Friday, May 09, 2008

هنا الميكروباص

امبارح كان تالت يوم بعد رفع أسعار البنزين...الناس مش طايقة نفسها ولا طايقة بعض...أو يمكن هما طول عمرهم كده بس أنا حاسة إن هما كده اليومين دول عشان باعكس إحساسي عليهم وبأطبق نظرية "كن جميل ترى الوجود جميلا، ومخلياها "كن متنرفز ترى الوجود متنرفزا
المهم فضلت واقفة في عز الحر إن المينيباص اللى رايح الحي التامن ييجي ماجاش...ولاحظت إن المينيباصات التانية حطت يافطة كده "الأجرة 1.25"، قمت مرجعة العشرة صاغ اللي كنت مجهزاها في إيديا (برج العذراء بقى تقولوا ايه) بمنتهى الاستسلام وطلعت بدالهم ربع جنيه من لحمي الحي. المينيباص مجاش...قمت راكبة بداله ميكروباص من بتوع الجمعية التعاونية لنقل الركاب لحد أول مكرم عبيد ولقيت الأجرة بجنيه
بعد شوية راجل عجوز طلع وسأل الأجرة بكام؟ ولما عرف الراجل اتجنن
معقول؟ مش ممكن! دي الميكروباصات بقت بجنيه ونص...ده انتوا حلوين قوى بقى...دي الأجرة زادت في كل حتة...مش ممكن
وابتسمت لإني أول مرة أشوف حد فرحان كده من زمان
بس وأنا راجعة لقيت حاجة غريبة
لقيت مينيباص خدمة مميزة برضو زي الأول تمام مكتوب عليه "الأجرة جنيه ونص"ومش مكيف ولا حاجة
ههههههه


ملحوظة هامة
الناس على الفيسبوك استلهمت فكرة من أمريكا لإجبار شركات البنزين إنها تنزل الأسعار؛ يقاطعوا أكبر شركتين "موبيل والوطنية" ويمونوا من الشركات التانية الصغنطوطة لحد ما الشركات الكبيرة تنزل الأسعار
أنا بأييد أي فكرة فيها احتجاج على الظلم...مع إن المستفيد من زيادة الأسعار في الأول وفي الآخر الحكومة
وبعدين في حاجة بقى
أنا أطالب بالكشف على القوى العقلية للوزير اللي قال "احنا بناخد من القادرين وبندي الغير قادرين"
هما اللي بيركبوا المواصلات دول مين؟
مش دول الغير قادرين...الواحد فيهم بيركب تلات أريع مواصلات في اليوم ممكن بالمنظر ده يدفع مش أقل من عشرة جنيه في اليوم يعني 200 جنيه في الشهر مواصلات بسسس
إنت بتفهم منين حضرتك
؟

4 comments:

Yuri Eisenheim said...

يا نهه الناس دى مش هتغلى غير لما تكون متفقه مع بعض
هنا مش زى امريكا هنا فيه اختراع مصرى اصيل اسمه الكوسه
هنا القاهره

واحد من الناس said...

يا بنتى الناس بتوع الحزب الوطنى دول متبرمجين، ياخد الأمر ينفذ على طول من غير ما يفكر...
ده يوم ما أعلنوا الزيادات منى الشاذلى فى العاشره مساء كانت جايبه واحد من اياهم دول، وعمال برضه يقول الكلام الأهبل ده لا مساس بمحدودى الدخل ...
ولما جه يتكلم عن البنزين، حسب ان الزياده فى السعر ربع جنيه مع انها 45 قرش...!!!
اهو ده واحد وافق على القرار الصبح ولغاية بليل فى البرنامج ماكنش عارف ان القرار اللى هو وافق عليه ده هيزود البنزين اد ايه؟؟ بيحركوهم بالريموت كنترول.

Wild at Heart said...

Yuri
طب هما أساسا ماتفقوش مع بعض..ده كل شركة نقل "متميز" مختارة سعر على مزاجها

واحد من الناس
أولا المدونة نورت
طب ايه الحل دلوقتي؟
أنا شايفة الحل إننا نقاطع الشركات أم 1.50 دي (واخدين الزيادة ال 45 قرش من كل راكب!!!!!
ونقاطع محطات البنزين ونفضل ننشر البلاوي دي على المدونات يمكن الناس تقرا وتقول لبعض)

Anonymous said...

اللي انا مندهش له الجيش مش بينقلب ليه علي ابن الهرمة اللي قاعد زي الجاموسة بقاله 30 سنة في السلطة مش عارف يعمل حاجة غير تربية القطط السمان