Thursday, July 19, 2007

عندما تهون أعراض النساء

امبارح اتصدمت لما قريت فى الأهرام ان موظف فى المعاش "اعتدى" على بنت عديلته كذا مرة و اتسبب فى حملها و فى الآخر كل اللى اخده تلات سنين!!!!!!!!
تلات سنين و فى تقرير تانى فى نفس الجرنان بيطالبوا بالابقاء على حكم الاعدام للمغتصب و عدم السماح لأى رأفة أو استثناء!!!!!
طب لما هو عقوبة الاغتصاب المفروض اعدام...ازاى المجرم ده ياخد تلات سنين بس؟ فهمونى طيب يا بتوع القانون ده راااجل كبير و شايب و قدراته العقلية سليمة و قارنوا الحامض النووى بتاعه بحامض الطفل لقيوه متطابق يعنى التهمة ليس لها مجال للشك ازاى ياخد تلات سنين عايزة افهم؟
أنا فاكرة من كام سنة حصلت جريمة اغتصاب مشهورة كانت ضحيتها معيدة فى الجامعة, و المتهم اخد اعدام...ايه طيب الاختلاف هنا؟ ولا هو القانون كمان فيه كوسة و خيار و فاقوس!
يعنى تخيلوا البنت دى دلوقتى (البنت دى غير هند اللى اتعرضت للاغتصاب و هى عندها حداشر سنة..بس التحقيقات لسة ماخلصتش فى قضيتها ) بس تخيلوا لو مغتصبها خرج بعد اتناشر شهر (لحسن السير و السلوك مثلا) حيبقى احساسها ايه؟ مش كفاية شرفها راح و حياتها اتدمرت وطفولتها اتوأدت قبل الأوان بأوان. كمان نارها ماتبردش و القصاص مايتمش!
تلات سنين!
هو عورها بموس و لا ضرب معاها بانجو...ده اغتصبها أيها القانون , اغتصبها. و مش عارفة ليه جريدة الأهرام بتجمل الجريمة و بتهدى النفوس وبتقول "اعتدى عليها" كأنه مثلا لطشها قلمين أو شد شعرها بدل ما تقول اللفظ الصريح "اغتصاب"
ساعتها افتكرت مشهد اغتصاب مديحة كامل فى سجن النساء على ايد سناء يونس فى فيلم (المزاج) ,بغض النظر عن اختلاف التفاصيل, و ان اللقطة اللى بعدها كانت مديحة فى حالة صدمة, و لكن طلع السبب ان النزيلات بيتعاطوا مخدرات جوه السجن و هو ده اللى صادمها!!! كأن الاغتصاب ده شىء عادى و ممكن يتنسى...كأنه مجرد موقف صعب و لو طبطبت على الضحية و قلت لها معلش...حاتنسى!!!
لكن انا مستغربة ليه؟
أعراض النساء بتهون علينا كل يوم بعد التانى و كل يوم اكتر من التانى, بتهون علينا لما تتعرض بنت من أسرتنا للاغتصاب و مانبلغش خوفا من الفضيحة, و نعزلها عن العالم , لما بنعتبر ان اى بنت ماشية فى الشارع حلال فيها التحرش و ان هى السبب , لما بنشوف البنات بينتهك أعراضها و نقف نتفرج كانه مشهد مثير, لما بنشوف بنت بتدافع عن نفسها ونقوللها " اسكتى بلاش فضايح, لما تستمر تحرشات وسط البلد لساعات طويلة على مرأى و مسمع من الشرطة من غير تدخل "
لما أعراض نساءنا احنا يا عرب تهون علينا فاضل ايه؟

3 comments:

Anonymous said...

موضوع هند ده جالك علي الطبطاب يا ست نهي عشان تقولي براحتك اوي شفتم اهو البنت تم اغتصابها عشان مكانش عندها معلومات جنسية اصل لو كان عندها معلومات في الجنس مكانش حصلها اللي حصل وبناء علي ذلك لازم ندرس الجنس في الحضانة ...يلا دي فرصتك يا نهي هانم

Anonymous said...

i was totally provoked ya noha lama 2areet da fel ahram...and the first comment is provokative as well..

el mawdoo3 maloosh 3elaka bel sex education...it's a crime and this stupid animal should be punished...3 years seem luxury to me . da " na2es ya'7od shehadet takdeer "...he should be executed & i don't really mind if they burn him on stake....the innocent girl is the one who'll carry the whole burden...or do u have another opinion ya Marwan 3asem ...?

salma

spellz said...

WTF WTF :|
3 yrs leehhhhhhhhhhh
da lw eghtasab otta kano 7abasooooooh
7asbeya allaaaaaaaah
tekoon l magny 3leeeeeehaaaaaaa w tb2a l motaham
I hate our arabic hypocrite manish society bekol ta32idato w ghaba2o
l mar2a dayman mazlooma dayman maqhoora w dayman motahama
yeghtesbooha w b3dain abooha ye2telha mathalan w b3d kda l moghtaseb ya5od bara2a

waaaaaa mo3tasemaaaaah!!
delwa2ty malnaash gheir rabena 3ashaan 5alas maba2ash feeh regala!

fakarteen be post ktabto abl kda esmo 7waa2 l 3arabya
we kont ba2ool feeha hal lw e5tafet 7awwa mn wegood l ragol l 3araby hayetqadem w nb2a omma kwayesa!