الجيش والشعب إيد واحدة؟

ماحدش كان عايز يوصل للمرحلة دي أبداً، ماحدش نزل من يوم 28 يناير لحد امبارح بهدف الصدام مع الجيش؛ حتى اللي كانوا مش موافقين أو مش فاهمين الجيش بيعمل إيه مستحيل كانوا يبدأوا بالهجوم، حد حايهجم على دبابة أو مدرعة أو 777؟

طيب، دلوقتي مبارك لا مؤاخذة كان عمال يش* في دماغنا وبعترلنا كرامتنا وخلانا نحس بينا وبين نفسنا إننا مانجيش غير بالكرباج عشان نعرف نمشي، وآدي آخرة الكرباج، هو غار في داهية وشهدائنا ماتوا عشان رفضوا الكرباج.

الكرباج نهايته منيلة بنيلة، أتمنى يكون ده واضح للجميع.

ييجي بقى الجيش يعمل قانون تجريم الاعتصامات، ويفض الاعتصام ضد حكومة شفيق اللي مشيت من هنا وأمن الدولة فرموا الورق من هنا، ويضرب طلاب وبنات معتصمين جوة الحرم الجامعي، ويعذب متظاهرين ويكشف على عذرية البنات، ماشي بنفس أسلوب النظام القديم ولا كأن اللي جرى ما كان، ده احنا لسة يا دوب طاقين وخارجين عن شعورنا يا جيش، ماينفعش تكمومنا دلوقتي، لما نبقى قضينا على القيادات الفاسدة وأخدنا مرتبات تعيشنا كبني آدمين إبقوا سيبونا نصوت ومتسألوش فينا، بالنسبة لاعتصام 9 مارس مثلاً إيه الضرر إنك تسيب الناس معتصمين على الجزيرة لا سادين الطريق ولا موقفين الحال؟

طب احنا عارفين إن الجيش مش ثوري ومش بيسمح بالاعتراض، حد قال لكوا تستخدموا مع المعتصمين العنف ده؟؟؟ ليه الجيش يورط نفسه في حاجة زي دي بعد ما كان الناس مستقبلاه بالأحضان والورود...؟

بالنسبة للغز امبارح، الظباط المعتصمين دول احتمال يكونوا فعلاً شايفين فساد في الجيش ومعترضين عليه، إيش عرفنا احنا؟ واحتمال يكونوا مزقوقين واحتمال يكون عليهم أسئلة كتير، ماحدش عارف الحقيقة فين، الحقيقة دلوقتي إن في واحد مات برصاصة في راسه لا ليه في الطور ولا في الطحين، كان معتصم في الميدان لأي سبب، عايز مبارك يتحاكم، عايز يجيب حق الشهداء، عايز يحاكم صفوت الشريف والحيتان اللي لسة مبرطعين برة السجن ولا كأنهم عملوا عمايل، يموت ليه؟ ماكانش في حد من المعتصمين معاه سلاح، ومفيش حد منهم بدأ بالهجوم على قوات الجيش، لكن الجيش نزل لهم بحشود رهيبة وضرب نار رهيب، كل ده ليه يا ربي؟ إنتوا هجمتوا الساعة 3 إلا ربع وأخدتوا الظباط اللي عايزينهم، ماشي ظباط اعتصموا ولازم يتقدموا لمحاكمة عسكرية أنا مش حاتكلم في نقطة ماعرفهاش، أنا حاتكلم في اللي أعرفه، إن ضرب النار استمر لأكتر من ساعتين بعد اعتقال الظباط وشكلهم حيهجموا تاني النهاردة بالليل، إن في واحد مات من غير ذنب واللي قتله للأسف جيش بلده، وفي واحد تاني كان مصاب اتصور فيديو وعساكر الجيش بيضربوا على راسه من غير رحمة تقولش متظاهر إسرائيلي، ليه كده؟

احنا دلوقتي عندنا طرف قوي وهو الجيش وطرف أضعف وهو المعتصمين، مين اللي المفروض يسيطر على أفعاله ويخطط كويس بحيث البلد دي ماتولعش أكتر ما هي والعة؟ أكيد الطرف القوي. ومش كل ما نيجي نفتح بقنا تقولوا لنا انتوا عايزين تفككوا الجيش: إطلاقاً، ويبقى مجنون اللي عايز يدمر جيشه، بس هو في حل تالت غير إننا نبقى عبيد تاني أو أننا نبقى بلطجية: نبقى بني آدمين! حكموا عقلكوا يا جيشنا وبطلوا عنف مع معتصمين سلميين وماتخسروش شعبكوا أكتر من كده!