OTV ماتشوفش

بقى أنا من امبارح دمي محروق وعمالة أهري وأنكت في نفسي ومش عارفة أركز ومش عارفة أتضايق حتى من اللي شفته على المدعوة "أو تى فى"

كنت قاعدة بتفرج على فيلم أجنبي في أمان الله ألاقيلك البطلة فجأة بقت عريانة...ولسة مافقتش من الصدمة لقيت بعد كده مشاهد جنسية صريحة!!! أنا فضلت فترة على بال ما استوعبت اللى حصل ودخلت أنام وأنا مفيش في دماغي غير المشهد ده...ماقدرتش أنام وللا أفكر في الشغل والنهاردة صاحية مبلمة ورحت الشغل كل شوية ألاقي نفسي بأقرا عن موضوع أفلام أو تي في وسايبة الشغل!!! واكتشفت إنها مش أول مرة القناة تعرض مواد إباحية

أنا كنت لاحظت موضوع الرقابة المنعدمة كذا مرة قبل كده على القناة دي، بس أول مرة أفاجأ بالعري الصريح والواضح، ولا كأن الناس عمالة تصوت وتشد في شعرها من قنوات ميلودي، يقوموا جايبين مشاهد جنسية كاملة

وإمعانا في الاستعباط، القناة أعلنت في نص الفيلم إنه "للكبار وبس"

ده إن شاء الله على أساس إنه العيال كلها بتنام الساعة 12؟

وعلى أساس إن القضية قضية أطفال وبس؟

خير بقى؟

في إيه يعني؟

هو النظام حايبقى كده وللا ايه من هنا ورايح؟

أفتح القناة ألاقى ناس عريانة وشوية شوية هلاقى أفلام بورنو؟

هى الدنيا جرى فيها إيه؟

هى الناس ناقصة أخلاقها تبوظ؟ أيوه بتكلم في الأخلاق. الأخلاق إنك ماتصدمش المشاهد بالمناظر دي، القبيح هايروح على القنوات المتشفرة وهو هايبقى عارف اللى جاى

لكن أبقى قاعدة جمب أخويا وللا أبويا ألاقى مشهد جنسي عيني عينك....لأ

لأ يا ساويريس

شاطر بس تطلع تعيط يا عيني على الموظفين بتوعك اللى اتخطفوا...وتقول أصل أنا رااجل صعيدي

لأ فعلا هي دي أخلاق القرية أمال ايه يا رجال

أجذب الناس للجنس والمشاهد العارية وبس وإن شالله ما حد اشتغل وإن شالله ما حد ركز في أي حاجة غير الجنس

أخلى الناس كلها مدمنة بورنو أكتر ماهما مدمنين يللا ما هي خربت

إلاهي تخرب فوق راسك قادر يا كريم

أقوللك يا ساويريس يا صعيدي، أنا عايزاك تعيط أوي لما معدلات الاغتصاب تزيد من 20.000 ألف في السنة لمية

عايزاك تبكي بدل الدموع دم لما الستات عقدهم تزيد بسبب التحرش الجنسي اللى هو أصلا سمة متأصلة من سمات الشارع المصري

عايزاك تشد في قرعتك لما ماتلاقيش حد عدل يشتغل معاك عشان الناس كلها مابقتش بتفكر غير في الجنس من كل المناظر اللى بتشوفها

لأ مش بفلوسي يا ساويريس

مش هاشترك في موبينيل

مش هاتفرج على نوديتي تي في

مش هاشترك في لينك دوت نت

ساويريس وكل اللى بيهدموا بدل ما يصلحوا...يحموك في كنكة

جتكوا القرف مليتوا البلد

ربنا يستر

ده نص رسالة وصلت لأعضاء جروب الإضراب على الفيس بوك:

