Friday, July 03, 2009

هو الأمن حيتحرك إمتى؟

إمتى؟ لما تموت كذا واحدة زي ما أميرة ماتت وهي بتدافع عن نفسها؟
النهاردة الأهرام نشر خبر سواق توك توك في المنيا قتل واحدة بالمطوة عشان هزأته بعد ما عاكسها
إيه القرف ده؟ الله ينكد عليكوا عالصبح
يعني من ساعة ثورة التحرشات اللي بدأت في أكتوبر 2006 وإحنا عمالين نقول يا بنات ماتسكتوش، ماتسيبوش حقكوا، اللي يتحرش بيكي جرجريه على الأقسام
في الآخر هو ده مصير اللي تدافع عن نفسها؟
يعني الكلام اللي قلناه واللي قلته هنا خلاص نشد عليه السيفون؟؟؟؟
نعمل إيه طيب، مفيش حاجة نافعة
السكوت بيفتكروه رضا
والكلام بيقتلونا عليه ونتشتم ويتمسح بكرامة اللي خلفونا الأرض
لو احتشمنا ولا قلعنا مش بيسيبونا في حالنا
لو قلنا مش حانشتغل وننزل الشارع أهلنا مايصرفوش علينا (يصرفوا علينا منين أساساً هي ناقصة؟)
لو رفعنا قضية يقولوا علينا إسرائيليين
نهبب إيه في عيشتنا طيب عشان تستريحوا وتحترمونا شوية؟ شوية احترام بس مش أكتر
يعني لو كان في دورية شرطة أو أي ظابط يوحد الله كان الموضوع وصل للقتل؟؟
مش كانت استغاثت بيه والواد اتاخد في ستين داهية وخلصنا
زي قبل كد ظابط بيقول لي ما إحنا مش حنقدر نوقف الجريمة
مش حاتقدروا توقفوا الجريمة بس تقدروا تعملوا واجبكوا
صح الكلام ولا أنا اتهبلت في مخي؟
طبعاً أنا أقصد الضباط اللي عارفين شغلهم
مش بتوع المظاهرات ولا أمن الدولة
ما هو أكيد ربنا ماخلقناش كلنا بالمناظر دي
وطبعاً ماحدش من أهل البنت حيطلع يحرق بيت الواد ولا يتخانق مع أهله زي ما حصل في الدقهلية على حاجة ساقعة
ماهي الحاجة الساقعة ليها تمن والضنا غالي
لكن البنت أكيد كانت لابسة لبس مثيييييير وشتمته شتايم وحشة فتستاهل اللي يجرى لها
مش كده؟
نعمل إيه طيب في عيشتنا برضو مش عارفة
نشيل مطاوي إحنا كمان؟
نشيل مطاوي؟
يعني لو حضرتك في وسط خناقة واللي قدامك بيضربك بعصاية
ينفع تضربه بصوابعك؟
مش لازم تلاقيله حاجة يخاف منها وتقدر تدافع بيها عن نفسك
هي بقت كده يعني؟
جتكوا القرف



2 comments:

marooned84 said...

Respect :)

magi said...

الله يرحمها بس فعلا الوضع الامنى فى الشارع بقى صعب جدا وحتى لو البنت قادره انها تحمى نفسها سواء بالكلام او الفعل الناس دول بيبقوا زى بلطجيه كده وممكن اوى يحصل زى محصل لاميره