Tuesday, June 30, 2009

عمال طنطا للكتان والزيوت أجدع من أساتذة الجامعة

ناس جدعة ومتمسكة بحقوقها وأهم حاجة إنهم متفقين على الإضراب
يعني مش تسع عشر أنفار هم اللي في وش المدفع والباقي ماشيين جوه الحيط
تيجي بقى تبص على أوضاع أساتذة الجامعة تلقى العجب
ماتقولش لا دكتوراه ولا أستاذية ولا كلام فارغ
عشان أحطكوا في الصورة بس، إجمالي مرتب المدرس (اللي معاه دكتوراه بتاع 1400 جنيه)
والأستاذ المساعد 2000
والأستاذ نادراً ما تصل إلى 3000
أما بقى معاونو هيئة التدريس من معيدين ومدرسين مساعدين فمرتبهم يتراوح من 600 ل1300 جنيه
ده المفروض واحد محتاج يصرف على أكل ومواصلات أو بنزين عربية وعلاج وهدمة نضيفة يقف بيها قدام الطلبة وأقساط شقة ولا إيجار وكتب
كله كوم وآخر بند ده كوم تاني
دلوقتي عشان تجيب كتاب عدل مصر مفيهاش كتب، مصر تلاقي مثلاً أعمال شكسيبير في كل المكتبات لكن المراجع شبه مستحيل إنك تلاقيها، لازم تطلبها من بره
وعشان تطلبها من بره ممكن تلاقي الكتاب واكل ربع أو نص مرتبك بمصاريف الشحن
طبعاً ده عشان مش حاتفكر تجيب الكتاب اللي تمنه أكبر من مرتبك
وعشان تشترك في بريتانيكا ولا كويستيا ولا جيه ستور الظلمة الكفرة اللي مش عاملين حساب أساتذة الجامعة المحترمين من العالم التالت دي ميزانية لوحدها ممكن توصل ل250 في الشهر
أساتذة الجامعة بدل ما يطالبوا بحقوقهم مشيوا في كطرق ملتوية كل واحد في سكة
الستات اعتمدوا على إجوازهم
والإجواز اعتمدوا على الإعارة والمرمطة والشحططة
والمرفهين شوية اعتمدوا على الإعارة الداخلية
لكن طبعاً في شريحة كبيرة منهم اعتمدوا على الكتب اللي بيطبعوها
وبقوا بيحطوا ورقة أصفرا كده جوه الكتاب نكتب فيها أسامينا عشان يتأكد إن الدفعة كلها اشترت الكتاب أبو 25 جنيه
أو الدروس الخصوصية خصوصاً في الكليات العملية
يعني واحد مذلول بدل ما يتلفت ويقول للي ذاله كفاية كده
يقوم ذالل الطلبة وأهالي الطلبة
ولا كأن الطلبة بيدفعوا دم قلبهم على تعليم مش بيستفيدوا من معظمه
ومعاونو هيئة التدريس الغلابة اللي مايقدروش يطلعوا إعارة بقوا يشتغلوا نص الوقت في أماكن تانية
ويقعدوا يجروا هنا وهناك بدل ما يركزوا في الهباب الدراسات العليا
بعد كل ده وتيجي حركة 9 مارس تقول لهم إعملوا إضراب
لااااا حياة لمن تنادي
سألت دكتورة في قسم إنجليزي ليه مفيش دكاترة كتير حيسمعوا لفكرة الإضراب
قالت لي عشان في ناس حريصة إن تبقى علاقتها كويسة مع الناس اللي فوق
طب لما تبقوا تتوكسوا بفشل كلوي ولا سرطان وتكعوا دم قلبكوا علاج إبقوا خلوهم ينفعكوا
معلش أصل أنا مبقوقة حبتين
إيه اللي يخلي بني آدم محترم يستحمل يدرس في قاعة فيها 500 طالب من غير تكييف وصوته يروح وكباية الشاي على حسابه وفي الآخر يطلع الوزير يقول له مفيش جودة مفيش زيادة؟
عارفين الجودة دي عبارة عن إيه
إن الدكاترة يتواجدوا في مكاتبهم 7 ساعات في اليوم أربع أيام في الأسبوع ويقدموا تقارير آخر الترم بالحاجات اللي درسوها
ولا كأن الدكتور المفروض يعمل أبحاث ويروح مكاتب ويشتغل على الكمبيوتر ويلاقي أساساً كرسي يقعد عليه وتكييف شغال يرحمه من نار جهنم دي
كل القرف ده والدكاترة ماتفقوش على حاجة، اشتغلوا كنترول أربعين واحد في أوضة واحدة حاضر، إمضوا حضور وغياب زي الشطار وأنا أديكوا العيدية حاضر
كأن اللي بيدرسوا دول واللي خلاص طلعوا عالمعاش ولاد البطة السودا واللى قاعدين في مكاتبهم هما اللي بيطبقوا الجودة
الدكاترة كلهم بيكلموا في بعضهم وبيشتكوا في بعضهم لكن قليل أوي ما تلاقي حد بياخد خطوة واقعية عشان يحسن ظروفه المهببة دي
لإن الدكاترة لو اتفقوا يعملوا إضراب أو يحجبوا النتيجة زي ما أساتذة جامعة المنصورة عايزين يعملوا الدنيا بجد حاتقف
الحياة حيصيبها شلل
لإن كل واحد منهم بيدرس في المتوسط 500 طالب في الترم
المفروض الدكاترة يقبضوا قد ما بياخدوا دلوقتي مرتين تلاتة (هبلة أنا عارفة)
ما هو مش معقول مساعد الوزير اللي بياخد 250 ألف في الشهر يبقى أحسن منكوا
عيب يا أساتذة تقبلوا المهانة دي وتتذلوا عشان كام قرش زيادة
عييييييييب


