My stalker :(

من يومين في واحد استلمني أول ما خرجت من البيت، كنت رايحة الشغل الساعة 12 الضهر ويادوب مشيت خطوتين حسيت إن في حد ماشي ورايا، مديت شوية ووصلت للشارع الرئيسي، كنت باتكلم في التليفون فوقفت واتدورت، كان راجل كبير في السن وشكله مش طبيعي، هدا شوية ناحيتي كإنه اتفاجئ إني وقفت بعد كده عدا الشارع وأنا عديت بعديه عشان هوا ده طريقي. كنا ماشيين وسط جنايين كده فيها طريقين، لقيته بعد شويه مشي شمال عشان يقرب مني، أنا اترعبت ولفيت الجنينة تاني عشان أبعد عنه، وطلعت السلف ديفينس (اللي هو عبارة عن علبة سبراي فاضية، بس بتديني إحساس مفترض من الأمن، على أساس إن اللي قدامي مش هيعرف هو اترش بإيه بالظبط وكده) فضلت لحد ما ركبت الأوتوبيس بتلفت حواليا وكنت نازلة نفق مشاة خفت لحسن يكون مستنيني تحت، لكن الحمد لله غار.

قبل كده كنت متضايقة جداً إني بخاف وأنا في الشارع والمواصلات، اللي يهمس جنبي باترعب منه وأي حاجة تحصل بفسرها إن اللي قدامي بيتحرش بي، أصل اللي جرى لي مش قليل، بعد كده قلت الحمد لله إن أنا مصحصحة، ماحدش عارف كان إيه اللي حصل لو كنت مش مدية خوانة.