النائب السلفي وطيور الظلام

السلفيين انكشفوا وبانوا وكسفوا الإسلام معاهم، بيتاجروا بالدين وواخدينه ستار عشان يعملوا عمايلهم السودا، بقى لهم 5 شهور في البرلمان ماعملوش حاجة الدقون المنافقة دي...وييجوا كمان يعملوا فعل فاضح في الطريق العام وعايزينا نسكت لهم؟ .

طبعاً دي المقدمة اللي ناس كتير تحب تقراها هنا، معلش عليكوا واحد.

فجأة وبدون سابق إنذار البلد مابقاش ليها شغلانة غير نائب مجلس الشعب من حزب النور، واتنشر إنه كان في وضع مش مظبوط مع بنت.

وعينك ما تشوف إلا النور يا مؤمن، الناس كلها نشرت اسم النائب واسم البنت كأنهم كلهم شافوهم بعينيهم وهم لا مؤاخذة بيعاشروا بعض، والنيابة طبعاً زي ما احنا عارفين زي الفاروق عمر، أول ما شمت خبر إن حد من حدود الله انتهك نزلت فوراً تشوف شغلها وحبسوا البنت 15 يوم (البنت بس ها)  وقال إيه النيابة عايزة تعمل لها كشف عذرية، وطبعاً لا ننسى دور الشرطة الباسلة اللي ظبطت النائب في هذا الوضع الخطير، ودور الشرطة في حماية وحفظ الأمن العام.

نبدأ التهزئ واحدة واحدة:

الإعلام: انتوا أوساخ، إلهي تولع الفلوس اللي بتشوهوا صورة الناس أو بتفضحوهم عشانها، بس

الشرطة: اللي بتعملوه في الناس بيطلع عليكوا على فكرة، اصبروا بس بكرة تلاقوا سيرة ستاتكم على كل لسان

النيابة: أقولها ازاي بس؟ مفيش حاجة اسمها كشف عذرية، طبياً مفيش حاجة اسمها كشف عذرية، البنت بتحتفظ بجزء من غشاء البكارة ، حتى بعد المعاشرة، ودي حاجة ماتتعرفش بالنظر. السؤال الأهم انتوا مالكوا؟ انتوا مالكوا؟ يعني إيه بنت كانت راكبة عربية مع واحد يتعمل لها كشف عذرية، حتى لو فعلاً كانوا في وضع حميمي؟ انتوا مالكوا؟ مين اللي ادالكوا الحق تتعدوا على خصوصية وجسد بنت بالشكل ده؟ الرويني وعتمان والسيسي وأحمد عادل الموجي طبعاً ودي فيها كلام. 

الناس: الناس اللي هو حضرتك، أيوة حضرتك اللي خبطت شير على الخبر من غير ما تفكر، اللي نشرت اسم النائب واسم البنت وتفاصيل الخبر كأنك شفتهم بنفسك في صالون بيتهم...مفيش مخ؟ فجأة بقينا نصدق الشرطة بتاعة مفيش قناصة ومفيش خرطوش؟ فجأة بقت أعراض الناس وسمعتهم لعبة ممكن تدمرها في ثانية وانت مش واخد بالك؟ وعايزين الثورة تنجح؟ خسارة فيك ميت ثورة يا شيخ! أنا مش هاعمل فيها الشريفة الخضرا وأقعد أنصح...بس اللي مش شايف إن الحادثة دي وتضخيمها بالشكل ده ليها هدف من اتنين: تصفية حسابات مع النائب ده بالذات، أو مع البرلمان ككل عشان الناس تفقد الثقة فيهم فيقبلوا في أي حل يقدمه العسكر، يبقى أعمى. هو مش ربنا أمر بالستر يا شعب يا مؤمن؟ ولا هو الفراغ وحش قوي كده؟

بقينا سويسرا وخلاص المشاكل كلها اتحلت ومش فاضيين غير للفضايح؟ هانفضل نرجع لعصور الظلام كده لحد امتى؟ أنا ماليش دعوة النائب عمل إيه وماعملش إيه، ماليش دعوة خالص، الكابوس بالنسبة لي هو ناس عندها استعداد تصدق الشرطة اللي قتلوا ألف  شاب وخدوا براءات وتنشر أخبار عن شخصية عامة من غير ما يتأكدوا (وحتى لو متأكدين، هو مش ربنا أمر بالستر يا ناس؟)  خصوصاً إنه سلفي فهنيالك لو بتكره الإخوان والسلفيين بقى...والأسوأ طلب النيابة إن يتعمل لها كشف عذرية...النيابة، المتعلمين بتوع المدارس! بعد كده يرجعوا يلوموا "الجهلة" والأميين على حال البلد ومفيش حد معيشنا في الضلمة غيركم!