يا مجلس يا عسكري اتق غضب الشعب

مش هاقوللكوا اتقوا غضب ربنا لإن واضح إنكوا ماتعرفوش ربنا، وفاكرين إن الممارسات القمعية والأساليب الملتوية هتضمنلكوا الاستمرار في الحكم و/أو عدم المحاسبة، برضو هاقوللكوا كان غيركم أشطر، إنتوا ماشفتوش فيديوهات الثورة يا بعدا؟ ماشفتوش الناس وهي رايحة تقف قدام المدرعات وتنط عليها وتوقفها، ده الأمن المركزي حضراتكم اللي أعداده أكبر من الشرطة العسكرية، أخد اللي فيه النصيب لما الناس جابت آخرها، وكان زعلهم وحش.

اتقوا غضب الشعب، المصريين صابريييين صابريييين صابرييييين زيك كده يا طنطاوي بس آخر زعلهم وحش، وبيبقوا متهورين وانتحاريين ولو عسكري ضرب النار علينا (تاني) الجيش اللي انتوا خايفين عليه يتفكك ده هايتفكك فعلاً والبلد هاتروح في ستين داهية، سواء بسبب كده أو بسبب ال6 شهور اللي الاحتياطي النقدي فيهم هايخلص زي ما بيقولوا، هم طبعاً بيقولوا كده عشان نبطل إضرابات ومظاهرات ونخاف، بس إفرض حصل يعني، الناس حتخاف؟ الجعان حيخاف من إيه ما هو كده كده ميت، بس هيقوللك أنزل المظاهرات يا قاتل يا مقتول بدل ما أموت من الجوع في بيتنا!

اتق غضب الشعب يا مجلس