلي وغيره.

يوم الاتنين وقفة احتجاجية قدام وزارة الداخلية في لاظوغلي

المتظاهرات أشرف ناس فيكي يا مصر

2011-06-02T17:36:00.003+02:00

حالة من القرف والغثيان وقلبان البطن والاكتئاب والإحباط صايباني من ساعة ما عرفت بموضوع إجبار المتظاهرات على كشف عذرية وضربهم وكهربتهم وكسر عينهم و"تأديبهم" بسبب التظاهر. والموضوع زاد سواد لما طلع ظابط رفيع المستوى يعترف لشهيرة أمين بكل بساطة ويدافع كمان عن الجريمة دي. في فرق كبير بين واحد جاهل صايع ضايع بيغتصب واحدة عشان يكسر نفسها ويحس بقوته وبين ناس المفروض إن واجبهم حماية الوطن يصوروا بنات وهم عريانيين ويغتصبوهم بالشكل ده، أيوة اغتصاب الاغتصاب ليه أشكال كتيرة غير الشكل المعروف.

قرف وإحباط وصدمة شديدة في الشرطة العسكرية. يا رب أنا مش عايزة أعيش في دنيا الناس بيعملوا كده في بعض، أنا فعلاً مش عايزة حياتي، ليه ماتخدهاش وتديها لأي حد محتاجها؟ أي حاجة باعملها مالهاش معنى وكل ما الواحد يحس إن في أمل ييجي خبر زي ده يضربه بشاكوش فوق دماغه.

بس من ساعة الثورة وأنا بحاول أبص على الجانب الإيجابي في كل اللي بيحصل؛ الفرق دلوقتي إن البنات اتكلمت، ماسكتوش خوفاً من "الفضيحة" والكلام الفارغ ده، وزي ما هيبة الديكتاتوريين اتكسرت في بلادنا العربية كلها أتمنى ييجي اليوم اللي أوضاع البنات تتحسن فيه خصوصاً في جرائم الاغتصاب وهتك العرض. البنات ماسكتتش وقدموا بلاغات رغم إن ماحدش عمل حاجة والمجلس نفسه وعد إنه يحقق في البلاغات دي ولسة ماوصلناش لحاجة وخايفة مانوصلش، بس البنات ماسكتتش، وده أهم مكسب لينا دلوقتي، مفيش حد يستحق هتك العرض ومفيش أي فرد فوق القانون.

Military Council Still in Denial Over Virginity Tests

2011-06-01T11:58:00.002+02:00

Heedless of the worldwide scandal that has been confirmed by an anonymous army officer yesterday, the military council was quick to deny any forced virginity tests were carried out on female protesters.

Sadly, this attitude is not exclusive to the military. Many of those who knew about the torture cases do not want to believe it happened. To wide ranges of Egyptians, the army is still revered as heroic; myself included, until I was horrified by the torture cases that have been confirmed by various reputable sources. So it is unclear to me if the perpetrators will ever face trial, being denied by the military and silently supported by many of the public.

Our issues with the military council do not only extend to its lax reform policies but also to its repeated crimes of torture against protesters. This is a revolution for our dignity, much more than being that for political and economic reforms. We did not brace the bullets, the thugs and being mowed down by police cars so that we will later be punished by those we revere. It is appalling and it is disgusting.

الجيش كشف على عذرية البنات

2011-05-31T12:10:00.006+02:00

تحديث: يعني إيه كوك زيرو؟ يعني الصحف العالمية كلها تنشر الخبر والمجلس بتاعنا لسة بينكر ومش عايز يفتح تحقيق

الخبر على الإندبنت

الخبر على الجارديان

الخبر على سي بي إس

مين اللي بيشوه سمعة مصر؟ مين اللي مخوف السياح؟ مين اللي موقف عجلة الإنتاج؟ مين اللي موقف حال البلد؟

_____________

الجيش كشف على عذرية البنات

اتعودتوا على الذل ولا لسة؟ أقول تاني؟ ماشي

الجيش كشف على عذرية البنات

باعتراف لواء في الجيش على السي إن إن يا مرسي

بناتك اتكشف على عذريتهم يا مرسي ومن مين؟ بلطجية؟ أمن دولة؟ هأو

من الجيش اللي هو والشعب إيد واحدة

إيد واحدة بتبعبص في عذرية البنات

اتفووووووووووووووووووووووووووووووووووووووووووووووووووو

إياك حد يقول لي ما يمكن مش بنات كويسة، اتفو عليكوا إنتوا كمان مفيش أي حد يستاهل يجرى له كده نهائي، الثورة دي قامت عشان كرامتنا مش عشان عذريتنا

يعني البنات الجدعة اتكلمت على البهدلة وقلة القيمة اللي الجيش عاملهم بيها وماحصلش حاجة، عشان كنا بنكلم بعض

إنما لازم الموضوع يوصل للسي إن إن عشان نتنيل نعرف الحقيقة، أنا مصدومة، عارفة من زمان بس مصدومة، كان نفسي يكون كابوس، طلع حقيقة

وحياة أمي ما حايحكمنا عسكر، واللي يمد إيده علينا بعد كده هنقطعها له

ده طالع بيسب في شرف البنات المتظاهرات ويدافع عن الجريمة دي بدل ما ينكر كالعادة أو يقول احنا آسفين على التجاوزات دي ويحققوا فيها!

تضامناً مع حسام الحملاوي وريم ماجد

2011-05-30T18:09:00.002+02:00

مطلوبين بكرة في النيابة العسكرية بدون تحديد سبب

وفي وقفة قدام مجمع النيابات العسكرية س28 بالقرب من موقف الحي العاشر

وتقديم المدنيين لمحاكمات عسكرية لازم ينتهي فوراً وإلا مش هانشم ريحة الديمقراطية

حسبة بسيطة

2011-05-30T17:14:00.002+02:00

عدد أقسام الشرطة في مصر 350 قسم تقريباً

وعدد أفراد الشرطة الرسمي على الأقل 450 ألف فرد

يعني 1300 فرد للقسم

مش عارفين يحموا الأقسام؟

ردوا إنتوا

مطالب 27 مايو عشان نبقى واضحين

2011-05-24T21:10:00.002+02:00

اولا: المطالب السياسية

1- تقديم مبارك للمحاكمة بتهمة الخيانة العظمى، على اثر اعتراف المشير بإعطاء مبارك الامر للقوات المسلحة بقتل المتظاهرين