قالت فاطمة راشد - والدة إسراء - أمس الأول، في اتصال تليفوني ببرنامج «العاشرة مساء»، إنها تريد أن تسمع صوت ابنتها إن كانت علي قيد الحياة، أو تتسلم جثتها إن كانت قد رحلت عن الحياة، مؤكدة أن ابنتها لا تنتمي لأي جهة سياسية أو حزب، ولم تشترك من قبل في أي مظاهرات.وأضافت الأم: «في آخر مرة شاهدت فيها إسراء داخل المحكمة يوم السبت الماضي، أثناء تجديد حبسها، كانت مرعوبة وجسدها يرتعش، أخشي أن يكون قد أصابها مكروه أو تعاني من شيء، خاصة أنها نحيفة ولا تتحمل الأذي» - وفقاً لتعبير الأم. وأكد أمير سالم، محامي إسراء، «فتاة الفيس بوك»، أنه لم يتمكن من الوصول إلي مكان احتجازها حتي الآن، مشيراً إلي تردد شائعات عن وجودها في سجن القناطر أمس، ولكن لم يتأكد ذلك.اللي يخطف بنات الناس ويبهدلهم بالطريقة دي ملوش مكان الا السجن فعلا دي حكومة الحرامية والارهاب

ربنا يستر

ربنا يستر

ربنا يستر

وكمان عاملين إضراب!

الشغل الشاغل للناس من ساعة ما عرفت عن إضراب 6 أبريل: هو حاينجح ولا لأ؟

وبعد ما اليوم عدى بخيره وشره الناس بتسأل نجح ولا لأ؟

بس في سؤال المفروض يتسأل الأول: الإضراب ليه؟

الإضراب هدفه الاحتجاج على أوضاع البلد الاقتصادية والسياسية...احتجاج على العيش اللى الغلابة مش لاقيينه والميه اللى مش بتوصل البيوت والتعليم اللى زي قلته والمرتبات والمعاشات المضحكة والخدمات العامة المنعدمة والتعذيب في السجون يعنى من الآخر احتجاج على اللى خاربينها وقاعدين على تلها

يعنى مفيش حد مننا اشترك في الإضراب وهو متخيل مثلا إن الحكومة حاتقدم استقالتها بكره الصبح عشان بتحس على دمها. مفيش حد أضرب وهو عارف إن الأسعار حاتقل النص من يوم 7 (وحتى لو قلت النص مش هايكفي). الإضراب ما هو إلا توصيل رسالة، بس كده. تعبير عن رأي. لو الحكومة شغالة عدل المفروض الرأي ده يتسمع ويتاخد بيه مادام بيعبر عن حق. لكن بما إن ده مش بيحصل فالإضراب هدفه توصيل رسالة للحكومة إن احنا خلااااص دخلنا في مرحلة الثورة...مش حانبقى مش لاقيين عيش يسد الرمق ولا فرشة نضيفة ولا شارع نضيف ولا أمخاخ نضيفة تحط المناهج ولا مرتبات تعيش الموظفين من غير ما يشحتوا ويتبهدلوا في كذا مكان عشان يادوب يعرفوا يعيشوا بكرامة (زي حالاتي كده..آه والنعمة). عشان كده لو جينا قلنا هل الرسالة وصلت؟ أكيد وصلت. يبقى الإضراب ماله؟ نجح. أيوه نجح لأن الحكومة اترعبت وبعتت عساكر أمن مركزى وظباط عشان يخوفوا المتظاهرين. ووزارة الداخلية أصدرت بيان بتقول الإضراب ممنوع والدنيا كلها عرفت الجزيرة والعربية والبي بي سي...مادام الموضوع اتعرف إن المصريين محتجين يبقى الرسالة وصلت والإضراب نجح. يبقى من هنا ورايح المصريين مش هايسكتوا، مش هايخدوا على دماغهم ويقولوا آمين، اللى حايذلهم حاينضرب (زي ما اتعمل كده في رئيس جامعة عين شمس) وحقوقهم حاترجعلهم، حاترجع ببطء، بس الحماس والقوة اللي شفتها فينا حاترجعها أكيد.