5 comments:

marooned84 said...

elli enti ma 2oltehosh en mo3zam el dakatra btsallek 7alha btoro2 okhra, sawa2 fel 7ezb el wakani aw mostadhar fe wzara aw keda. el dakatra 3mrohom ma 7ib2o mo7tarameen w ytalbo be 7aga 3shan homma 3arfeen markazhom kwaies, w 3arfeen ennohom ma yeswoosh el badla elli homma labsenha lw fee t3leem bgad, da tb3an mo3zamhom, el kwaies biemshi w yshof 7al sabeelo fe 7etta t2adaro.

Wild at Heart said...

مش فاهمة.
بس الدكاترة اللي بيتجهوا للسياسة والأحزاب قليلين في جميع الأحوال، مش نسبة تذكر، نفسي أعرف الباقي فين وساكتين ليه وعايشين إزاي في الغلب ده؟

marooned84 said...

awwalan ana olt el 7zb el watani ma 2oltesh siasa, w fee far2 kbeer awi. elli bittegeh lel 7zb el watani hwa elli bitra2a w bit3ayen 3ameed w ra2ees gam3a wellazi menno, fa she2 tabee3i mo3zam el dakatra yettgeho lel 7zb el watani 3shan el tar2eyat wel mo7sobeyat. 2al siasa 2al! hwa fee fe masr siasa aslan?

Wild at Heart said...

طب براحة علينا يا عم.
الحزب الوطني عمل سياسي طبعاً مش معنى إنها سياسة قذرة قايمة على الرشاوى والنهب والبلطجة إنها ماتبقاش سياسة.
وفي أساتذة جامعة برضو إخوان وكانوا بيتظاهروا مع الطلبة لما البلطجية دخلت الجامعة وعجنتهم وفي أساتذة في كفاية إلخ.

marooned84 said...

berra7a khales aho hwa ana a2dar gher bera7a? e7na nas msh fel 7zb w 3la 2add 7alha bardo :)

el moshkela en regal el 7zb homma elli bit3ayeno... zy manti 3arfa kol el mnaseb fel gam3a bel ta3yeen, y3ni 7atta msh mkallefeen nfsohom y3melo entkhabat w yzawaroha zy bta3et re3ayet el shabab!

3arfa enti 7araket msh 3arek kam fe shahr kam di? mtalebhom komedeya awi, w m3 zalek msh 7atet7a2a2 bardo!