Friday, April 25, 2008

OTV ماتشوفش

بقى أنا من امبارح دمي محروق وعمالة أهري وأنكت في نفسي ومش عارفة أركز ومش عارفة أتضايق حتى من اللي شفته على المدعوة "أو تى فى"
كنت قاعدة بتفرج على فيلم أجنبي في أمان الله ألاقيلك البطلة فجأة بقت عريانة...ولسة مافقتش من الصدمة لقيت بعد كده مشاهد جنسية صريحة!!! أنا فضلت فترة على بال ما استوعبت اللى حصل ودخلت أنام وأنا مفيش في دماغي غير المشهد ده...ماقدرتش أنام وللا أفكر في الشغل والنهاردة صاحية مبلمة ورحت الشغل كل شوية ألاقي نفسي بأقرا عن موضوع أفلام أو تي في وسايبة الشغل!!! واكتشفت إنها مش أول مرة القناة تعرض مواد إباحية
أنا كنت لاحظت موضوع الرقابة المنعدمة كذا مرة قبل كده على القناة دي، بس أول مرة أفاجأ بالعري الصريح والواضح، ولا كأن الناس عمالة تصوت وتشد في شعرها من قنوات ميلودي، يقوموا جايبين مشاهد جنسية كاملة
وإمعانا في الاستعباط، القناة أعلنت في نص الفيلم إنه "للكبار وبس"
ده إن شاء الله على أساس إنه العيال كلها بتنام الساعة 12؟
وعلى أساس إن القضية قضية أطفال وبس؟
خير بقى؟
في إيه يعني؟
هو النظام حايبقى كده وللا ايه من هنا ورايح؟
أفتح القناة ألاقى ناس عريانة وشوية شوية هلاقى أفلام بورنو؟
هى الدنيا جرى فيها إيه؟
هى الناس ناقصة أخلاقها تبوظ؟ أيوه بتكلم في الأخلاق. الأخلاق إنك ماتصدمش المشاهد بالمناظر دي، القبيح هايروح على القنوات المتشفرة وهو هايبقى عارف اللى جاى
لكن أبقى قاعدة جمب أخويا وللا أبويا ألاقى مشهد جنسي عيني عينك....لأ
لأ يا ساويريس
شاطر بس تطلع تعيط يا عيني على الموظفين بتوعك اللى اتخطفوا...وتقول أصل أنا رااجل صعيدي
لأ فعلا هي دي أخلاق القرية أمال ايه يا رجال
أجذب الناس للجنس والمشاهد العارية وبس وإن شالله ما حد اشتغل وإن شالله ما حد ركز في أي حاجة غير الجنس
أخلى الناس كلها مدمنة بورنو أكتر ماهما مدمنين يللا ما هي خربت
إلاهي تخرب فوق راسك قادر يا كريم
أقوللك يا ساويريس يا صعيدي، أنا عايزاك تعيط أوي لما معدلات الاغتصاب تزيد من 20.000 ألف في السنة لمية
عايزاك تبكي بدل الدموع دم لما الستات عقدهم تزيد بسبب التحرش الجنسي اللى هو أصلا سمة متأصلة من سمات الشارع المصري
عايزاك تشد في قرعتك لما ماتلاقيش حد عدل يشتغل معاك عشان الناس كلها مابقتش بتفكر غير في الجنس من كل المناظر اللى بتشوفها
لأ مش بفلوسي يا ساويريس
مش هاشترك في موبينيل
مش هاتفرج على نوديتي تي في
مش هاشترك في لينك دوت نت
ساويريس وكل اللى بيهدموا بدل ما يصلحوا...يحموك في كنكة
جتكوا القرف مليتوا البلد

14 comments:

أحمد said...

هو طبعا حضرتك تبقي عبيطة لو فاكره ان سويرس محتاج فلوسك

ثانيا
ايه خطورة ان فيلم يتعرض كامل حتى لو فيه مشهد جنسى، يعنى مثلا انت لما شفتى المشهد حصل لك حاجة، فقدتى غشاء البكارة بتاعك، جت لك سكتة قلبية، وبعدين الناس اللى زيك لما هم عارفين ان القناة دى وحشة بيتفرجوا عليها ليه؟


ما تسيبوا الناس تتفرج
----------
نقطة اخيرة
حضرتك فاكره ان الحاجات دى بترفع نسب الاغتصاب
اسمح لى اقولك انك غلطانة تماما

Ahmad Hegab said...

