Sunday, February 15, 2009

الصحوة...أخيراً

حكايتي مع التحرش الجنسي عمرها أكثر من 13 سنة
وطول السنين دي ماحستش بالأمل غير الأيام دي
غير لما الإعلام اهتم ولقيت مدونيين وصحفيين وغيرهم بيدافعوا عن الضحية مهما كانت الظروف المحيطة بالحادثة وهو ده اللي لازم يحصل
من ساعة ما الموضوع اتفتح أو بمعنى أصح اتفجر في أكتوبر 2006 والناس بدأت تتغير واحدة واحدة، الناس بدأت تفهم إن في قانون بيعاقب التحرش الجنسي والمعاكسات لأنها
جريمة
الناس بدأت تفهم إن ظروف الحادثة سواء المكان أو الزمان أو أخلاق الضحية أو مظهرها أو عقيدتها مابتغيرش في الأمر شئ لأن التحرش الجنسي
جريمة
البنات بدأت تفهم إن لازم مايسيبوش حقهن ويمشوا في طريق المحاضر والمحاكمات الصعب...عرفوا إن تحقيق العدالة محتاج شجاعة وجرأة، وعرفوا إنهم كده بيصلحوا المجتمع
الناس بدأت تفهم إن الفضيحة مش على المجني عليها، على الجاني اللي عقدة النقص والكلاكيع و(الازدواجية للأسف) والقذارة اللي جواه خلته يشوه نفسية البنات كده
نهى رشدي وآسر وقطر الندى و(أنا) وكل بنت دافعت عن حقها...إليكن السلام :)

8 comments:

mohamed said...

لكى أحترامى على صراحتك
وبأختصار
لقد غلبت الماده والشهوات على الناس
ونسوا أنهم بشر
من المفترض أن المبادىء هى التى تحكم سلوكياتهم
فلا يبيعوا مبادئهم من أجل حفنه نقود
وفى نفس الوقت
وجب على كل رجل أن يفهم أن كل حواء تسير فى الطريق هى أنسان وليست فقط أنثى
كما يجب على كل حواء أن تتعامل مع البشر أن تتعامل من منطلق أنها أنسان
وليست أنثى
من حق المرأه أن تتجمل
فقد قال الله تعالى عنهن
أنهن نشأن فى الحليه
فلا ينكر على المرأه أبدا أن تتجمل
ولكن من منطلق أنها أنسان أولا
أنا معكى أن الناس بالطريق
لم يتركوامحجبه اولا
كبيره فى السن أوحتى طفله
الاسلوب الذى اراه منهم
أصبح دون مستوى الحيوانات
ولوفرضنا أن المرأه
تلبس ما يثير فلا يجوز
التحرش بها
فهل يجوز أن نسرق حرامى
لآنه حرامى طبعا لا والا أصبحنا مثله
المبادىء لاعلاقه لها بالشخص
الذى تطبق عليه ولاتتجزء
أحترامى لكى

الجواز و سنينه said...

حكايتك مع التحرش ليهااكتر من 13 سنه؟؟؟؟؟؟
عايزه اقولك حاجه
لو واحد ساب باب شقته مفتوح و جه حرامى و سرقه يبقى العيب على الحرامى
و لا عليه
و لو واحد قفل باب الشقه كويس بس برضوا اتسرق يبقى العيب على الحرامى و لا عليه
الواحد يعمل اللى عليه الاول و بعد كده يشتكى
هو ده بالظبط لما الواحده تكون ملتزمه فى لبسها و تتعاكس يبقى العيب على الشاب و ساعتها تقطعه اربا اربا
لكن اللى لابسه مش ولابد و عايزه الناس تبقى مؤدبه طب ازاى؟؟؟؟
اعرف ناس كتر اوى و على درجه كبيره من الجمال و مش بيعانوا من التحرش لانهم بياخدوا بالاسباب يعنى بتخرج فى موقت مناسب ليها من ناحيه الامان حد بييجى ياخدها من المكان اللى هيه فيه
فيه حديث عن الرسول ما معناه ان لما الزمان يبوظ فكل واحديلزم بيته
مش هاقولك ما تخرجيش
اخرجى بس خدى احتياطات امانك و انتى مش هاتعانى من التحرش
مش كل واحده تعمل اللى ما بدالها و تقولى بيتحرشوا مهم لازم يتحرشوا
يعنى هايبقى التلفزيون و النت و الفضائيات و البنات فى الشارع و الظروف الاقتصاديه والزمن على الولاد

Wild at Heart said...

محمد،
شكراً على تعليقك بس مش فاهمة تقصد إيه إنهم يبيعوا مبادئهم مقابل الفلوس ده حتى اللي بيبيع مبادئه ده ويتحرش ماعندوش مبادئ أصلاً وبيعمل كده من غير مقابل مادي أو حسي حتى :s فعلاً شكراً على تعليقك إللى أضاف كتير لوجهة نظري.

