لأ أنا مش باحب أتعاكس الصراحة

لسة شايفة دلوقتى برنامج تسعين دقيقة والدم غلى وطق من عروقى ومدلدق دلوقتى عالأرض من واحدة مجهولة وبيئة كمان بتلبس بنطلونات ضيقة اتكلمت قالت إنها بتحب تتعاكس, ولو كانت سكتت عند هذا الانتهاك الصاااارخ لكرامة البنات المصريات ماكنتش استغربت، لكنها كملت وقالت عاااادى جدا : أكيد أى بنت بتحب تتعاكس!!!!!
أنا كلبشت فى ركبى وردحت: نععععععععععم؟ الله يخرب بيتك يا شيخة
الإجابة كانت لسؤال عن جروب الفيسبوك "الحملة القومية لتوسيع بنطلونات البنات" وبغض النظر عن الجروب اللى أنا ماعرفوش واللى يحبنى فى الله يبعتلى لينك، أنا مش عارفة البت الخيخة دى عرفت منين إن ملايييين من البشر هى أكيد ماتعرفش واحد على ألف منهم بيحبوا يتعاكسوا زى بسلامتها؟ إزاى أجزمت بكده يعنى وليه معتبرة نفسها سفيرة لينا كلنا؟ وليه البرنامج سمع وجهة نظر واحدة بس وماكلموش واحدة تانية بتأيد فكرة الجروب مثلا
عموما أنا اتكيفت أوى لما كملت وقالت إن المعاكسات بتبقى سافلة وساعاتبتضطر تقف تتخانق فى الشارع وطبعا اتكشفت على حقيقتها إنها غبية ومتلغبطة ومش فاهمة حاجة، يعنى منييين بتحبى تتعاكسى ومنين بتتخانقى مع اللى يعاكسك؟ شيزوفرنيا دى واللا ايه؟ ولا حضرتك ماشية بمبدأ عاكس آه، تمد إيدك لأ؟
وأنا من منبرى هذا أقر و أؤكد وأعيد وأزيد إنى مش باحب أتعاكس ولا أصحابى بيحبوا يتعاكسوا ولا أى بنت قابلتها فى حياتى بتحب تتعاكس واللى عايز يتكلم يتكلم عن نفسه عشان احنا مش ناقصين قرف
ورجاء أيها المعاكس لما تشوفنى ماشية فى الشارع لابسة ايشارب ومكشرة (قورتى وعن أنيابى كمان) وباصة قدامى وماشية
مشية العساكر اعرف إنى مش باحب أتعاكس وحط وشك فى الأرض وخللى يومك يعدى على خير و يا دار مادخلك شر
والمدونات الحبيبات الجدعات انتوا كمان اكتبوا رأيكوا للمرة العاشرة يمكن يفهموا إننا مش مستنيين واحد يقوللنا ايه اللى بيحصل ده ايه اللى انا شايفه ده عشان نحس بثقتنا فى نفسنا
بنات...هجووووووم