امبارح فجأة افتكرت بنت كانت طلبت مني قبل كده أترجملها مقال كبير، بتاع عشر صفحات، عشان مكاتب الترجمة غالية والصفحة بسبعين جنيه، مش فاكرة اعتذرت ليه بالظبط بس غالباً كان عندي امتحانات أو بحث أقدمه.

مش عارفة ليه افتكرت الموضوع فجأة امبارح وضميري وجعني، مش يمكن لو كنت ساعدتها ماكنتش وقعت في الحالة المادية السيئة اللي أنا فيها دلوقتي؟ كان حيخسرني إيه إني أساعدها لوجه الله، كام ساعة ضاعت مني في فيلم رعب أهبل ولا في تظبيط بروفايل الفيسبوك أو في نوم زيادة، كان ممكن ألاقيلها وقت حتى لو اضطريت أتأخر عليها بس أنا اتغريت وطنشت ومافكرتش الغلبانة دي هتعمل إيه في دراستها، مش عارفة ليه بنلاقي وقت لكل التفاهات، ولما نيجي نساعد الناس وناخد ثواب عظيم الوقت فجأة يضيق والمسئوليات بتبان...