انقبضت قلوبهم وقفزت من بين ضلوعهم

أسلوب غريب لاحظته في طريقة عرض خبر مقتل اللواء مصطفى زيد مدير مباحث الجيزة بعد ما خبطته عربية "تابعة لإحدى الجهات الحكومية، الصحفي عارض الخبر "في جريدة الأهرام" بشكل عاطفي للغاية ومثير للمشاعر يخليك تقعد تتشحتف وإنت بتقرا، واستخدم تعبيرات مش المعتاد إنها تستخدم في صفحة الحوادث بل ولا في صفحة الوفيات...زي إن اللواء "كان بالأمس فقط يملأ حياتهم" في إشارة لأولاد الضابط وكاتب طريقة تلقي الخبر بشكل ميلودرامي خيالي يؤكد لك إن التفاصيل دي من محض خياله "انتظارهم طال بعض الشئ في هذا اليوم ساورهم القلق وقبل أن يستبد بهم جاء النبأ المفجع عبر التليفون بأن اللواء تعرض لحادث تصادم وهو الآن في المستشفى سارع أفراد الأسرة تسبقهم دموعهم تتوجع قلوبهم لرؤيته والاطمئنان على عائلهم المصاب وأيديهم تتجه بالدعاء إلى الله أن تكون الإصابة بسيطة أو متوسطة وعند وصولهم المستشفى، انقبضت قلوبهم وقفزت من بين ضلوعهم فقد كان المشهد وعلامات الصمت الحزين بالمستشفى ودموع أصدقاء الفقيد تعلن عن الفاجعة لقد رحل الفقيد دون أن يودع أسرته التي اعتادت انتطاره على طعام الإفطار فقد كان الشهيد يؤجل وداعهم إلى الليلة الحزينة، حيث كان من المنتظر أن يسافر لأداء العمرة في هذه الليلة، كما اعتاد كل عام ولكن القدر لم يمهله."
!!!!!!!!!!!!!!!!!
ده ولا أكثر المسرحيات التراجيدية تأثيراً قريت فيها الكلمتين دول...ليه الصحفي والجريدة طبعاً بشكل عام عايزين الظابط يصعب علينا قوي كده؟ طب يا عم ربنا يرحمنا جميعاً ما المآتم دي الحمد لله بتحصل بالآلاف كل سنة في جميع نجوع مصر، بس واضح إنه بيحاول محاولة مستميتة لتحسين صورة الظابط ده والظباط عموماً، مش كفاية الراجل تقي وبيعمل عمرة كل سنة يا ناس؟ هو مش المفروض يعني إن العمرة دي حاجة ما بينه وبين ربنا يعني إيه فايدة إن الناس كلها تعرف إنه كان مسافر عمرة الليلة الحزينة دي؟ لازكم الظابط يبان إنه كان تقي وملتزم ولسه مترقي وعلاقاته الأسرية ممتازة ومتفاني في عمله عشان اللي يطلع بعد كده يقول ضباط الشرطة بيبلطجوا على الناس يردوا عليه يقولوا ما انتاش شايف الظباط اللي بيموتوا في شغلهم وعيالهم بتتيتم عشانكوا؟
بس هي الحقيقة إن كلنا بنموت، وكلنا بنحس، وكلنا عيالنا ممكن تتيتم في أي لحظة، اللي إنتوا مش بنتشروه، لما يكون اللي يتم العيال وقتل عائلهم الوحيد هي الشرطة نفسها.