أي حد مابيفهمش أ ب سياسة حيفهم إن طريقة مصر في التعامل مع قافلة شريان الحياة والحرية لغزة تميزت بالغباء السياسي الشديد...السلطات المصرية المفروض إنهم عارفين إن الناس مش سايبة أهلها وبلدها ودراستها وشغلها ومتشحططين ونايمين على الأرض ودافعين مبالغ عشان يقولوا لهم هش يتهشوا، منظمو القافلة ضحوا بحاجات كتير أهمها سلامتهم وحياتهم عشان يقدروا يناصروا غزة ويقدموا للمحاصرين اللي يقدروا عليه من المساعدات...
دلوقتي أنا ماقريتش الخبر بالتفصيل لإني لا أثق في معظم وسائل الإعلام لكن أي سيناريو حصل معناه إن السلطات المصرية متحملة المسئولية...لو الفلسطينيين هما اللي بدأوا الضرب ده لإن الأمن المصري مستأسد عليهم وسايب الإسرائيليين ينتهك الحدود ويقتل المجندين من غير ما مصر تقول بم حتى...ولسه امبارح الشيخ حازم أبو إسماعيل (من القلة أصحاب الضمير في الفضائيات) قايل إنك كل ما تخنق ناس أكتر كل ما مقاومتهم بتزيد، لما مصر محاصرة غزة وكمان تبني جدار عازل عشان يموتوا ويستسلموا لإسرائيل وده مش حيحصل يبقى لازم ده يسبب غضب ويشعل الموقف أكتر ما هو متهبب، ولو المصريين هما اللي بدأوا الضرب وده الأرجح لإن منظمي القافلة اتضربوا أصلاً من وهما في القاهرة برضو مصر متحملة مسئولية المجند اللي مات...وطبعاً دلوقتي بقى في إيديهم دليل واضح جداَ إن مصر أمنها القومي مهدد وإن الفلسطينيين بيضربوا النار علينا!
والكلام ده مش أنا بس اللي بقولوه، ده عماد الدين أديب حبيب الحكومة قالها والمستشار جودت الملط قالها، إن سوء إدارة الأزمات مستشري على جميع المستويات...والقافلة كانت ممكن تعدي بسهولة أكتر من كده بدل الفضيحة اللي اتفضحناها واللي هندفع تمنها غالي قوي وأهو أول مصري دفع التمن مات النهاردة...لكن الأمن طبعاً لا يرحم ولا يخلي رحمة ربنا تنزل.
هكتب إن شاء الله تدوينة عن رأيي في الجدار قريب.
4 comments:
اعتقد ان ممكن يكون فى اسلوب افضل من كده للكلام عن بلدك اللى هى بلدى
خصوصا ان من السذاجه اننا لسا مش شايفين ان اسرائيل بتحاول بكل قوتها انها توقع بين العرب ومصر
مش هنيجى احنا كمان يامصرين ونخربها بلسانا ونجرا غيرنا على شتيمتنا لما احنا نشتم بلدنا بلسانا
بعدين باسم الله ماشاء الله
الناس كلها بقت مخضرمين فى السياسة من امتى .
اللى بتعب منه فعلا ان العرب كلهم كل واحد منهم قاعد فى بيته عامل رئيس جمهورية وقاعد ياخد فى قرارات ويحل فى مشاكل العالم , مع انك تبصله جوه شغله تلاقيه مش عارف يحل مشاكل المكتب الصغير اللى هو رئيسة .
بس اللى فالحين فيه نكلم فى الحاجة اللى مش فى ايدينا ومنقدرش نعمل فيها حاجة .. وطبعا احنا عارفين مين اللى بيعمل كده
لاكن اللى انا اتعلمته ان الراجل الصح هو اللى يشغل باله اوى باللى تحت ايده يعنى شغله ومسئوليته اللى ربنا هيحاسبه عليها .
لكن اذاى كده الحياة تبقى مملة جدا لو نعيش من غير ما نكلم فى اى حاجة احنا مش شايفين كل جوانبها
لازم تلاقى حد نايم فى سريره وبيتهم حكومة بلد اى كانت بالغباء السياسى وقاعد يستنتج ويحكم ويخطط للتنمية وهو اصلا مش عارف ينمى مهاراته الشخصية
في فرق بين إني أقول المصريين كلهم متخلفين وإني أقول الحكومة بتاعتنا غبية وواضح جداً من التدوينة إني بقول إن الحكومة عندنا هندها سوء إدارة.
مش عارفة حضرتك افترضت منين إن أنا واحدة فاضية ومش لاقية حاجة أعملها عشان كده بتكلم في السياسة وإن كل اللي بيتكلموا في السياسة زيي حضرتك مش شايف إن ده حكم مسبق وإنت ماتعرفنيش شخصياً، وبعدين إزاي مدونة غلبانة ممكن تعمل قرار سياسي مش فاهمة؟ حتنفذه إزاي يعني؟
فكرة التدوين والتظاهر أساساً قايمة على إبداء الرأي مهما كان الرأي ده لإن الحكومة هنا مش بتعبر عن رأي الشعب ولا رغبته ومفيش غير الحكومة واللي عايزين يستفيدوا من الحكومة لحد دلوقتي هم اللي أيدوا الجدار. مش معنى إن أنا مش باشتغل في السياسة إن أنا مافهمش فيها ودلوقتي حصلت أزمة في البلد والناس بتقول رأيها حضرتك متضايق ليه بقى؟
Post a Comment