انا مبقيتش أتفرج عليها من فترة بسبب مشهد جنسى عابر !! و اللى عايز يتفرج ممكن يجيب القنوات الجنسية ما هى أكتر من الهم على القلب بس المصيبة ان حد من أخواتى يكون قاعد و يحصل حاجة زى دى

Wild at Heart said...

أستاذ أحمد
أنا مش محتاجة أدافع عن نفسي بس أنا هأرد على التعليق اللطشيف ده
أنا عارفة إن ساويريس مش محتاج فلوسي ولا فلوس الكام ألف واحد اللى محتجين على القناة، بس ده صورة الاحتجاج بتاعنا، ومن حقنا إننا نحتج على حاجة مش عاجبانا
ثانيا
واضح إن حضرتك متعود على مشاهدة البورن فا مش فارقة معاك وحضرتك حر في كده لكن اللي يتعرض على التليفزيون لازم يبقى بحساب، لأن انت بتأثر على الناس بشكل مباشر كأنك قاعد معاهم في البيت يعنى ينفع يبقى في ضيوف أصحاب الزوج موجودين في الصالون تقوم المدام طالعة عليهم عريانة؟
وأنا لما لاحظت موضوع الرقابة ده كنت لاحظته في فيلم The Exorcist اللى هو فيلم رعب لاحظت إنهم مش قاطعين حاجة واستغربت
يعنى الرجالة لما تشوف العري بشكل مستمر مش هتتأثر؟
طبعا واحد وسخ ومتحرش زيك لازم يشير عني بالشكل ده، روح سيب وساختك في حتة تانية

Wild at Heart said...

ahmed H
المدونة منورة
وأنا موافقاك تماما
اللى عايز يتفرج يروح على الأوروبي ولا النت بس واضح إن ساويريس عايز يريح الشعب

واحد من الناس said...

اوافقك الرأى تماماً، معاكى حق..
بس للأسف دلوقتى القنوات دى مش بتدور على الأخلاق ولا على الأثر اللى بتسيبه عند المشاهدين..
المهم ان القناه تجذب اكبر عدد من المشاهدين والإعلانات..بغض النظر عن المحتوى..او تى فى صحيح فيها كتير برامج كويسه ومفيده لكن فعلاً مسألة الرقابه عندها سايبه

Yuri Eisenheim said...

ههههههههه ضحكت ملىء فمى ( حلو شويه الفصحى دول )

لما شوفت تعليش الباشمهندس احمد على الموضوع انا بس عاوز اسال حضرتك سؤال هو لو ماما يعنى لو انتا عندك ماما او اختك قاعدين جنبك وجه مشهد زى كدا مش هقولك قناه بورنو لا هقولك على او تى فى يا ترى يا عم الحج هتسيبهم يتفرجوا ......

ثانيا لا هو محتاج فلوسى وفلوس غيرى ولو كلنا قاطعنا منتجاته هيتعلم الادب اصل دا واحد من الناس اللى ملت كرشها على الاخر وعشان كدا مش هيتادب الا بكدا

ثالثا لمعلوماتك او لمعلومات الكل دا واحد بيشتم فى الاسلام وفى الحجاب ومقضيها ومسخر فلوسه لكدا يبقى نقاطعه ولا ما نقاطعش

انا معاكى يا wild فى كل اللى بتقوليه وانا عن نفسى كاتب شعار الحمله عندى واللنك وياريت كلنا ننشر الكلام دا عندنا عشان اللى ميعرفش يعرف

بس
yuri

أسما said...

ايه يا نو نو ما تخللي الشعب يعيش ...هاهاها انا طبعا باهرج انا معاكي انها حاجة محرجة لو بابا او اي حد قاعد بيتفرج معايا و ظهر مشهد زي ده بس الحقيقة انا مش هاحس بنفس الاحراج لو كنت باتفرج لوحدي و هاكتفي باني اغير القناة و بعدين يا قمر المشاهد دي عمرها ما تيجي فجاة لازم لازم في تمهيد قبلها انت اكيد بس مخدتيش بالك المرة دي... كمان المشاهد دي مش دايما قذرة ساعات بيبقي الهدف من وراها رومانسي انا طبعا مش باشجع ده بس برده عاوزة اقول it's not that bad و مش صح اني اقاطع القناة عشان مشهد عابر احنا كبار و بنعرف نميز و القناة فيها حاجات كتير تانية نتفرج عليها

Yuri Eisenheim said...

