الرحمة يا شيوخ الفضائيات

ساعات باحس إن الشيوخ اللي بيطلعوا في التليفزيون دول مايعرفوش الناس عايشة إزاي وبيبصوا علينا كده بالتليسكوب، امبارح وماما بتقلب القنوات طلع شيخ مغمور على الأقل بالنسبة لي في قناة الناس بيقول لنا إن ربنا مش بينشر وباء في بلد إلا إذا انتشر فيها الفاحشة...عشان كده مصر انتشر فيها انفلونزا الطيور والخنازير, لأ وبيقول أكيد طبعاً عشان قلت كده هتقولوا علي متخلف ورجعي...

أنا قعدت أفكر يا ترى الفاحشة منتشرة بين مين ولاد الأبالسة دول عشان نموتهم يمكن ربنا يرفع عنا البلاء...وخلينا نتفق في الأول إن معنى الانتشار إن يكون 80% مثلاً على الأقل بيمارسوا "الفاحشة دي"...

لقيت إن 36% تقريباً سنهم يا إما تحت 14 سنة أو فوق 65 يعني في سن الضياع...أكتر من ربع المصريين يا إما كل همهم في البلاي ستيشن والأبلة اللي بتضرب العيال أو في المعاش اللي مش مكفي الأدوية والعيال اللي عايزين يتجوزوا ومش لاقيين فلوس.

طب مين بيرتكب الفاحشة؟

وكمان لقيت إن برنامج الأمم المتحدة الإنمائي بيقول إن 14 مليون مصري تحت خط الفقر، ده طبعاً غير الملايين من الموظفين والعمال اللي ماشيين جنب الحيط ومش طالبين غير الستر والعلاوة ومؤمنين بربنا أكتر من الشيخ اللي بيتهمهم بالفاحشة دون وجه حق ولا حتى علم.

مين اللي بيرتكب فاحشة في مصر؟

أكيد في، لكن هل الموضوع واصل لحد الانتشار وفقاً لمعملومات الشيخ الدقيقة؟ يعني هل مثلاً 7 أو 8 من كل 10 حضرتك تعرفهم بيمارسوا فاحشة؟

وهل اللي ماتوا من انفلونزا الطيور لحد دلوقتي كانوا بيمارسوا الفاحشة؟ دول كانوا فلاحين غلابة بيربوا الطيور في البيت عشان هو ده راس المال اللي حيلهم. طبعاً أنا ماكملتش إيه هي الفاحشة اللي الشيخ يقصدها، بس أكيد أكيد يقصد كمية البنات الرهييييييييييييييبة اللي مش محجبات وبيلبسوا بنطلونات، مش كده؟

أنا اللي أعرفه الآية القرآنية الحكيمة "ولا تزر وازرة وزر أخرى"، يعني ماحدش بيتعاقب بذنب حد تاني. يعني مش عشان في واحد فاحش عنده انفلونزا ركب الأصانصير قبليا قمت أنا اتعديت منه يبقى أنا فاحشة وأستاهل، لأ، ده ظلم، وربنا مابيظلمش حد.

يعني مش كفاية الحكومة بتسم بدنا كل يوم بتصريحات من نوع إن المصريين شحاتين عشان مستنيين الدعم وإن في مقابر جماعية مستنيانا لما نوصل بالسلامة...كمان تطلع لنا تتهمنا في شرفنا بالشكل ده، إرحمونا بقى.