الجواز وسنينه،
أنا عايزة أفهم حضرتك افتضرتي منين إن أنا مش ملتزمة في لبسي؟؟؟
وعايزة أقوللك إني عندي 13 سنة ولما أقول بقالها 13 سنه يبقى بدأت تحصل من وأنا عندي 10 سنين بالذمة عيلة عندها عشر سنين المفروض تلتزم في لبسها أو أصلاً تاخد بالها إن ماحدش يأذيها إزاي يعني؟؟ يبقى الذنب عليها ولا على الوسخ اللي عمل فيها كده والناس اللي بتقول إن الضحية هي السبب؟
إيه المنطق الغريب اللي بتفكروا فيه ده؟؟
إزاي واحدة تبقى ماشية في الشارع عادي ولا راجعة من الشغل ولا بتتفسح ولا نازلة الشارع غلاسة هي حرة وحد يرتكب ضدها جريمة وتقولوا هي السبب؟ إزاي يعني؟
بالنسبة للأمثلة اللي حضرتك جايباها أفهم من كده إن حضرتك لو لقيتي باب شقة مفتوح حتخشي تسرقيها؟ أكيد لأ، ليه؟ عشان السرقة حرام ويعاقب عليها القانون، مش عشان صاحب الشقة سايبها مفتوحة، حكاية إن البنت تعمل اللى عليها ولا ماتعملوش دي حاجة ربنا وحده هو الوحيد اللي من حقه يحاسبها، لا أنا ولا إنت ولا أي كلب بيتحرش بالبنات من حقه يهاجمها لأنها "مش ملتزمة" المفروض إن كل واحد يفضل في حاله إلا إذا حد طلب مننا المساعدة أو التدخل في شئونه، غير كده المفروض إن حضرتك تمشي في الشارع من غير ما تتدخلي في تصرفات أو مظهر الناس لإن كل واحد حر، أيوه كل واحد حر ولو ماكانش ربنا خلقنا أحرار كان خلقنا والحجاب على راسنا، وماكانش خلق جنة ولانار بقى
والله أصحاب حضرتك محظوظين لكن أنا وأصحابي باختلاف درجة جمالنا واحتشامنا بنعاني من التحرش من غير تمييز، القانون يا حبيبتي قال إن اللي يتعرض لأنثى يتعاقب، أنثى، مقالش محجبة ولا منقبة ولا نازلة في وقت مناسب ولا وضح أي ظروف
يعني حضرتك ماسمعتيش قبل كده عن تحرشات حصلت في نص النهار وفي شارع زحمة؟
أنا عايزة مرة تبقى ماشية كدة لا بيكي ولا عليكي وحد يتحرش بيكي وساعتها حتعرفي مين فينا اللي صح.

mohamed ghalia said...

ربنا معاكم بإذن الله
ولازم الناس الى الشهوة محركاهم دى ياخدوا جزائهم
دمتى بكل الود

blue-wave said...

طبعا لازم يكون فيه وقفه
والكل لازم يدافع عن حقه
والا هاتبقى غابه بجد

Wild at Heart said...

يسلم فمك.

أسوور said...

الجواز وسنينه

انا ماردتش عندى عليك ولما جيت هنا لقيتك كاتبة كلام عجيب جدا

الجريمة جريمة يا سيدتى ايا كان مكان وقوعها او اسباب وقوعها او من هو المجنى عليه

الناس زمان كانت بتسيب ابواب بيوتها مفتوحة وكمان محلاتها ومكانش حد بيسرقها لأن الدنيا كانت بخير

الناس فى الأرياف .. واحب اقولك ان انا افخر بإنتمائى للريف .. الناس هناك بتسيب فعلا بيوتها مفتوحة ومحدش بيدخل يسرقها ابدا

لو انا ماشية عريانة ملط .. ممكن واحد يبلغ البوليس عنى بتهمة الفعل الفاضح لكن مش ممكن يلمسنى لأنه لو لمسنى يبقى جريمة هتك عرض ولا يبررها فى القانون انى كنت عريانة

والدتى استاذة فقه وشريعة على المعاش وتبلغ من العمر 63 سنة ومحجبة جدا وبتتعرض للتحرشات برضه

انتى كدة بتدى مبررات للمتحرشين .. اللى مش بيهمهم اى سن ولا لبس معين ولاشكل ولا نيلة .. دول اسمهم متحرشين

وعلى فكرة انتى بتضحكى على نفسك عشان حكاية وايلد عن التحرش بيها من 13 سنة اى وهى طفلة صغيرة .. حكاية حصلت لنا كلنا تقريبا واحنا صغيرين وما اعتقدش ان مفيش بنت لم يتحرش بيها واحد فى اسانسير او فى محل وهى بتشترى طلبات او حتى فى الشارع او واحد فجأة بتلاقيه قالع قدامها او مبين جزء معين من جسمه .. او .. او .. او ..

كلها قصص عارفاها البنات وبتتحكى بس لما بنكبر وبنقدر نواجه نفسنا بانها مكانتش غلطتنا والقوى فينا هو اللى بيبدأ يحارب المرضى دول زى ما انا عملت وهأعمل انشاء الله

تحية كبيرة وتصفيض حاد لوايلد وممكن تيجى تقرى البوستات بتاعة التحرش الجنسى اللى بدأت بيها المدونة من سنة 2006
التحرش الجنسى 1
http://amyasser.blogspot.com/2006/12/blog-post_6532.html

التحرش الجنسى 2
http://amyas
ser.blogspot.com/2006/12/2.html

soly88 said...

تعليق الجواز وسنينه يذكرنى بمقوله للبعض
ان البلاد اللى بيحصل لها كارثه كزلزل
او اعصار ان ده عقاب من ربنا لأنهم مش كويسين
مع ان اى طالب فى ثانوى يعرف السبب العلمى لحدوث تلك الظواهر
ولكنه استسهال اتهام الآخرين