الحرس الجامعي مشي؟

دلوقتي أنا رحت الجامعة ومالقيتش الحرس الجامعي موجود، لقيت موظفين أمن لكن مالقيتش حد لابس ميري، بس النهاردة شفت رئيس الحرس، هو على طول لابس مدني فأنا مش عارفة هو أصلاً ظابط ولا مدني.

على العموم بما إن النظام صاحي وبيلعب فأنا بأقول لكوا أهو، الأسبوع اللي جاي مع بداية الدراسة هيدخل بلطجية وهيبقى معاهم مخدرات أو أسلحة، وهيخوفوا الطلبة، عشان يخلوا الناس تلعن اليوم اللي الثورة قامت فيه والحرس الجامعي اتشال.

احنا خلاص حفظنا النظام، ماشي بطريقة يا تسيبوني أعك يا إما هطين عليكوا عيشيتكوا، زي كده مبارك لما قال لو مشيت الإخوان هيحكموا واختاروا بيني وبين الفوضى، على اساس إن المليارات المنهوبة والشرطة اللي مش بتظهر غير في المظاهرات دي برضو ماكانتش فوضى.

وبعدين فين أم الشرطة كل ما اتكلم مع حد يقول لي البلطجية بيوقفوا الطريق ويسرقوا الناس، معظمها إشاعات وكلام مبالغ فيه بس يعني هم سايبين البلد من غير حراسة ليه؟ عليكوا نور. بيربونا. بيقولوا لنا إنتوا مش عملتوا ثورة؟ مش مشيتوا مبارك الحصن المنيع؟ إشربوا بقى.

أنا شخصياً مش فارقة معايا عمر ما كانت الشرطة رمز للأمان بالنسبة لي لإن دورهم في الفترة اللي فاتت هو حماية النظام وقمع المعارضة فقط لا غير، لا أمن ولا أمن، مع الاحترام للقلة الشرفاء اللي في الوزارة، الواحد بياخد باله على نفسه وبيسيب الباقي على ربنا.

هو ده سيناريو الأسبوع اللي جاي في الجامعات وهتقولوا وايلد قالت، لازم نفتح مخ الناس كده إن معظم البلطجية اللي بيحركهم الحزب الوطني أو الداخلية (والبلطجية شفتهم بعيني في المظاهرات بياخدوا أوامر من اللواءات مفيش داعي لأي نوع من النقاش في النقطة دي). وربنا يستر.