لازم كلنا نقف قصاد الناس دى لازم كلنا نقف مع بعض ونعمل حلمه لمقاطعته
والا بقى ....
ما تزعلش على اختك او بنتك لو لقيتها مضقياها مع حد على النت
ماتزعلش لو لو بنتك انشاء الله تقولك يا بابا دا عادى صاحبى وبيذاكر معايا
ماتزعلش لو ما بقاش حد فى عالمنا بيبكى على الاخلاق اللى كلنا ما حافظناش عليها

Anonymous said...

أنا فعلاً مش فاهمة أحمد ده مشكلته إية....فيه حاجة إسمها غضوا البصر عن القرف ده....و بعدين مفيش حاجة إسمها خلى الناس تتفرج.....they're sick ppl...خلى عندك كرامة...و الموضوع مش بس موضوع إنك قاعد فى وسط أهلك الموضوع هو شكلك قدام نفسك و الأهم قدام ربنا

ٍٍs.AlSaady

Wild at Heart said...

واحد من الناس
عشرة على عشرة حضرتك
مفيش تفسير تاني غير الحاجة الجنونية للكسب المادي على حساب الأخلاق واحترام المشاهد

Eisenheim
ألا انت جايب اسمك العجيب ده منين
هو فعلا ساويريس كان قال تعليقات على الحجاب بس وأنا شايفة إن رأيه مش هيأثر في المحجبات
لكن الموضوع مش "حرب من واحد مسيحي ضد المسلمين" الموضوع حرب من ناس ماعندهاش أخلاق ضد ناس محترمة عايزة تتفرج على إعلام محترم سواء كان المشاهدين مسيحيين أو مسلمين أو حتى علمانيين.

Isolde
واحشاني يا بنوتة
الأزمة مش في مين قاعد بيتفرج معايا، أكيد لو أبويا أو أخويا حيبقى موقف مهبب بس حتى لو واحد قاعد بيتفرج لوحده أكيد هيتأثر بالسلب زي ما حصل لي

Anonymous,
You're talking from a religios point of view, and I'm with you all along. However, even ARELIGIOUS ppl should stand up for this non-ethical media.

الشعب اللى ماعندوش أخلاق لازم ينهار

Yuri Eisenheim said...

هههههههههه
ايزنهايم دا نطقها يا ويلد وجبتها من فيلم انا بحبه جدا
انا ماقولتش انه حرب يا نهه انا كل اللى بقوله انهم مش هييجوا بالكلام

Anonymous said...

صديقتي العزيزة جداً نهى

أول مرة اقرأ حاجة وأبقى مش موافقاكي، المهم ده شئ كويس لأن كان بقالنا فترة بنوافق بعض على كل حاجة وبتبقى حوارتنا قصيرة، "الخناق" لطيف برضو :)

بصي يا ستي
أنا رأي بصراحة شديدة أن
1- انعدام الرقابة على الأعمال الفنية ده شئ أساسي وضروري. مدش قال ان المشاهد العاطفية/الجنسية دي أفلام جنس، أكيد انت فاهمة كويس ان فيه فرق من المضمون والأهم من الغرض من صنع الفيلم
2- الحقيقي والعلمي، ان من اسباب ان الناس اللي بتضايقك وبتضايقني في الشارع بيبقوا بالوساخة والمرض ده مش انهم بيتفرجوا على أو تي في ، بل لأنهم معندهمش اي فكرة عن الحجات دي خالص وأي حاجة بسيطة زي ان واحد مريض يمد ايدهويلمس دراعك في الأوتوبيس بتحسسهم بالاكتفاء الجنسي. الحقيقي ان لو فيه طرق متعدده للوصول للحجات دي سواء بشكل تعليمي أو بشكل عابر أن الحياة هتبقى أسهل
3- فهمت من كلامك ان الفيلم اللي كان شغال كان فيلم رعب- ياعني يا سيتي المشهد أكيد مكنشي مثير و في سياق تاني خالص عن أفلام الرعب
4-لاحظتي قبل كدة ان قناة زي قناة mbc السعودية المحترمة قوي قوي بتقطع اقل تعبير عن الحب والتواصل مبين الست والراجل زي البوسة ولكن بتجيب افلام بشعة وليانة تقطيع ودم وشنق وقرف زي SAW
من الساعة 8 وان اي طفل ممكن يفتح التلفزيون ويشوف الخرة ده