2- اشراف قضائي وحقوقي على جهاز الامن الوطني ومحاكمة كل الضباط المتورطين في قتل المتظاهرين وتعذيبهم
3- حل جهاز الامن المركزي او ادماجه في الجيش انشالله يشتغلوا مزارعين
4- اقالة يحيى الجمل ومحاكمة عمر سليمان في ليلة واحدة بقى، هي ايه الحكاية؟
ثانيا: المطالب الاقتصادية:
1- وضع حد ادنى واقصى للاجور واعادة توزيع الثروات لانقاذ البلاد من الازمة الاقتصادية والتحكم في الاسعار
2- فرض الضريبة التصاعدية
3- محاكمة كافة رجال الاعمال الفاسدين ومصادرة اموالهم
ثالثا: الحريات
1- الغاء احالة المدنيين الى قضاء عسكري
2- اعادة محاكمة كل المحكوم عليهم باحكام عسكرية بعد تحويلهم الى المحاكم المدنية
3- حظر فض الاعتصامات بالقوة بشكل كامل

بالنسبة للي حاطين مطلب مجلس رئاسي أول مطلب، ارجوكوا اركنوا الموضوع ده على جنب دلوقتي، احنا اتخزوقنا في الاستفتاء وعايزين دلوقتي نركز على الانتخابات وننتخب اللي عايزينه ونخلص من الجيش في أسرع وقت. وده مطلب عليه خلاف، واحنا مش عايزين أي حاجة تفرقنا، سبب تنحي مبارك إن كل الثوار كان مجمعين على ضرورة رحيله، ماحدش منهم قال خلاص يا جماعة خلوا الدنيا تمشي - اللي كانوا بيقولوا كده مش ثوار والحمد لله موقعة الجمل وضحت الأمور للي ماكانش واخد باله طول التلاتين سنة.
ومش من حق ائتلاف شباب الثورة يقول لنا نمشي الساعة 6 بالليل كأننا في عرض سيما، ومش من حق حد يقول للناس مايعتصموش. لو ناس اعتصموا قلبي حيبقى مخلوع عليهم من الجيش بس من حقهم ولو اتخلينا عن الحق ده حانرجع لأيام أسوأ من أيام مبارك.

سيبوا الشهداء يتهنوا في تربتهم

2011-05-23T00:37:00.005+02:00

قطع لسان اللي يقول نص كلمة على الشهداء ... النهاردة نزل خبر تحويل أوراق أمين شرطة هربان للمفتي لاتهامه بقتل عشرين متظاهر في الزاوية الحمرا وإصابة 15 تانيين، اتفرجوا بقى على التعليقات.

قال إيه اللي بيهجموا على الأقسام بلطجية مش شهداء. أولاً بالنسبة للزاوية الحمرا إنتوا عرفتوا منين إنهم بلطجية؟ مش دول موتى؟ بتتكلموا عليهم ليه؟ منجمين حضراتكوا عشان تعرفوا إنهم كانوا بيهاجموا القسم؟ يعني أنا أول مرة اسمع الكلام ده كان من ظابط شرطة على الفيسبوك فقلت عادي مخه على قده، والعيسوي قال إنهم باغين باين، قال يعني ماعندوش بدل رقص وجلادين وقتالين قتلة في وزارته لحد هذه اللحظة.

خير بقى ... الكلام الوسخ هيبدأ يطلع على الشهداء كمان؟ هاتكرروا اسطوانة خالد سعيد اللي في الآخر ساعد في قيام الثورة؟ كل شهيد دمه أطهر من دمكوا ودم جدودكوا وجدود جدودكوا من الألف إلى الياء ياللي بتتكلم عليه من غير ما تعرفه ولا تعرف مات إزاي. يعني ده منظر بلطجية يا ظلمة؟

مريم مكرم نظير، كانت واقفة جنب قسم الزاوية الحمرا بتصور المجزرة اللي بتحصل، استشهدت برصاصة في الراس

انتوا نسيتوا تقرير لجنة تقصي الحقائق؟

المستشار بيقول إيه؟ بيقول الظباط اللي استشدوا استشهدوا على إيد بلطجية مش ثوار، وفي فرق بين واحد شاء حظه العثر إنه يبقى أمين الشرطة بتاع منطقته جزار زي مريم وبين ناس رايحة تتهجم على القسم قاصدين، وحتى في الحالة دي القانون بيقول يضربوا على الرجل، مش على الراس. بلاش حاجتنا للأمان تخلينا نتوحش ونقول إيه يعني بلطجية وماتوا.

والمجازر دي اتكررت حوالين اقسام الزاوية الحمرا والدرب الأحمر وبني سويف والوادي الجديد والنهضة وحدائق القبة وعين شمس وشبرا والمطرية وإمبابة ودار السلام (المعادي)، طلعوا يقتلوا في كل الناس بدون اي تمييز ولا رحمة، وقتلوا ناس ماكانوش شايلين عصيان حتى.

إلهي تنتص في أمين شرطة معاه مسدس طائش ياللي بتهاجم ناس أحياء عند ربهم ومايقدروش يدافعوا عن نفسهم، قادر يا كريم.

First Death Sentence in the Egyptian Revolution

2011-05-22T22:23:00.004+02:00

An Egyptian court handed today its first death sentence in absentia to a low-ranking policeman who was accused of killing 20 protesters and bystanders on the 28th of January during the Egyptian Revolution.

According to this report by Al-Ahram published on the 11th of March, Al-Zawya Al-Hamra, a working-class area in Northern Cairo, witnesses protests on the fateful January 28th as in many areas and cities around Egypt. It was the bloodiest day in the Revolution and so was it in Al-Zawya. Some of the martyrs were killed by said policeman and others were killed in the neighbourhood watch groups created to safeguard areas in the absence of policemen.

Mariam Makram Nazir, 16, was shot in the head while videotaping the protests. Sherif Shahat, 27, ventured out of his house to replace his motorcycle in a safe place. He was immediately shot and killed.

The martyrs were thus not trying to storm the police station as some people claim ... and even in that case policemen are only allowed to shoot rioters in the leg, and definitely not in the head, according to Egypt's laws. So some commentators' claim that they deserve to die because they tried to storm police stations is appalling and outrageous.

I fully support the death penalty in only two cases; premeditated murder and rape. The agony and grief the martyrs' families must be feeling could only be slightly absorbed with justice. I hope they find him soon and may all the killers be hanged and burn in hell.

