إيه اللي حصل في مسيرة وزارة الدفاع 30/9؟

بعد 8 شهور من الثورة وسقوط الشهداء وهروب الحرامية واختفاء القناصة وسائق السيارة الدبلوماسية والحد الأدنى للأجور و12 ألف محكوم عليه عسكرياً وكرامتنا وشهادة المشير ماعرفش جايز كان طبيعي إن الناس تتجمع تاني في الميادين، وإن الهتاف يبقى ضد حكم العسكر اللي هو حتى لو اتهبلت في مخي وبقيت حيادية برضو هاقول عليه فاشل بالتلاتة.

على الساعة 6 تقريباً لقيت مسيرة كبيرة تشرح القلب خارجة افتكرتهم رايحين على النائم العام اللي موقف حال العدالة الله يخرب بيته، بس لقيتهم مكملين، وعرفنا إنهم رايحين لوزارة الدفاع، أو للعباسية لإني كنت متأكدة إن الجيش هايعمل الاستعدادات بتاعت يوم موقعة العباسية.

بيني وبينكم مابقتش عارفة أكمل ولا لأ، خفت من تكرار السيناريو المهبب وسقوط شهداء ومصابين، بس قلت المجلس العسكري ظالم، وطالما في حوالي 5 آلاف غيري رايحين من حقهم علي إني "أحميهم" وأدافع عن حقهم في التظاهر السلمي من غير ما حد يرهبهم أو يضربهم أو يقتلهم. الناس كانت جاية في الاتجاه المعاكس بتقول لنا خلوا بالكوا الجيش قافل الطريق، لقيت واحد جنبي بيقول الشهادتين، قمت قايلاهم في سري.

لما وصلنا كنا منهكين جداً وهتفنا شوية وسكتنا، وطبعاً كان الجيش عامل استعدادات مهولة من المدرعات والأفراد المسلحين والمواطنين الشرفاء اللي بيشتمونا من ساحة جامعة النور، الكلام ده كان في شارع لطفي السيد، استعدينا إننا نرجع ولقيت العميد ممتاز اللي كان بيسلم على حبيب العادلي بحرارة بيكلمنا يقول لنا إنتوا في عيوننا! واللي اسمه ممدوح أبو الخير اللي ظهر في فيديو بيتهم متظاهرة إنها قابضة، ولقيت الناس بتتكلم معاهم، وموتوسيكلات مريبة رايحة جاية، ومواطنين شرفاء في الجامع فقلت طبعاً المظاهرة فيها مندسين، وجمعنا بعض ورجعنا لحد الدمرداش، بس ساعتها كان في ناس بتقول هانرجع على كوبري القبة ومابقتش فاهمة ليه؟

نزلت كوبري القبة كده كده عشان أعرف أروح لقيت ناس من المسيرة متجمعين، مفيش 5 دقايق ومئات خرجوا يهتفوا بالحرية وبسقوط حكم العسكر، وطبعاً كانوا عاملين استعدادات مشابهة في كوبري القبة، وحد حدف طوبة تقريباً من فوق الكوبري والناس تجري، العساكر تقدم شوية والناس تجري، مشيت ناحية الخليفة المأمون لقيت الجيش قافله برضو بدون مبرر، لإننا ماكانش معانا سلاح غير صوتنا، لا حد فينا حدف طوب ولا مسلح ولا حاجة، عشان كده أي إعلامي هايقول إن المسيرة كانت بتهاجم قوات الجيش أو وزارة الدفاع يبقى كداب ومنافق لإن ده ببساطة ماحصلش، ايها المجلس العسكري لقد ورمنا بقى، إنت فاشل وبتعاملنا كأننا مالناش قيمة ومستهتر بحياتنا وكرامتنا واحنا كرامتنا غالية علينا، ارحل بقى!