Sunday, November 22, 2009

عايزة أدون...

ولو كتبت عن أي موضوع تاني غير موضوع الجزائر ماحدش حيعبرني.
وعلى العموم هما كلمتين وبس يا ريت نسك على أم الموضوع ده:
الواحد لما بيتهان في بلده أسوأ بكتير من الإهانة برة البلد، لما أتهان من واحد المفروض يحميني ده إهانة للبلد، ولما أتهان من الشغل بمرتب مايأكلش عيش ده إهانة للبلد، ولما مالاقيش نتايج ملموسة لفلوس الضرايب اللي بندفعها دي برضو إهانة.
الحقيقة إن الإعلام مشحون لإن جيمي وعلاء كانوا هناك، لكن باقي الشعب ما هو بيتهان كل يوم إيه الجديد يعني؟ ما المساجين والمشتبه فيهم والأبرياء والأطفال بياخدوا على قفاهم في الأقسام وبيتمسح بكرامتهم البلاط إشمعنى الثورة دي دلوقتي...وليه ماحدش ثار على إسرائيل لما كل سوي تموت لنا عيل على الحدود، تموت، مش تخوف ولا تحدفه بطوبة؟
وبعدين الجزائريين اللي شايلين مطاوي وسكاكين مايفرقوش حاجة عن اللي عايش في عشوائيات ولو ماأكلش حيتاكل، فرقت إيه الصيع هنا من هناك؟
بالذمة مش كان في آلاف من المشجعين حاطين الاستيتس على الفيسبوك
1, 2, 3 fuck L'Algerie
ليه شايفين إهانتهم لينا ومش شايفين إهانتنا ليهم؟ وبعدين إنت لما تطلع تصرخ في التليفزيون وتقول إن شعب الجزائر كله بلطجية وكلاب وإرهابيين فرقت إيه عنهم؟ ما إنت بتشتم وهم بيشتموا، هما بيبلطجوا وإحنا كمان بنبلطج، خلصنا يعني.
أما بقى المسئولين فلا غبار عليهم في مصر والجزائر، لو الحكومة الجزائرية فاشلة و"متواطئة الحكومة المصرية مش أحسن منهم يعني، وبعدين اللي قلوا أدبهم كانوا عشر تلاف؟ عشرين ألف؟ ييجوا إيه وسط الأربعين مليون؟ يعني الصيع والسوابق وقتالين القتلة في مصر ييجوا إيه جنب باقيت الناس اللي لا ناقة لها ولا جمل، تحبوا حد ييجي يقول شفتوا الراجل اللي دبح عشرة في ليلة واحدة...أما شعب سفاح صحيح.
المهم إن كل اللي بقوله ده كلام بديهي، بس الناس بتقع في نفس غلطة التعميم وخلط الأوراق.
فضوها سيرة بقى بلاش غلبة.

3 comments:

Mohammad said...

الحمد لله الهوجة قربت تخلص :)

أحمد said...

في هذه الأحوال يفضل أن تضعى يمكة السردين في أذنك

lemondrops said...

أهي خلصت، ووصلة الشتيمة في الغزاوية والحماسويين، والأتراك و"قطر" بتكمل بعد الفاصل