فلنعفو عن مبارك وحرمه

2011-05-17T19:20:00.003+02:00

على شرط يعيشوا في الدويقة، ويتعالجوا في مستشفى عام، ويشربوا من مياة الحنفية وياكل عيش مدعم، وياخد معاش 150 جنيه، ويتعمل لهم حفلة استقبال في قسم بولاق الدكرور، وابنه يتقتل في ميدان التحرير بالرصاص، وناخد موافقة الشهداء

إنتوا فاكرين نفسكوا هاتحرروا القدس؟

2011-05-17T00:45:00.005+02:00

لأ. وماحدش يقدر يحرر القدس غير أهلها. احنا لما حررنا مصر، على الأقل من مبارك، ماكانش في شعوب تانية بتساعدنا مساعدة مباشرة ... احنا اتقطعنا عن العالم واستمرينا نكافح وسط الرصاص. احنا حطينا هدف واضح قدام عينينا وحققناه ...

فدلوقتي لما نيجي نتكلم على القوافل اللي رايحة غزة أو التظاهر قدام السفارة، ماينفعش نقول مش وقته وتعالوا نحل مشاكلنا احنا الأول. في حقايق لازم تبقى واضحة للجميع ... حرية مصر مرتبطة بحرية الوطن العربي، ولو ماخدناش خطوات تدعم الشعوب العربية في ثوراتها وانتفاضاتها حاننتكس نكسة سودا ولا كأنك يا أبو زيد ما غزيت ... مفيش حاجة اسمها بلد تنهض والدول اللي حواليها متضررة، خصوصاً لو كانت متضررة منها زي ما احنا قاطعين عن غزة مياه ونور وأول ما نبيل العربي صرح إن معبر غزة هيتفتح رموه جامعة الدول العربية.

مش ال200 نفر اللي رايحين يزوروا غزة أو يوصلوا مساعدات هما اللي هيضروا اقتصاد مصر ويوقفوا الحال ويحلوا المشاكل! في 79 مليون و999 ألف و800 غيرهم! هو ده المجتمع المحترم، يبقى في ناس شغالة على الجبهة الداخلية وناس بتساعد الدول اللي حواليها وبتبني معاهم علاقات قوية.

وبعدين أنا اتصدمت صدمة عمري في الجيش بقى. طول عمري عايشة حلم أبطال أكتوبر والجندي المجهول، أفوق على ظابط بيقول لمحمد عفت امبارح بعد اعتقاله قدام السفارة الإسرائيلية العلم مش حاينزل لباسك هو اللي هينزل؟ ينفع كده؟ وأفضل طول الليل أحلم إن الجيش موت اتنين واحد منهم راسه انفجرت والتاني رموه في النيل. أكيد مفيش تعميم، لكن زي ما الإعلاميين عمالين يقولوا لنا الجيش خط أحمر، كل واحد في البلد دي لازم يعرف إن كرامة المصري وحياته هم الخط الأحمر الحقيقي. احنا عملنا ثورة مش بس لتحسين الظروف الاقتصادية وإجراء إصلاحات سياسية بس عشان نتعامل بكرامة مهما كانت الظروف ... مفيش أي ظابط يبهدلنا بعد كده بقى هو ماحدش بيتعلم من الثورة يا ناس؟

ومفيش اقتحام حصل للسفارة، بلاش إشاعات مغرضة منك ليه. السفارة في دور عالي وكان حواليها جيوش، المتظاهرين كان بيحاولوا يكسروا الكردون ... وحتى لو الكردون يا حرام نفسيته تعبانة وجاله فراغ أمني ده مايديش الحق لأي حد إنه يهين المتظاهرين أو يضربهم بالرصاص أو يعرضهم على محاكمة عسكرية وكل الهم اللي احنا فيه من ساعة ما مبارك تنحى ده. وعلى فكرة، لو فضلتوا شايفين إن المتظاهرين متهورين ويستاهلوا والكلام العجيب ده إبقوا سلموا لي على المظاهرات من هنا ورايح ... حانرجع أسوأ من الأول لو حجرنا على حقنا في التظاهر.

حاجة كمان بقى خلونا نخلص، مفيش حاجة اسمها تحميل المتظاهرين أمام الزفارة مسئولية عجن الجيش لأي اعتصام أو إضراب بعد كده. الجيش مش محتاج توصية في الموضوع ده. 25 فبراير ضربوا المعتصمين عشان عايزين شفيق يا راجل يستقيل، 9 مارس ضربوا المتظاهرين وكشفوا على عذرية البنات في السجن الحربي، مش عارفة امتى اقتحموا الحرم الجامعي وضربوا الطلاب الجدعان اللي عايزين يشيلوا عميد كليتهم الفاسد، وسمعت كمان، 9 إبريل اليوم الأسود ضربوا كمية رصاص مهولة وعلي ماهر استشهد، متظاهر عادي زي زيك اتقتل وماحدش عايز يفتكره! فالتعامل العنيف من الجيش أو الشرطة مع المظاهرات مهما كانت مش هايجيب أي نتيجة، بالعكس الناس حاتصر أكتر على مطالبها ...

يا ناس هو انتوا نسيتوا الثورة؟!!

ربنا يهدينا ويهديكوا كده ونساند حقوق الشعوب في استرداد كرامتها زي ما بنعافر في بلدنا، ربنا ادالك قدرة تعمل الاتنين والله مش محتاج تبقى رامبو، أو على الأقل ماتهبطش من عزيمة اللي عايز يروح غزة.

القيادي العمالي علي فتوح حر مع إيقاف التنفيذ

2011-05-07T15:40:00.008+02:00

النهاردة علي فتوح رئيس النقابة المستقلة لهيئة النقل العام اتعرض على المحكمة في مجلس الدولة، وأخد تأجيل ل4 يونيو، بس إن شاء الله الموضوع حايعدي على خير. علي فتوح بيقول إن رئيس مجلس الإدارة في هيئة النقل العام صلاح فرج قدم بلاغ ضده عشان مقال اتنشر من سنة 2005 فتوح بينتقد فيه أوضاع العمال وحال مستشفى هيئة النقل العام، وبيقول لي إن المستشفى دي الناس بتخرج منها عيانين زيادة، وعامل تاني قال لي المستشفى آخرها مسكنات ومضادات حيوية مافيهاش علاج ينقذ العاملين نهائي ... طب ليه من 2005 وقدم البلاغ دلوقتي؟ عشان العمال خرجوا عن "طوعه" وقرروا يأسسوا نقابتهم المستقلة بعد الثورة. ده التفسير الوحيد للي بيحصل.

ده غير إن العامل مرتبه ضئيل، 650 جنيه بعد 25 سنة شغل، وبيشتغلوا تقريباً 12 ساعة في اليوم، وسمير رضوان نزل لهم مكافأة 100 جنيه في الشهر لكن زي ما العمال قالوا لي مجلس الإدارة حجبها عنهم بشرط إنهم يشتغلوا 26 يوم في الشهر! وخد من ده كتير بقى أشكال الظلم في مؤسساتنا اللي العمال بدئوا يهدوه واحد واحد.

