Sunday, April 06, 2008

وكمان عاملين إضراب!

الشغل الشاغل للناس من ساعة ما عرفت عن إضراب 6 أبريل: هو حاينجح ولا لأ؟
وبعد ما اليوم عدى بخيره وشره الناس بتسأل نجح ولا لأ؟
بس في سؤال المفروض يتسأل الأول: الإضراب ليه؟
الإضراب هدفه الاحتجاج على أوضاع البلد الاقتصادية والسياسية...احتجاج على العيش اللى الغلابة مش لاقيينه والميه اللى مش بتوصل البيوت والتعليم اللى زي قلته والمرتبات والمعاشات المضحكة والخدمات العامة المنعدمة والتعذيب في السجون يعنى من الآخر احتجاج على اللى خاربينها وقاعدين على تلها
يعنى مفيش حد مننا اشترك في الإضراب وهو متخيل مثلا إن الحكومة حاتقدم استقالتها بكره الصبح عشان بتحس على دمها. مفيش حد أضرب وهو عارف إن الأسعار حاتقل النص من يوم 7 (وحتى لو قلت النص مش هايكفي). الإضراب ما هو إلا توصيل رسالة، بس كده. تعبير عن رأي. لو الحكومة شغالة عدل المفروض الرأي ده يتسمع ويتاخد بيه مادام بيعبر عن حق. لكن بما إن ده مش بيحصل فالإضراب هدفه توصيل رسالة للحكومة إن احنا خلااااص دخلنا في مرحلة الثورة...مش حانبقى مش لاقيين عيش يسد الرمق ولا فرشة نضيفة ولا شارع نضيف ولا أمخاخ نضيفة تحط المناهج ولا مرتبات تعيش الموظفين من غير ما يشحتوا ويتبهدلوا في كذا مكان عشان يادوب يعرفوا يعيشوا بكرامة (زي حالاتي كده..آه والنعمة). عشان كده لو جينا قلنا هل الرسالة وصلت؟ أكيد وصلت. يبقى الإضراب ماله؟ نجح. أيوه نجح لأن الحكومة اترعبت وبعتت عساكر أمن مركزى وظباط عشان يخوفوا المتظاهرين. ووزارة الداخلية أصدرت بيان بتقول الإضراب ممنوع والدنيا كلها عرفت الجزيرة والعربية والبي بي سي...مادام الموضوع اتعرف إن المصريين محتجين يبقى الرسالة وصلت والإضراب نجح. يبقى من هنا ورايح المصريين مش هايسكتوا، مش هايخدوا على دماغهم ويقولوا آمين، اللى حايذلهم حاينضرب (زي ما اتعمل كده في رئيس جامعة عين شمس) وحقوقهم حاترجعلهم، حاترجع ببطء، بس الحماس والقوة اللي شفتها فينا حاترجعها أكيد.

11 comments:

Yuri Eisenheim said...

ينجح او مش هينجح دى مش المشكله

المشكله انه اتعمل غلط

وبطريقه طفوليه جدا

وخلو الحكومه بقت زى الملك زمان

دخلت البلطجيه وبدل حريق القاهره بقى حريق المحله

حتى دى كمان احنا معرفناش نعملها

Yuri Eisenheim said...

لا حياتك انتى هياخدوا فوقدماغهم تانى

ماهما ماتحركوش الا لما الفتات اللى بيرميه الكبار خلص

اللى فاضل منهم خلص

غير كدا لا

لما العمال هياخدوا حقوقهم خلاص مولد وانفض ومالناش فيه

وغيرهم كتير هيعمل كدا

Anonymous said...

Dear Noha, i am agree with it is a message we sending out, people were saying we r ready to get our rights by our own hands, it is the first step to get everthing u mentioned in your post, good education, good salary and humian life. I happy to visite your blog after a long time. have a nice day dear.

Sherif
Holland

Wild at Heart said...

Yuri,
أخيرا لقيت حد زيى عارف إن اللى حرقوا المحلة لا يمكن يكونوا أهلها،أكيد بلطجية الحكومة والحركة دي مفقوسة أوى يعنى، نفس اللى حصل في جامعة عين شمس الترم اللى فات والسنة اللى فاتت: الإخوان يعملوا مظاهرة يقوموا مدخلينلهم بلطجية يضربوا فيهم ويقولوا إن هما اللى عملوا أعمال شغب
يا ريت يلعبوا غيرها

Sherif,
eedak m3ana ba2a :s

Anonymous said...

Dear Noha,

Ana edi m3ko ala toul, i have joind the movement egyption agianst corruption, i shall come to cairo next december, visiting the movement and talk with people there about what we can do(egyption in other countries) i am supporting u and all people who fight for beter egypt from my whole heart, have a nice day

Sherif / Holland

Jade said...

I cant wait for a proper revolution...

Yuri Eisenheim said...

مستنى مواضبعك وكلامك يا نهه ولا امتحانات بقى

Celular said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Celular, I hope you enjoy. The address is http://telefone-celular-brasil.blogspot.com. A hug.

Wild at Heart said...

Jade,
I won't WAIT for a proper revolution...I will MAKE it =)

Yuri Eisenheim said...

I won't WAIT for a proper revolution...I will MAKE it =)


very very good words wild

بس تفتكرى هتبداى ازاى او هتبقى ثوره ازاى

ولا دا كلام وبس مش قصدى لكن انا اقصد الكلام سهل لكن انا تقدرى تقولى نفسى اغير واثور بس عاوز ثورتى تبقى صح

Yuri Eisenheim said...

اسراء عبد الفتاح العضوه بحزب الغد وصاحبه فكره الاضراب على موقع الفيس بوك اتقبض عليها ..

لازم كلنا نساعدها ونساندها ونقف معاها ولازم هنضرب يوم6 مايو الجاى

وكل سنه وانتا طيب يا ريس