ده أول عيد عمال يعدى عليا و أنا "امرأة عاملة"
و لو سألتونى النهارده بيفكرك بإيه؟
حاقوللكوا بيفكرنى إن أنا بقالى شهرين و نص باشتغل و لسة ماقبضتش
بشتغل لله و للوطن... على بال ما سيادة رئيس الجامعة يحن علينا و يبعت لنا القرار اللى فيه مرتبنا, هو يتأخر براحته و الموظفين يتمطعوا و يناموا و يقوموا براحتهم و مش مهم الناس المحترمة المسئولين عن تعليم المئات من شباب هذا البلد, يروحوا بقى ياخدوا المصروف من أهاليهم زى التلامذة ولا يشحتوا مش مهم. أنا عرفت ان المرتبات نزلت من الفراشين! لقيت عم أحمد ماسك بيقلب فى الفلوس و يتحسر على المرتب اللى بيجيله أنيميا شهر بعد شهر
أنا: هى المرتبات جات يا عم أحمد؟
عم أحمد: أيوة
نزلت على الخزنة, قلت يمكن نزلّنا مرتبات و الموظفين نايمين على ودانهم, الراجل اللى فى الخزنة: احتمال الشهر اللى جاى (نظرة عينيا: نعم يادلعدىىىى) شوفى يمكن نزل لكوا شيكات. نشوف الشيكات, مفيش شيكات. طب لما هما ناويين يذلونا على بال ما يقبضونا, نزلوا لنا جدول ليييه الترم ده؟ اه صحيح, كده مش حيبقى ذلونا ولا حاجة
شهرين و نص باحاول أفهم 400 بنى آدم الفرق بين الصفة و الاسم و فشلت
مش عشان انا مش باعرف اشرح
عشان هما 400
و الصلاة على النبى أحسن
No comments:
Post a Comment