طبعاً غير أزمة الشركات الخاصة التابعة لهيئة النقل العام، الهيئة عشان عايزة تاخد فلوس من غير ما تدفع باعت الأوتوبيسات والمينيباص لشركات خاصة وعمالين يقضوا على الأوتوبيسات والمينيباصات القديمة، يبقى الأوتوبيس عايز صيانة والعمال يشتكوا يقولوا لهم مفيش فلوس.

العمال كمان قالوا لي حاجة أحب أهديها لدعاة كفاية كده خربتوا البلد، لما بيضطروا يعملوا إضراب بيبقى آخر حل عندهم، وبيتضرروا وبيتخصم من حوافزهم في اليوم ده، العمال خايفين على البلد ومش معقول إنت حتخاف على رزق عيالهم أكتر منهم، حضرتك خايف وهو خايف، لكن هو شايف الظلم بيعينه وشقيان ودراعه ملوي، نفس الموقف اللي كنت هتاخده لو كنت مكانه.

علي فتوح قيادي عمالي ... مش بلطجي

2011-04-29T03:39:00.006+02:00

الله يسامح اللي كان السبب في تقليب الناس على الاعتصامات والإضرابات العمالية بين يوم وليلة ... نسيوا إن العمال هم اللي بدئوا انتفاضة المحلة 2008، وهم اللي علموا المصريين يعني إيه تاخد حقك لما موظفين الضرايب العقارية فضلوا بايتين في الشارع حوالي 3 أسابيع لحد ما الحكومة اضطرت تزود مرتباتهم الهزيلة 3 أضعاف، والعمال هم اللي قاموا بمعظم الوقفات الاحتجاجية في الفترة اللي قبل الثورة.

هو إيه لازمة المقدمة دي؟ هو أنا فعلاً محتاجة أوضح لكوا إن العمال هم عصب الوطن؟ ولو وقعوا زي ما مبارك حاول يعمل الوطن يقع؟ محتاجة أفكركوا إن معظم اللي كانوا بايتين في التحرير في عز البرد ودافعوا عن الميدان بضراوة في معركة الجمل كانوا عمال مسافرين من المنوفية والشرقية والمنصورة وسينا وأسوان عشان يسقطوا النظام الحقير اللي كان ماسكنا؟ محتاجة أفكركوا إن العمال، خصوصاً عمال هيئة النقل العام اللي موضوعنا دلوقتي، أعلنوا إضراب عام عن العمل في آخر 3 أيام في عهد مبارك وجابوه الأرض؟

يبقى نرد لهم الجميل دلوقتي، ونرده لنفسنا كمان، مش نسكت على القانون العجيب اللي اتمرر في الخباثة كده مفاده تجريم الاعتصامات والإضرابات العمالية. مش كفاية ناس، ناس كده، من ساعة ما مبارك سقط، وهم عمالين يحاولوا يكممونا ولا كأننا ثايرين وعايزين حقوقنا وعايزين عدالة اجتماعية دفعنا تمنها من لحمنا ودمنا وأرواحنا، كمان أصدروا قانون تجريم الإضرابات؟

وماحدش يضحك عليكوا ويقول لكوا أصل الإضرابات تعوق العمل، يعني لو واقفة في جنينة عايزة حقي ممكن أتحبس سنة عشان الجنايني كان عايزة يشتغل ساعتها؟ أو لو واقفة على الرصيف زبال يعوز يكنسني ويشتكي لناس، ناس كده، إنه مش عارف يشتغل، أقوم أدفع كام ألف غرامة؟

وماحدش يضحك عليكوا برضو ويقول لكوا إن البلد اقتصادها متأثر ومفيش فلوس دلوقتي وعايزين نشتغل وإن البلد خربانة، داهية إيه السودا دي يا ربي، أولاً البلد فيها فلوس، تلاتة بالله العظيم فيها فلوس، بس لازم يحصل إصلاحات اقتصادية مش محتاجة وقت كبير عشان نحس إن احنا بني آدمين شوية. اسمعوا الأستاذ أحمد السيد النجار رئيس مركز الأهرام للدراسات الاستراتيجية وهو بيتكلم كده وطرطئوا ودانكوا، أو روحوا شوفوه بنفسكوه يوم التلات اللي جاي الساعة 6 في مركز الدراسات الاشتراكية وهو بيعرض كراسة فيها كذا حل لتوفير موارد لرفع الحد الأدنى للأجور وتحسين معيشة الملايين من المصريين. اسمعوه بدل ما تدوا ودنكوا لناس، ناس كده، الله أعلم بنواياهم. على سبيل المثال إيه لازمة إن يبقى في موظف بيعمل أعمال إدارية مرتبه نص مليون في الشهر؟ ده اللي هو ليه يعني بيخترع الذرة؟ أكيد مفيش أي داعي مش كده؟ طب لو النص مليون دي اتوزعت على العمال الكادحين والدكاترة الشقيانين وأساتذة الجامعة التعبانين والمدرسين الغلبانين الأمور هاتتحسن، مش كده؟ قيس بقى الكلام ده على كل المرتبات الخيالية اللي بياخدها المسئولين في مقابل ملاليم بياخدها سواق الأوتوبيس اللي بينقل حضرتك للشغل ولولاه حاتضرب أخماس في أسداس. علاوة يوليو دي بتبقى بالنسبة لهم 5 جنيه، والمرتب 500 جنيه، بعد شهر شقا وتعب وبوظان أعصاب من السواقة طول اليوم.

فعايزين نوصل لكذا نقطة: 1) البلد فيها فلوس، وممكن نوفر لها مليارات تكفي وتفيض لو عندنا رؤية اقتصادية فعلاً

2) العمال تاج راسنا، العمال بفهومهم العام أي واحد بيشتغل بأجر وبياخد مرتبه من القطاع العام أو الحكومة، سواء عامل نظافة أو أستاذ جامعة

3) الإضراب حق وليس جريمة، عايزين تحبسوا واحد عشان عايز يعيش بكرامته؟ احنا عملنا ثورة عشان نتقدم لقدام ولا نرجع لورا؟

جم عمال هيئة النقل العام فرحانين بالثورة اللي رجعت لهم كرامتهم، قالوا ناخد حقوقنا بقى، أسسوا نقابة مستقلة تشوف حقوقهم وطلباتهم، وكان على فتوح هو القيادي ورئيس النقابة المستقلة، لحد ما طلع خبر أغبر امبارح إنه قال إيه حايتعرض لمحاكمة تأديبية بسبب دعوته لإضراب! الكلام ده 7 مايو في مجلس الدولة. أنا مش عارفة هو دعا لإضراب فعلاً ولا لأ ولا "بيعاقبوه" على النقابة المستقلة، بس لو اتحكم عليه في ناس، ناس كده، مش هينبسطوا برد فعل العمال. دول عمال ثورة، يعني مايتلويش دراعهم يا ناس كده!

