Tuesday, May 17, 2011

إنتوا فاكرين نفسكوا هاتحرروا القدس؟

لأ. وماحدش يقدر يحرر القدس غير أهلها. احنا لما حررنا مصر، على الأقل من مبارك، ماكانش في شعوب تانية بتساعدنا مساعدة مباشرة ... احنا اتقطعنا عن العالم واستمرينا نكافح وسط الرصاص. احنا حطينا هدف واضح قدام عينينا وحققناه ...
فدلوقتي لما نيجي نتكلم على القوافل اللي رايحة غزة أو التظاهر قدام السفارة، ماينفعش نقول مش وقته وتعالوا نحل مشاكلنا احنا الأول. في حقايق لازم تبقى واضحة للجميع ... حرية مصر مرتبطة بحرية الوطن العربي، ولو ماخدناش خطوات تدعم الشعوب العربية في ثوراتها وانتفاضاتها حاننتكس نكسة سودا ولا كأنك يا أبو زيد ما غزيت ... مفيش حاجة اسمها بلد تنهض والدول اللي حواليها متضررة، خصوصاً لو كانت متضررة منها زي ما احنا قاطعين عن غزة مياه ونور وأول ما نبيل العربي صرح إن معبر غزة هيتفتح رموه جامعة الدول العربية.
مش ال200 نفر اللي رايحين يزوروا غزة أو يوصلوا مساعدات هما اللي هيضروا اقتصاد مصر ويوقفوا الحال ويحلوا المشاكل! في 79 مليون و999 ألف و800 غيرهم! هو ده المجتمع المحترم، يبقى في ناس شغالة على الجبهة الداخلية وناس بتساعد الدول اللي حواليها وبتبني معاهم علاقات قوية.
وبعدين أنا اتصدمت صدمة عمري في الجيش بقى. طول عمري عايشة حلم أبطال أكتوبر والجندي المجهول، أفوق على ظابط بيقول لمحمد عفت امبارح بعد اعتقاله قدام السفارة الإسرائيلية العلم مش حاينزل لباسك هو اللي هينزل؟ ينفع كده؟ وأفضل طول الليل أحلم إن الجيش موت اتنين واحد منهم راسه انفجرت والتاني رموه في النيل. أكيد مفيش تعميم، لكن زي ما الإعلاميين عمالين يقولوا لنا الجيش خط أحمر، كل واحد في البلد دي لازم يعرف إن كرامة المصري وحياته هم الخط الأحمر الحقيقي. احنا عملنا ثورة مش بس لتحسين الظروف الاقتصادية وإجراء إصلاحات سياسية بس عشان نتعامل بكرامة مهما كانت الظروف ... مفيش أي ظابط يبهدلنا بعد كده بقى هو ماحدش بيتعلم من الثورة يا ناس؟
ومفيش اقتحام حصل للسفارة، بلاش إشاعات مغرضة منك ليه. السفارة في دور عالي وكان حواليها جيوش، المتظاهرين كان بيحاولوا يكسروا الكردون ... وحتى لو الكردون يا حرام نفسيته تعبانة وجاله فراغ أمني ده مايديش الحق لأي حد إنه يهين المتظاهرين أو يضربهم بالرصاص أو يعرضهم على محاكمة عسكرية وكل الهم اللي احنا فيه من ساعة ما مبارك تنحى ده. وعلى فكرة، لو فضلتوا شايفين إن المتظاهرين متهورين ويستاهلوا والكلام العجيب ده إبقوا سلموا لي على المظاهرات من هنا ورايح ... حانرجع أسوأ من الأول لو حجرنا على حقنا في التظاهر.
حاجة كمان بقى خلونا نخلص، مفيش حاجة اسمها تحميل المتظاهرين أمام الزفارة مسئولية عجن الجيش لأي اعتصام أو إضراب بعد كده. الجيش مش محتاج توصية في الموضوع ده. 25 فبراير ضربوا المعتصمين عشان عايزين شفيق يا راجل يستقيل، 9 مارس ضربوا المتظاهرين وكشفوا على عذرية البنات في السجن الحربي، مش عارفة امتى اقتحموا الحرم الجامعي وضربوا الطلاب الجدعان اللي عايزين يشيلوا عميد كليتهم الفاسد، وسمعت كمان، 9 إبريل اليوم الأسود ضربوا كمية رصاص مهولة وعلي ماهر استشهد، متظاهر عادي زي زيك اتقتل وماحدش عايز يفتكره! فالتعامل العنيف من الجيش أو الشرطة مع المظاهرات مهما كانت مش هايجيب أي نتيجة، بالعكس الناس حاتصر أكتر على مطالبها ...
يا ناس هو انتوا نسيتوا الثورة؟!!
ربنا يهدينا ويهديكوا كده ونساند حقوق الشعوب في استرداد كرامتها زي ما بنعافر في بلدنا، ربنا ادالك قدرة تعمل الاتنين والله مش محتاج تبقى رامبو، أو على الأقل ماتهبطش من عزيمة اللي عايز يروح غزة.

1 comment:

Anonymous said...

طيب انتي عايزة الجيش يعمل ايه يطبطب عليهم ..الجيش عاملهم باحترام وقال يا اخونا الوقفات دي بتخرب البلد ..وساب الناي واقفة ادام السفرة الاسرائلية من الصبخ لغاية 12باليل اكتر من كده ايه ..علم ايه اللي هينزل ..اصلا مفيش قنون دولي يخلينا نقتحم سفارة عشان ننزل علمها ايه التهريج ده .بالذمة ده كلام