Friday, October 26, 2007

!لا فتاوى ولا مذابح...يا أزهر

أنا عايزة أفهم

هو مفيش حل فى الكلاب السعرانة غير اننا نقتلهم؟

هو القتل بقى أسهل حل فى ايدينا؟

النهاردة اتنشر فى الجرنان ان لجنة الفتاوى فى الأزهر تبيح قتل الكلب الضال العقور اللى بيهاجم الناس , واستندوا لمبدأ "لا ضرر ولا ضرار"

و ان الفتوى دى مش بتنطبق على الكلاب المملوكة لأشخاص و بيتربوا فى المنازل كلاب الصيد و الحراسة

واخدين بالكوا من كلام الشيخ اللى سبحان الله اسمه "الأطرش"

الشيخ ماسابش غير كلاب الشارع بس, يعنى كلاب الشارع هى اللى أباح قتلها...مش الكلاب الضالة العقور بقى زى ما قايلين فى العنوان!!!

أول ما قريت الفتوى الجديدة نوفى دى افتكرت مذبحة مشهورة حصلت فى مايو اللى فات لما البلدية قتلت كلاب ضالة مع انهم ماأذوش حد, قتلوهم قدام بعض وعذبوهم فى وضح النهار وكان فى ناس زيى و زيك و أطفال صغيرة شايفين المذبحة دى...

فى واحدة أجنبية مقيمة فى مصر كانت بتعطف على الكلاب دى و كتبت تجربتها معاهم وصدمتها من اللى حصل هنا

و أنا مش بحب أحط صورعنيفة في المدونة لكن الظاهر ان احنا بقينا زى ما ربنا وصف أهل النارفى القرآن, بيجيلهم الموت من كل ناحية لكن مش بيموتوا!!!
الاحصائيات بتقول ان الحيوانات الضالة فى شوارع مصر حوالى مليون حيوان, وعن اوضاعهم حدث و لا حرج, العيال الصغيرة مايبقوش لاقيين حاجة يعملوها يقوموا فاقعين عين كلب أو يضربوه غلاسة, اللى بيسوقوا بيبقوا شايفين قطة عالطريق و بيكسلوا يفرملوا يقوموا داهسينها, ثقافة الاجرام بقت جوانا كلنا, متخيلين انه عشان حيوان و عشان ضعيف و عشان مش بتاع حد و ماحادش فى مصر حايحاسبك لو موته وعشان مش حايقدر يدافع عن نفسه أو يتكلم أو يصرخ زينا, يبقى مش مهم
ودلوقتى الأزهر طل علينا بفتوى تبيح قتلهم قال يعنى كانوا مستنيين اذن من الأزهر!!!
دلوقتى لو حد كلمهم حايقولوا احنا اخدنا اذن الأزهر و اذن الأزهر يعنى اذن الرسول واذن الرسول يعنى اذن ربنا!!!
هو ربنا قال ان احنا نعذب و نطيح فى كل اللى حوالينا؟
يا حكومة جبانة و كسلانة, مش عارفين تاخدوا الكلاب تعزلوهم فى حتة عشان مايأذوش الناس...مستسهلين القتل للدرجة دى؟ مادام فى حل فيه رحمة للحيوانات حتى لو كان حل متعب, ليه ماننفذهوش؟ علشان ماتتعبوش و ما تصرفوش فلوس عايزين تحولوا شوارعنا لمذابح بفتاويكوا
يا أطرش لو فضيلتك أطرش طب شوف الصور و اسأل نفسك...هى دى تعاليم الاسلام؟
لكن أنا بأكلم فى مين...اذا كانت دى حكومة بتعذب و تموت فى البنى آدمين حايهتموا بشوية كلاب ليه!!!!!

8 comments:

Anonymous said...

Dear noha,

i read the fatwa of this fucking Shikh, i do not know what kind of education thos people have had. Anyway the big problem is that they never use their minds, even if the prophet or teh religion says it is allowed to kill this dogs it is something which belongs to 1400 years ago, you use your mind to see things in the context of today. God help them

Sherif

مـــــــــــــــروان said...

وفيها ايه لما يموتوا الكلاب ماهو ده احسن حل عشان نخلص من الكلاب اللي مالية الشوارع لو انتي عندك حل تاني غير كده يا ريت تقوليه عشان نعرف ازاي نتخلص من الكلاب اللي في الشوراع دي ياعبقرية هانم هو انتي مش عجبك حاجة خالص

Wild at Heart said...

Sherif,
I don't know of any Quranic text or a Hadith that says that it is allowed to kill dogs. They just pick the easiest solution.That's all.

بحبها said...

هو فعلا قتل الكلاب الضالة مش حل لكن صعب جدا اننا نطلب من الحكومة انها توفر اماكن للكلاب الضالة لانها الي الان عاجزة عن توفير اماكن للبني ادمين الضالة وغير الضالة

Wild at Heart said...

هو تقريبا صعب نطلب من الحكومة أى حاجة لأنهم مشغولين بتكويم الفلوس على قلبهم يا بحبها.

Yuri said...

ازيك يا نها

عامله ايه انا عرفت اسمك من واحد كاتبه هنا

المهم انا ليا تعليقين على الموضوع دا اولا

صح مش محتاجه فتوى من الازهر الشريف او يعنى مش لازم نربط بينها وبين حديث الكلب العقور

لكن فى نفس الوقت مش لازم نتهكم على شيوخنا يعنى هما فيهم اللى فيهم بس الله ورسوله اعلم

ودا انا لاحظته فى كلام ناس هنا بدون ذكر اسماء

لان انا شايف ان اكتر حاجه فقدناها فى حياتنا الاحترام والحياء

بس

Wild at Heart said...

وعد يا يورى أول ما شيخ يقول حاجة محترمة, حاحترمه.

aldewan said...

يعني الكلب المسعور يقتل في كل الدولفي العالم لانه لا مجال ان يشفى وان عض شخص من الناس لا يوجد له علاج


اما بالنسبة انك قلت انه واحدة اجنبية "تاثرت
"
لا تخلي مقياسك هم الاجانب اقرائي ما كتبته عن العرب في عيون الغرب لتفهمي قصدي اكثر