يوم 26 ابريل انزلوا مع أهالي الشهداء

2011-04-22T20:38:00.003+02:00

يوم الثلاثاء 26 إبريل أول جلسة في محاكمة العادلي ومساعديه في تهمة قتل المتظاهرين ... غالباً هتبقى في محكمة جنايات القاهرة في التجمع الخامس، أرجوكوا ماتسيبوش أهالي الشهداء ينزلوا لوحدهم، كان ممكن نموت بدالهم أو معاهم، عشان كده لازم نساندهم

In Loving Memory of Vittorio Arrigoni

2011-04-15T23:34:00.005+02:00

I met Vittorio at a protest against the proposed Gaza Steel Wall, in Cairo. He was standing quietly holding a banner in Arabic saying: no to the wall of shame. He wasn't trying to grab attention or make a show. We exchanged a few words and I was immediately impressed by his modesty and sense of humour.

A few days later, I was surprised to find that the friendly stranger I met was a famous blogger and author who blogged and reported relentlessly from Gaza to the World, in Italian and English. To him, every Palestinian mattered. To the world, they were just numbers. He spent his time as a human shield with Palestinian fishermen who are randomly shot at by the Israeli navy just for fetching food and a source of living. He danced with the Palestinians, sang with the children, received Israeli fire on their behalf. Throughout Israel's brutal onslaught on Gaza in late 2008-early 2009, Operation Cast Lead, he was one of the few, brave voices who wrote down the madness and delivered it for the world to know.

On every single day, my and 5000 people's Facebook timelines would be filled with a story from Vittorio. He chronicled every single bomb, every death, every smile, every good piece of news that happened in the crowded and impoverished strip. On every single day, he risked being the next Rachel Corrie or Tom Hurndall. To find a Palestinian resisting Zionism is normal and understandable, but to find an Italian national putting his life on the line, leaving behind the relative safety and comfort of family and home, to live in Gaza and support its people in every way possible, is an act of heroism. And Vittorio is a hero.

I have always wanted to write this post, ever since I knew him. For some reason I never did. I did thank him in person for his activism, but he had always rejected any kind of praise. I knew that if I had written this post and showed it to him, he would have never read it. I expected him to die in Gaza, in one of the random missiles perhaps. But he has suffered, he has been singled out and murdered. Maybe this was the only way for him to not be a number, to make him known in more parts of the world, to let his voice, his Palestinian voice, be reached.

Vittorio Arrigoni is killed, but Gaza is not. Palestine is not. Our spirit is not broken. Every brave and just citizen of the world will continue to carry out what Vittorio Arrigoni stood up for; a free Palestine. Vittorio lived, and died, for Gaza to be free. We shall see to that, we promise. We will end the siege and set Vittorio's brothers and sisters free.

الجيش والشعب إيد واحدة؟

2011-04-09T23:51:00.003+02:00

ماحدش كان عايز يوصل للمرحلة دي أبداً، ماحدش نزل من يوم 28 يناير لحد امبارح بهدف الصدام مع الجيش؛ حتى اللي كانوا مش موافقين أو مش فاهمين الجيش بيعمل إيه مستحيل كانوا يبدأوا بالهجوم، حد حايهجم على دبابة أو مدرعة أو 777؟

طيب، دلوقتي مبارك لا مؤاخذة كان عمال يش* في دماغنا وبعترلنا كرامتنا وخلانا نحس بينا وبين نفسنا إننا مانجيش غير بالكرباج عشان نعرف نمشي، وآدي آخرة الكرباج، هو غار في داهية وشهدائنا ماتوا عشان رفضوا الكرباج.

الكرباج نهايته منيلة بنيلة، أتمنى يكون ده واضح للجميع.

ييجي بقى الجيش يعمل قانون تجريم الاعتصامات، ويفض الاعتصام ضد حكومة شفيق اللي مشيت من هنا وأمن الدولة فرموا الورق من هنا، ويضرب طلاب وبنات معتصمين جوة الحرم الجامعي، ويعذب متظاهرين ويكشف على عذرية البنات، ماشي بنفس أسلوب النظام القديم ولا كأن اللي جرى ما كان، ده احنا لسة يا دوب طاقين وخارجين عن شعورنا يا جيش، ماينفعش تكمومنا دلوقتي، لما نبقى قضينا على القيادات الفاسدة وأخدنا مرتبات تعيشنا كبني آدمين إبقوا سيبونا نصوت ومتسألوش فينا، بالنسبة لاعتصام 9 مارس مثلاً إيه الضرر إنك تسيب الناس معتصمين على الجزيرة لا سادين الطريق ولا موقفين الحال؟

طب احنا عارفين إن الجيش مش ثوري ومش بيسمح بالاعتراض، حد قال لكوا تستخدموا مع المعتصمين العنف ده؟؟؟ ليه الجيش يورط نفسه في حاجة زي دي بعد ما كان الناس مستقبلاه بالأحضان والورود...؟

بالنسبة للغز امبارح، الظباط المعتصمين دول احتمال يكونوا فعلاً شايفين فساد في الجيش ومعترضين عليه، إيش عرفنا احنا؟ واحتمال يكونوا مزقوقين واحتمال يكون عليهم أسئلة كتير، ماحدش عارف الحقيقة فين، الحقيقة دلوقتي إن في واحد مات برصاصة في راسه لا ليه في الطور ولا في الطحين، كان معتصم في الميدان لأي سبب، عايز مبارك يتحاكم، عايز يجيب حق الشهداء، عايز يحاكم صفوت الشريف والحيتان اللي لسة مبرطعين برة السجن ولا كأنهم عملوا عمايل، يموت ليه؟ ماكانش في حد من المعتصمين معاه سلاح، ومفيش حد منهم بدأ بالهجوم على قوات الجيش، لكن الجيش نزل لهم بحشود رهيبة وضرب نار رهيب، كل ده ليه يا ربي؟ إنتوا هجمتوا الساعة 3 إلا ربع وأخدتوا الظباط اللي عايزينهم، ماشي ظباط اعتصموا ولازم يتقدموا لمحاكمة عسكرية أنا مش حاتكلم في نقطة ماعرفهاش، أنا حاتكلم في اللي أعرفه، إن ضرب النار استمر لأكتر من ساعتين بعد اعتقال الظباط وشكلهم حيهجموا تاني النهاردة بالليل، إن في واحد مات من غير ذنب واللي قتله للأسف جيش بلده، وفي واحد تاني كان مصاب اتصور فيديو وعساكر الجيش بيضربوا على راسه من غير رحمة تقولش متظاهر إسرائيلي، ليه كده؟