أنا رأيي وباختصار ان الرقافة على الأعمال الفنية سواء الأفلام أو الموسيقى أو الرسم أو الكتابة لأي اسباب دينية أو سياسية أو غيرها ده عمل اجرامي ولازم ينتهي

هتقوليلي طب ماانت لسة قايلة ان فيلم المنشار ده بيتعرض على ام بي سي هقولك ام لو وسعة فرص التعبير والأبداع بدون قيود سواع من الرقابة في مصر أو من متطلبات السوق في هوليوود، المقاييس هتتغير ومش هيبقة فيلم المنشار ده فيلم مشهوور قوي كدة وبيتعمل منه جزء تاني وتالت كمان

الحقيقة ان كمان ممكن تكون الحجات اللي فيها عنف وجنس مايناسبشي الأطفال يتنوه عليها قبل واثناء الفيلم زي ما أو تي في و قنوات الأفلام الأجنبية بيعملوا، والأباء المنتبهين بيقدروا يشوفوا الفيلم ده يصلح للأطفال أو لا يصلح

أنا مبدافعشي عن ساويرس ولا عن قناته المغتربة السخيفة، أنا بدافع عن الحاجة الوحيدة اللي في رأيي كويسة في القناة دي وهي أنه بيسمح بحرية التعبير "نسبيا" سواء في البرامج السياسية أو في الأفام

المهم أنا مهتمة اني اناقشك في الموضوع ده واعرف رأيك في ردي

سلام

Wild at Heart said...

atralnada
1) وأنا محترمة رأيك جداً بس الرقابة ضرورية في كتير من الأحيان. المفروض اللى يعرض حاجة على التلفزيون يحط في دماغه ثقافة المتفرج...الثقافة العامة (مع وجود استثناءات طبعاً) في مصر بتقول إن ماينفعش تطلعلى واحدة عريانة فجأة كده على التلفزيون، ده مشهد صادم وبيخبط الواحد بطوبة كده في نافوخه، العري عامة غير مقبول في مصر ودي حاجة لازم يحترمها القائمين على القنوات دي. بس المشاهد العاطفية عادي مافيهاش حاجة بالعكس ده الواحد ممكن ياخد منها أفكار =)

2) والله يا بنتي حتى اللي بيعرف يوصل للمشاهد العارية ممكن يكون بيتحرش بالستات، مانقدرش نحط قاعدة عامة للموضوع ده، وأصلاً أنا مش فاهما لهم حاجة خالص، بس أنا شايفة إن الرجالة بيتأثروا بمشاهدة العري فيبقوا عايزين يشوفوه على الحقيقة!

3) موضوع أفلام الرعب ده بقى أنا متفقة معاكي فيه تماماً، الفيلم اللى أنا بتكلم عنه كان فيلم "اجتماعي، لكن قبل كده اتفرجنا على فيلم مستحضر الأرواح وده أكتر فيلم رعب اتعمل في تاريخ السينما...الفيلم كان معروض على او تي في من غير رقابة ومن غير حذف للمشاهد حتى بابا قال ساعتها "ماينفعش يجيبوا الأفلام دي لحسن الأطفال يشوفوها" ومشاهد القتل دي بتجيب للواحد تبلد مشاعر فييجي بعد كده يشوف جثث حقيقية لأطفال فلسطينيين ولا لبنانيين مايحسش بأي حاجة كأنه لسه بيتفرج على فيلم رعب.

الرقابة على الأعمال السياسية أنا رأيي برضو إنها مرفوضة عشان أكيد بتكتم صوت الحق لمصالح شخصية...أما الأعمال الدينية دي موضوع حساس شويتين وممكن لو الرقابة اترفعت يعمل أزمات وحروب كمان...

بالنسبة للأطفال المأسوف على طفولتهم، مش هاتفرق يا ندى عشان مفيش دلوقتي أطفال بتنام في الأجازة قبل الساعة 7 الصبح ولما تلاقي فيلم مكتوب عليه للكبار وبس هايشد انتباههم أكتر إنهم يقعدوا يتفرجوا

أنا فعلا بقيت أخاف أتفرج لحسن ألاقي مشاهد جنسية تفضل مأثرة عليا ومخلياني مش عارفة أشتغل...

الرقابة طول عمرها موضوع معقد والناس مابتتفقش عليه...you and I are no exception =)

wael said...

أشكرك