ماحدش بقى عارف يتوقع إيه اللي ممكن يحصل، خلونا نتوقع إن المظاهرات تستمر: في الحالة دي ياريت نبطل نغمة "كفاية كده وإدوا للجيش فرصة" هو حد ماسك إيد الجيش وبيمنعه من العمل؟ إحنا عايزين اللي ضربوا الناس بالنار يتحبسوا، مش معقول هتبقى الفلوس أغلى عندنا من دم الشهداء عشان نحبس رجال الأعمال ومانحبسش ظباط الشرطة اللي ضربوا متظاهرين ماكانوش رافعين عصاية حتى. وشفيق قاعد ليه؟ أبو الغيط؟ مرعي؟ ماحدش قال الوزارات تتعطل، يجيبوا ناس مالهمش علاقة بالنظام "السابق" وفي اقتراحات فعلاً، اللي بيقول "هيجيبوا مين بدالهم " بيهينوا مصر معلش يعني، البلد فيها شرفاء كتير.
وبعدين الاعتصامات والمظاهرات ما هي بقى لها سنين شغالة، الناس عايزة تعيش بكرامة الموضوع مش محتاج مفهومية، إيه اللي خلى الاعتصامات فجأة بتوقف الحال؟ إيه وجه تعطيل الحال اللهم إلا عدم استطاعة العربيات إنهم يعدوا من الميدان وقدامهم 100 طريقة تانية، بسيطة مش كده؟ خلاص الي عايز يشتغل بيعرف ينزل واللي عايز يدرس الدراسة بتبدأ وحالة عدم الأمان دي يتسأل فيها قيادات الداخلية مش احنا.
الثورة مش حاجة بسيطة، مش 18 يوم والموضوع خلص، الثورة ثورة دائمة ضد الظلم والقتل والسرقة والفساد، التمن اتدفع خلاص ودم الشهداء غالي، ماتوا عشان اللي يمسكنا يلبي لنا طلبتانا مش عشان يطلع يقول لنا احنا أسيادكوا يا كلاب!
3 comments:
كفاية عبط وتهريج ..اه لازمة الواقفة في ميدان التحرير الناس زهقت من العبط ..العملية بقت اوفر اوي ..نفسي افهم لغايو امتي هيفضل الجيش يطبطب عليكم ..البلد بنخرب وبتنهار وانتم عالم فاضية سيبو الجيش يشتغل بقي ..طيب هيشتغل ازاي وانتم مضييعن وقت الجيش عشان يفضل واقف جنبكم ليل نهار عشان يحمكيم بجد كفاية عبط بقي ..وهي الداخيلة عارفة تشتغل كل شوية غيرو الوزير الفلاني والعلاني ..ربنا يخدكم ..ولازم تعرفو بجد ان البلد زهقت منكم والله العظم هتخربوها بغباوتكم
أه وماله، نبطل عبط وتهريج، ومش مهم الشهداء اللي ماتوا عشان حضرتك تعيش بكرامة، ده لو عارف يعني إيه كرامة.
ام الشهداء اللي ماتو هنفضل نخرب في ام البلد ونموت 85مليون واحد عشان بدل ما يبقي عندنا 10شهدا يبقي عند 85مليون شهيد ايه ام الغبا ده
Post a Comment