احنا دلوقتي عندنا طرف قوي وهو الجيش وطرف أضعف وهو المعتصمين، مين اللي المفروض يسيطر على أفعاله ويخطط كويس بحيث البلد دي ماتولعش أكتر ما هي والعة؟ أكيد الطرف القوي. ومش كل ما نيجي نفتح بقنا تقولوا لنا انتوا عايزين تفككوا الجيش: إطلاقاً، ويبقى مجنون اللي عايز يدمر جيشه، بس هو في حل تالت غير إننا نبقى عبيد تاني أو أننا نبقى بلطجية: نبقى بني آدمين! حكموا عقلكوا يا جيشنا وبطلوا عنف مع معتصمين سلميين وماتخسروش شعبكوا أكتر من كده!

16 و24 أبريل محاكمة الظباط بتهمة قتل المتظاهرين

2011-04-04T00:43:00.005+02:00

فضوا نفسكوا وافتكروا الأيام دي يوم 16 إبريل أول جلسات محاكمة مدير أمن اسكندرية ومساعديه و24 إبريل أول جلسات محاكمة العادلي وعصابته، إن شاء الله هاننزل أولاً تضامناً مع أهالي الشهداء ثانياً عشان نوضح لناس كده فاكرينا هدينا وشفنا شغلنا إننا ماهديناش ومش هننسى ومش هنسيب حق الشهداء وهنفضل ورا البلد دي لحد ما تنضف

إن شاء الله

وغالباً إن شاء الله صفحة خالد سعيد هاتعمل إعلان قبلها

عرضنا على الجيش الورد ... ردوا بهتك العرض

2011-03-26T23:52:00.005+02:00

تحديث:

طيب أدينا مستنيين القصاص

لما الجيش نزل يوم 28 يناير المصريين استقبلوه بالورود والأغاني وشالوا الظباط على الأعناق بمنتهى العفوية ... وفي نفس الوقت

اللي كان بعض المتظاهرين بيكسروا عربيات الشرطة كانوا بيركبوا على الدبابة ويهتفوا الجيش والشعب إيد واحدة.

قبل التنحي لقيت مقالة الجارديان اللي بتقول إن الجيش ارتكب التعذيب في المتحف وفي السجن، قلت خلاص، من هنا ورايح الواحد يا يعيش مرفوع الراس يا يموت بكرامته، جيش ولا مش جيش

شوية شوية بدأت الأخبار تظهر عن اعتداء الشرطة العسكرية على المعتصمين للمطالبة بإقالة حكومة شفيق وإلغاء قانون الطوارئ وحل أمن الدولة، اكتئبت للغاية، احنا عملنا ثورة عشان نتضرب تاني؟ مفيش فايدة؟

أسوأ شيء على الأقل في نظري هو أخبار اعتقال البنات من التحرير يوم 9 مارس وإجبارهم على الخضوع لكشف العذرية، واتهامهم إنهم مومسات، وكانوا الظباط/ أو العساكر اللي بيعملوا كده في السجن الحربي بيصوروا البنات وهم عريانين. دي التفاصيل اللي أعرفها ومش عايزة أعرف أكتر من كده.

بعد فترة من حالة الإنكار، لقيت الخبر اتنشر على موقع منظمة العفو الدولية والنهاردة وصل لنيويورك تايمز، واتذاع على الجزيرة، وكل ما أدخل على صفحة صحفي مشهور في الوكالات الأجنبية على تويتر ألاقيه كاتب عن الخبر، كل ده والجيش أنكر إن في تعذيب وبالنسبة للبنات مش جايب سيرة خالص في حدود علمي.

دلوقتي أنا رافضة التعميم على الجيش ورافضة لوم المعتصمات بأي شكل من الأشكال، مفيش أي بنت تستحق إنها تتحط في الموقف المهين ده، ده أنا لما حد بيقول لي كلمة في الشارع باكتئب 6 أيام أمال هم ممكن يكون جرى لهم إيه؟ مفيش أي بنت تستاهل كده أبداً، وبلاش حد يسأل السؤال اللي في التحرير هما ليه معتصمين لحد دلوقتي ونظام عبد المنعم مدبولي ده، من حق أي حد إنه يعتصم في أي وقت لأي سبب إن شالله يكون عايز يرجع حسني مبارك وأمن الدولة، واللي حصل ده لازم يتحقق فيه يا جيش، لازم يتحقق فيه عشان كرامتنا وكرامة البنات دي وسمعة الجيش وصورته ماتتهزش أكتر من كده، احنا عارفين إنه في فساد وفي شرفاء وأبطال في الجيش إنما لو القيادة ماحققتش مع الظابط أو العسكري الحقير ده السيئة هاتعم على الجيش كله ... احنا أثبتنا قدام الجيش وقدام العالم كله إننا عندنا كرامة ومانسمحش لأي حد إنه يذلنا، والدليل إن البنات عملوا أول خطوة وهي إنهم يتكلموا ويعرفوا الناس اللي حصل بدل ما يسكتوا كالعادة ... السكوت اللي خلى مبارك وكلابه يركبنا تلاتين سنة. احنا يا دوب خدنا نفسنا كام يوم حرية وكرامة، ماتقتلش مننا 600 شهيد عشان الظباط يبعتروا كرامتنا تاني.

العساكر الحقيرة أو الظباط اللي هتكوا عرض بنات مصر وذلوهم وأهانوهم بالشكل ده لازم يتحولوا للتحقيق بشكل عاجل، عمر ما حايبقى في استقرار طول ما في ظلم.

The Guilt

2011-03-16T02:35:00.006+02:00

I am emotionally unable to deal with the pain of the revolution; the murder of protesters. Protesters and bystanders alike were killed in cold blood by the Egyptian police in all ways you would imagine the cruellest. Obviously the regime thought it could quell the protests and, perhaps in an act of revenge at their failure, proceeded to fire rubber bullets, live ammunition and intentionally hit and run protesters with various vehicles.

Why people have to suffer, bleed and die for me to live, I don't understand. I survived the 18-day protests and sit-ins unscathed, and I feel I have not provided enough for this blessed revolution. Indeed, this revolution is so blessed that nothing short of our lives could possibly be presented to it. I don't deserve having someone die for me. Why did they have to suffer for us to regain our dignity? The revolution is now at stake, what if I one day realise that the dead have gone down the drain? Will I not wish I had been dead too?

