Saturday, September 11, 2010

صدق اللي سماه عيد التحرش

كنت متوقعة إن يحصل تحرشات جماعية في العيد السنة دي، بقى لنا أربع سنين التحرشات الجماعية مقررة علينا وبقت خلاص زي الأكل والشرب والنوم كده، وماتوقعش ليه؟ إيه اللي تغير من 4 سنين؟ ولا حاجة؟ الشرطة اللي هي أحد الأسباب الرئيسية لحالة الفوضى كانت مشغولة بتعتقل أعتى مجرمي هذا العصر اللي هم النشطاء السياسيين
يا حلاوة يا ولاااااااد العيد فرحة فعلاً، سايبين العيال يتحرشوا بالبنات وماسكين تنكيل في النشطاء، هم دول اللي بياخدوا مرتباتهم من ضرايبنا، أنا مش عارفة أقول إيه فعلاً، أنا قلت كل اللي ممكن يتقال، بس مش عايزة أي جحش من هنا ورايح يقول لي إن التحرش ليه علاقة بالكبت الجنسي - كتير من اللي بيتحرشوا لسة مابلغوش أساساً، ولا أي جحش تاني يقول لي البنات هم السبب و90% من المصريات محجبات، ولا أي خرتيت يقول لي إني ببالغ أو إن الموضوع مش سيء زي ما أنا متخيلة
اتفضل إلبس ست يا روح أمك منك له وإبقى قابلني لو عرفت تمشي مسافة عمارتين من غير ما تسمع تعليق أو حد يبص لك بصة غير بريئة أو يعمل نفسه بيتكلم في التليفون مع حد وتبقى عارف إنه بيتكلم عليك
جتكوا القرف كلكوا تستاهلوا جمال يدوس على راس اللي خلفوكوا
وساعتها إن شاء الله هكون مت بالنقطة أو سبت أم البلد دي

7 comments:

9h said...

مكنش فيه تحرشات السنادى؟؟.. الحقيقة انا معرفش لانى منزلتش الشوارع
لكن كل حاجة بتاخد دورتها.. غالبا البنات بطلت تخرج تتفسح ف العيد وقالت بناقص.. قام اللى قاعدين يسنوا سنانهم ف الشوراع ملقوش بنات يعضوا فيهم ياعينى.. ممكن ع العيد الكبير نسمع عن لواط ف الشوراع- ماهى البنات ف بيوتها ومش معقول السنان اللى اتسنت دى تروح ع الفاضى

هوا زى ما انت/ى بتقول/ى بالظبط الناس بتتكلم عن الكبت الجنسى ومش واخدة بالها ان الاغلب بيكونوا عيال صغيرة
حتى لو كبت.. كتكوت عين امه مكبوت يا عينى وخرج يتلزق ف بنات الناس
حاجة تقرف

مدونتك جميلة.

Wild at Heart said...

شكراً ليك =)

Wa7ed said...

في الأول كان ليه علاقه بالكبت
لكن مع الوقت بقي موروث إجتماعي
وزي مافيه المسحراتي ف رمضان
والبيض ف شم النسيم
لازم نتعود ان هيبقي في حاجه اسمها التحرش ف العيد

ربنا يهدي الجميع
معاكي حق ف نرفزتك بس مالهاش لازمه كلمة جحش دي
;)
HaPPy 3eed

Wild at Heart said...

طب حط كلمة تانية تليق على الناس دي :)

Wa7ed said...

حيوان بصراحه مش لاقي غير كده
اللي مايعرفش يسيطر علي نفسه
ويتصرف زي الهمج يبقي حيوان
لكن مش غريبه علي شعب
بقي مستعد يقوم بحرب عشان ماتش كوره
وبينتخب علي اساس ان اللي نعرفه احسن من اللي مانعرفوش

Anonymous said...

بغض النظر عن البوست الأخير
أنا بحس بإني محتاج أعتذر كل ما أقرا حاجة من كده
أنا فعلاً آسف جداً
أظن الحياة منغيرنا كانت هتبقى أفضل كتير

Wild at Heart said...

أهلاً يا خالد لأ ماتعتذرش واكتب عن الموضوع أو لينك للمدونات اللي بتكتب عنه خللي بالك إن المدونات هي اللي أجبرت الرأي العام والصحف إنها تدي اهتمام للموضوع.