Sunday, June 03, 2007

عرسان الغفلة

بكره أشوف عرسان
مش عشان مبدأ جواز الصالونات نفسه, أهو طريقة تعارف زى ما اى اتنين بيتعرفوا, مش مفضالاها بس حانعمل ايه
عشان أهلى زى ما تقولوا كده ما بيصدقوا حد كويس (بمعنى انه من عيلة محترمة و معاه فلوس) يتقدم و يقعدوا يقنعونى بيه و دى فرصة ذهبية دى فرصة ماتتعوضش, انتى عايزة تفضلى مرزوعة (ايوة, قالوا مرزوعة) زى اختك الكبيرة لحد ما بقى عندها 27 سنة؟
أصرخ: يعنى هى المفروض توافق على حد مش مرتاحة له؟
يلفوا و يدوروا و مايجاوبوش على سؤالى
يا ترى لو كنت ولد كانوا حايضغطوا عليا كده؟ كل شوية يأكدوا لى أنهم مش جابرينى على حاجة لكن لما ماما تقول للناس انى موافقة أشوف عريس من غير ما تاخد رأيى مش ده يبقى إجبار؟
بجد شىء عجيب. بيحسسونى ان انا المفروض أبوس ايدى وش و ضهر ان حد عبرنى و ازاى و ازاى بقى أقول لأ !!! أبقى كده باتبطر على النعمة!!
ولوشفته و قلت مش موافقة لازم استجواب: ليه؟
مش مرتاحة
مش مرتاحة ليه هو شكله وحش؟
لأ
اخلاقه وحشة؟
لأ
فيه عيب ظاهر؟
لأ
أمال مش مرتاحة ليه؟
مش عارفة, مش مرتاحة و خلاص
انت حرة...خليكى قاعدة كده...بس ماترجعيش تندمى!!!!
أندم على ايه أنا مش فاهمة!!! هما شايفين ان انا المفروض أوافق على أى حد عيلته كويسة و شكله مقبول و امكانياته كويسة والحب بقى ييجى بعد الجواز!!!!
بس أنا يا عالم ماقدرش أعيش كده, ماقدرش أحط دبلة واحد فى ايدى غير لما أكون دايبة ف حبه و ف نفس الوقت مقتنعة بيه, لما اجى أفكر فيه بطريقة عقلانية يعنى
حاجة كمان باكرهها فى الجواز ده إن لازم يبقى فيه ارتباط رسمى فى فترة قصيرة, عشان ماينفعش يفضل داخل خارج من البيت من غير ما نكون مخطوبين كأن حد ماسك بندقية على راسك و بيقوللك : حب فى خلال تلات شهور قبل الخطوبة...و إلا!!!!!
انا نفسى اللى ارتبط بيه ابقى شفته فى موقف عادى بره موضوع الارتباط ده عشان مايبقاش لا أنا ولا هو مرسومين نفسى الموضوع يجى بالتدريج و اخد وقت براحتى نعرف بعض و أحب و أتحب و يعرف جنانى و غضبى و حنيتى...
المهم ان انا لسه ماكملتش اتنين و عشرين سنة, و اكيد كل ما أكبر كل ما ضغوط الجواز حاتزيد...أنا مش عارفة يعنى فى أسوأ الظروف لو ماتجوزتش ايه اللى حايحصل يعنى؟؟
حادخل النار؟
حايفصلونى من الشغل؟
حأعجز بدرى؟
و بعدين أنا مش من نوعية الناس اللى بتعرف تسيب انطباع أول كويس عند الناس...يعنى ممكن أوى لما أشوف حد يبقى الانطباع اللى حياخده مش هو الحقيقى, أنا باتصرف على طبيعتى و تلقائية و صريحة... ولو مشينا على كلام أهلى المفروض ان انا أقرر اذا كنت عايزة الشخص ده بعد قعدتين تلاتة, طب بالذمة ايها القارىء العزيز انت المفروض تعرف ايه عن شخص فى خلال تلات اربع ساعات؟
حاتعرف ايه عنه يخليك تاخد قرار انك توعده بالخطوبة اللى هى وعد الجواز؟
ممكن تكون انت او انتى عندكوا موهبة انك تقدر تعرف شخصية اللى قدامك بسهولة, طب الغلابة اللى زيى يعملوا ايه؟
الموضوع أبسط من البساطة, قسمة و نصيب ربنا كاتبهولى من قبل ما أتخلق لكن أهلى مصممين يعملوها خناقة و يقنعونى ان كل عريس
يتقدم لى فرصة ذهبية و مش حاتتكرر, و انى المفروض أمسك فيه بايديا و سنانى
!!!
عشان كده باقول ان طريقة عرسان الصالونات دى ماتنفعنيش... و نفسى أعمل ثورة فى البيت انى أرفض انى أشوف حد أصلا لكن اؤكد لكوا ان مفيش ثورة من غير ضحايا
ايه رأيكوا يا جدعان؟؟؟؟
"You don't marry someone you can live with. You marry the one you cannot live without."

5 comments:

blue indifference said...

" Men marry because they are tired. Women because they are curious. Both are disappointed".

blue indifference said...

" Men marry because they are tired. Women because they are curious. Both are disappointed".

Anonymous said...

انا زيك يا نهى بجد رافضة الموضوع موووت ويقعدوا يقولوا طيب هتجيبي منين ، جامعة ورحتي، شغل واشتغلتي، مش عارفة في ايه؟ بس بصراحة انا لحد دلوقتي ماقدروش يجبرونب اروح، انا ضده مع ان ناس كتير بتغلطني وتقولي ده رزق، بس انا مش مستعدة حد بتفرج عليا...solita

9h said...

يا بنتى _اسمحيلى أقولك يا بنتى_ محدش هيعيش مكانك
اعملى اللى شايفاه مناسبك

Wild at Heart said...

غادة،
شكراً لتعليقك، بعد 3 سنين أنا لسه بواجه المشكلة دي وشايفة إن الطريقة مش على طول بتبقى هي المشكلة، ساعات الناس بتتعامل معايا كإني آلة.