Only I am not dead, and I am not alive. I am in some sort of limbo where I fell after the initial euphoria of success has worn off. I do understand cruelty is inherent and I will have to bear it the rest of my fucking life, when I or someone else faces it. In the case of the revolution, it was a collective dream and a collective goal. In my world this means we either live to see it all happen or die together, but this half-way reality is depressing me.

Dismantle State Security تفكيك جهاز أمن الدولة

2011-03-13T23:20:00.004+02:00

مش معقول يكون الفرنجة عملوا عريضة توقيعات عشان يفككوا أمن الدولة بتاعنا واحنا مانمضيش ... إمضوا هنا عشان نفكك الجهاز ومايطلعلناش عفريته، أفاز منظمة معروفة حيبعتوا العريضة للمجلس الأعلى للقوات المسلحة وكان ليهم نجاحات كتير قبل كده يعني ماحدش يستهين بالتوقيع

وبعدين أعتقد الثورة فهمتنا إننا مانستقلش بأي فعل حق ولو صغير، يا مسهل

http://www.avaaz.org/en/dismantle_state_security/?copy

الحرس الجامعي مشي؟

2011-03-01T15:37:00.004+02:00

دلوقتي أنا رحت الجامعة ومالقيتش الحرس الجامعي موجود، لقيت موظفين أمن لكن مالقيتش حد لابس ميري، بس النهاردة شفت رئيس الحرس، هو على طول لابس مدني فأنا مش عارفة هو أصلاً ظابط ولا مدني.

على العموم بما إن النظام صاحي وبيلعب فأنا بأقول لكوا أهو، الأسبوع اللي جاي مع بداية الدراسة هيدخل بلطجية وهيبقى معاهم مخدرات أو أسلحة، وهيخوفوا الطلبة، عشان يخلوا الناس تلعن اليوم اللي الثورة قامت فيه والحرس الجامعي اتشال.

احنا خلاص حفظنا النظام، ماشي بطريقة يا تسيبوني أعك يا إما هطين عليكوا عيشيتكوا، زي كده مبارك لما قال لو مشيت الإخوان هيحكموا واختاروا بيني وبين الفوضى، على اساس إن المليارات المنهوبة والشرطة اللي مش بتظهر غير في المظاهرات دي برضو ماكانتش فوضى.

وبعدين فين أم الشرطة كل ما اتكلم مع حد يقول لي البلطجية بيوقفوا الطريق ويسرقوا الناس، معظمها إشاعات وكلام مبالغ فيه بس يعني هم سايبين البلد من غير حراسة ليه؟ عليكوا نور. بيربونا. بيقولوا لنا إنتوا مش عملتوا ثورة؟ مش مشيتوا مبارك الحصن المنيع؟ إشربوا بقى.

أنا شخصياً مش فارقة معايا عمر ما كانت الشرطة رمز للأمان بالنسبة لي لإن دورهم في الفترة اللي فاتت هو حماية النظام وقمع المعارضة فقط لا غير، لا أمن ولا أمن، مع الاحترام للقلة الشرفاء اللي في الوزارة، الواحد بياخد باله على نفسه وبيسيب الباقي على ربنا.

هو ده سيناريو الأسبوع اللي جاي في الجامعات وهتقولوا وايلد قالت، لازم نفتح مخ الناس كده إن معظم البلطجية اللي بيحركهم الحزب الوطني أو الداخلية (والبلطجية شفتهم بعيني في المظاهرات بياخدوا أوامر من اللواءات مفيش داعي لأي نوع من النقاش في النقطة دي). وربنا يستر.

النظام صاحي وبيلعب

2011-02-26T14:34:00.005+02:00

الواحد مش عارف يبتدي منين ... دلوقتي اللي حصل امبارح في التحرير حتى لو كان تم بدون أوامر عليا من الجيش فهو هز ثقة ناس كتير في فكرة إن النظام سقط، اللي بيقولوا إن إسقاط فلول النظام أصعب من إسقاط مبارك عندهم حق، لإن دلوقتي هدف الثورة مابقاش فرد واحد بقى كذا فرد كل واحد فيهم في جهاز أو مؤسسة أو وزارة مختلفة، وأعداد الفاسدين بالآلاف على أقل تقدير.

ماحدش بقى عارف يتوقع إيه اللي ممكن يحصل، خلونا نتوقع إن المظاهرات تستمر: في الحالة دي ياريت نبطل نغمة "كفاية كده وإدوا للجيش فرصة" هو حد ماسك إيد الجيش وبيمنعه من العمل؟ إحنا عايزين اللي ضربوا الناس بالنار يتحبسوا، مش معقول هتبقى الفلوس أغلى عندنا من دم الشهداء عشان نحبس رجال الأعمال ومانحبسش ظباط الشرطة اللي ضربوا متظاهرين ماكانوش رافعين عصاية حتى. وشفيق قاعد ليه؟ أبو الغيط؟ مرعي؟ ماحدش قال الوزارات تتعطل، يجيبوا ناس مالهمش علاقة بالنظام "السابق" وفي اقتراحات فعلاً، اللي بيقول "هيجيبوا مين بدالهم " بيهينوا مصر معلش يعني، البلد فيها شرفاء كتير.

وبعدين الاعتصامات والمظاهرات ما هي بقى لها سنين شغالة، الناس عايزة تعيش بكرامة الموضوع مش محتاج مفهومية، إيه اللي خلى الاعتصامات فجأة بتوقف الحال؟ إيه وجه تعطيل الحال اللهم إلا عدم استطاعة العربيات إنهم يعدوا من الميدان وقدامهم 100 طريقة تانية، بسيطة مش كده؟ خلاص الي عايز يشتغل بيعرف ينزل واللي عايز يدرس الدراسة بتبدأ وحالة عدم الأمان دي يتسأل فيها قيادات الداخلية مش احنا.

الثورة مش حاجة بسيطة، مش 18 يوم والموضوع خلص، الثورة ثورة دائمة ضد الظلم والقتل والسرقة والفساد، التمن اتدفع خلاص ودم الشهداء غالي، ماتوا عشان اللي يمسكنا يلبي لنا طلبتانا مش عشان يطلع يقول لنا احنا أسيادكوا يا كلاب!

بيان أساتذة الجامعات دعماً للثورة

2011-02-25T04:03:00.003+02:00

بيان

لدعم الثورة وإصلاح الجامعات المصرية

يؤيد الموقعين أدناه من أعضاء هيئة التدريس والهيئة المعاونة البيان التالي :

· التأييد الكامل لمطالب الثورة والسعي للمشاركة في تحقيقها و يوجه التحية لشباب مصر الذين قادوا ثورة 25 يناير الشعبية العظيمة، ويمجد ذكرى الشهداء الذين ضحوا بأرواحهم في سبيل الحرية.

· تأييد البيان الختامي للمؤتمر العام لأعضاء هيئة التدريس ومعاونيهم بالجامعات المصرية الذي انعقد يوم الخميس 17 فبراير بجامعة القاهرة.

ويختص البيان بالتركيز على القضايا الجامعية فيدعو إلى:

اتخاذ خطوات عاجلة للإصلاح تتضمن:

* المنع الفوري لتواجد أفراد تابعين لوزارة الداخلية في كافة الجامعات المصرية سواء تحت مسمى الحرس الجامعي أو أي مسمى آخر تنفيذاً لحكم المحكمة الإدارية العليا

* تشكيل لجنة لتقييم وقائع الفساد والتدخلات الأمنية في إدارة الجامعات ومشروعات التطوير والأنواع المستحدثة من خصخصة التعليم وإعداد تقرير بشأنها لمحاسبة المسئولين

* إلغاء قرارات مجالس التأديب التي إتخذت ضد الطلاب أو أعضاء هيئة التدريس بسبب آرائهم أو مكافحتهم للفساد

* تعيين جميع المعيدين الذين منع تعيينهم بسبب الأمن

* حل مجالس نوادي هيئة التدريس الحالية ومجالس اتحادات الطلاب وإجراء انتخابات حرة لتشكيل مجالس جديدة

· يقر البيان بعض المبادئ العامة لقانون جديد للجامعات يتضمن:

· التأكيد التام على استقلال الجامعات وتحديد معناه.

· تجريم الاعتداء على الحريات الأكاديمية.

· منع كافة التدخلات الأمنية في الجامعة.

· تحديد دور المجلس الأعلى للجامعات بما لا يتعارض مع استقلال الجامعات.

· قصر دور وزارة التعليم العالي على كونها حلقة وصل بين الجامعات والحكومة.

· إقرار مبدأ ديمقراطية الإدارة شاملاً:

· انتخاب جميع القيادات الجامعية ووضع نظام جديد للانتخاب.

· توسيع سلطة المجالس الجامعية وبالذات مجالس الأقسام.

· إقرار مبدأ الشفافية والإعلان عن كافة الميزانيات والمصروفات بتفاصيلها، ووضع نظام للرقابة الجامعية على الصناديق الخاصة والمشاريع.

· التمثيل الواسع لكافة أعضاء هيئة التدريس والهيئةالمعاونة في سلطات اتخاذ القرار.

· إقرار جدول عادل للمرتبات وفصله عن القانون.

· فصل "ربط جودة الأداء" عن زيادة المرتبات مع التزام هيئة التدريس بواجباتهم.

· وضع نظام كريم للرعاية الصحية والاجتماعية لأعضاء هيئة التدريس والهيئة المعاونة ولمن هم فوق سن السبعين وذويهم.

· توفير إقامة كريمة لأعضاء هيئة التدريس والمعاونين من المقيمين خارج القاهرة الكبرى.

· احتساب مدة إعداد رسائل الماجستير والدكتوراة للمعيدين والمدرسين المساعدين من تاريخ التسجيل وليس التعيين مع وضع ضوابط يقرها مجلس القسم استرشادا برأي المشرف.

· استقلال الاتحادات الطلابية ونوادي هيئة التدريس.

· المطالبة بانشاء نقابة لأعضاء هيئة التدريس ومعاونيهم.

وندعو الزميلات والزملاء لنقاش واسع حول تطوير التعليم والبحث العلمي وبحث أحوال الجامعات المصرية.

2011-02-14T00:47:00.007+02:00

Blogging now from a free Egypt ... you could feel it instantly as soon as Omar Brother Muslimhood Suleiman announced Mubarak's resignation on Friday 6 pm. Cries of joy ripped our house and when I ran to the bedroom female neighbours were uttering trills of joy ... Mubarak is gone. The air got fresher, the sun got warmer and the food I had tasted a hundred times tasted better, dignity having been added to the recipe.

No one expected the protests to eventually turn into a revolution. Putting political anaylisis aside, no one expected it to be as joyful and civilised as it is. Of course, the first ten days were as bloody as it could get with the police forces and later businessmen and police-backed thugs employing each and ever weapon from gunshots to stones against protesters. The ensuing days in Cairo, on the contrary, were full of hope, perseverence, festivities, pride, uncertainty, anger and anticipation all in a bucket.

I am talking about Tahrir Square which, because of its size and the number of Cairo's inhabitants, garnered the lion's share of attention. I cannot really put into words how it felt like to be in the Square ... I felt like I was among my family of one million people and that we were all sharing our sorrows and happiness. At one point you would find a group forming a march and chanting, insisting that Mubarak steps down. And no it is not a youth movement; it's not even a movement. In Tahrir women of all ages also led the chants or spent the night in tents in the chilling cold waiting for the tyrant to leave. In Tahrir children were chanting "Down with Mubarak!" spontaneously without any guidance. In Tahrir you could overhear an old man saying "Thank God I lived to see this day", even before Mubarak resigns, and a woman saying "the children chanting down with Mubarak ... those children will have no fear anymore". In Tahrir there was music and prayer, hysterical laughter and heartfelt tears whenever a martyr's mother or father passes around unconsciously holding his son or daughter's picture. In Tahrir everyone gave the other food, a hand, medicine, a kind gesture, a laugh, a cry of empathy or very accurate political analyses.

A few days before the revolution, I reached the conclusion that I do not believe in democracy. That even in democratic nations, a million and a half people could protest against late retirement law and the law could still be passed. That you do have the power to choose whom to rule you, but that in any case this ruler is going to provide other countries with weapons to kill their people. I am still not expecting everything to get better, but in Egypt, we all rediscovered ourselves. I now know that integrity dictates that I stick to what I believe is right, and that one day, I will win, no matter how much pain I have to go through, I will win. I now do not care if my economic conditions do not thrive for now, I have paid for my freedom instead, and freedom is incomparable to anything in the world.

All of Egypt has survived this brutal onslaught from an oppressive regime much stronger and more determined than ever to regain their rights and build the basis of an Egypt with less corruption, poverty and ignorance. They all now have the answer to their miseries: faith and strength.

FREEDOM!

2011-02-12T02:10:00.002+02:00

VICTORY IS OURS! MUBARAK IS DONE FOR! WE ARE BREATHING FREEDOM!