Saturday, September 19, 2009

أربعة مواقف قبل بدء عيد التحرش

الموقف الأول:
اليوم السابع نشرت خبر تحرش شاب بسيدة
وهي بتصلي في الجامع.
تخيلوا؟
ده عشان اللي بيقولوا إن البنات اللي "لابسة عريان" هما اللي الشباب بيتحرش بيهم والملتزمات "في لبسهم" عمر أبداً أبداً أبداً ما حد بيبصلهم.
يعني يا ربي المكان الوحيد اللي الواحد بيحس فيه بالأمان ينجسوه؟

الموقف الثاني:
المدونة آسر ياسر عاملة جروب على الفيسبوك اسمه "أنا مش هاتحجب وإنت حتتأدب!" وده مش جديد، الجديد بقى إن الجروب اتقفل واتبعتلها رسايل تشتمها وتشتم اللي خلفوها وتخوض في أعراضها وأعراض عيليتها وهددوها إلخ.
السؤال هنا، إزاي حد ممكن يدعو للحجاب وفي نفس الوقت يسب الناس؟ هو مش الدين منظومة واحدة، ياناخدها كلها يا نسيبها كلها، مش ربنا قال إدفع بالتي هي أحسن، وسيدنا محمد (ص) قال ليس المؤمن بطعان ولا لعان ولا فاحش ولا بذئ، يا ترى اللي عنده الفكرتين المتناقضتين تماماً دول في مخه جابهم إزاي ومقتنع بيهم مع بعض إزاي؟ إذا كان بيقولوا إن المش محجبات سايبين جزء من الدين...أمال هما عاملين إيه؟
فين الدين النصيحة، وفين الدين المعاملة؟ وإزاي نستنى من واحدة بتتشتم عشان مش محجبة إنها تحب الحجاب أو تفكر تلبسه؟

الموقف الثالث:
الأهرام ناشرة النهاردة بالبنط العريض إن الداخلية ناشرة بوليس سري لعدم تكرار حوادث التحرش في العيد.
:))))))))))))))))
الخبر ده لو صحيح في ظباط هينفذوا وفي ظباط هيطنشوا، بس كل اللي بيحارب الوكسة دي كسبان، لإن أخيراً الجرايد ادت للموضوع حجمه وأخيراً في أفراد في الداخلية بقوا بياخدوا الموضوع بجدية، الموضوع كان نايم ودلوقتي بقى على كل لسان، وده في حد ذاته مكسب، عشان اللي مش بيديلك حقك لازم تاخده من حباب عينيه...

الموقف الرابع:
الشيخ صفوت حجازي طلع النهاردة في مع الشيخ محمد جبريل...وبيقول إذا كان اللي ماشية في الشارع شبه عريانة بتقول دي حرية شخصية، يبقى اللي بيعاكس برضو عنده حرية شخصية.
!!!!!!!!!!!!!
تيجي إزاي دي يا عم الشيخ؟ أولاً خلينا نتفق على نقطة، أنا ماشفتش في حياتي واحدة شبه عريانة غير على الشواطئ، ودي غلطة الفنادق إنها سايبة الموضوع على البحري مع إن أوروبا نفسها في شواطئ العري ممنوع فيها، فلما ييجوا هنا عشان يقلعوا تماماً يبقى إنت بتقوللهم إن مصر مافيهاش نظام ولا قوانين ولا يحزنون. وبعدين هي دي طريقة دعوى؟ إلبسي الحجاب يا إما أي حد يقفش فيكي براحته بقى؟ ده اسمه إرهاب فكري وبيمهد للإرهاب الفعلي بقى...المفروض البنات لما يسمعوا كلامك حيحبوا الحجاب إزاي؟ في الحالة دي حيلبسوه لمجرد إنهم خايفين لكن تصرفاتهم بقى أجارك الله يا شيخ يا محترم.
هو ده بقى اللي بتقولوه للناس في خطب الجمعة وخطبة العيد والأخطر في التليفزيون...لوم كامل للمرأة وكأن الله مأمرش بغض البصر والتحكم في الغرائز...إزاي واحدة عايزة تلبس قميص وبنطلون وتنزل تشتغل أو تشارك في مظاهرة أو تروح الجامعة أو تعمل خير تساويها بواحد صايع ضايع بينتهك حرمة الجسد وتقول عليه حر؟ هو مش أعراض الناس حرام؟ هو مش ربنا خلق المرأة لأسباب تانية كتييييييير غير إنها تتحجب وبس؟ يعني يا سيادة الشيخ لما نيجي نسأل بعد كده هو التحرش منتشر ليه نعرف إن إنت وأمثالك السبب؟

3 comments:

foxamr said...

علي فكرة الموضوع فيه تناقض كبير جدا
بداية من الجروب الاهبل الاستفزازي اللي بتقول انا مش هاتحجب وانت هاتتادب
مرورا بان الدين بيقول و البنات و الحرية
هو لو كل واحدة وواحدة مشيوا محترمين في الشارع واتقوا الله مافيش حاجة هاتحصل خالص
ولا محتاجين حرية شخصية ولا محتاجين جروبات استفزازية ولا محتاجين عساكر سرية
طول مافيه انحراف اخلاقي في المجتمع يبقى فيه تحرش و سرقة وزنا و فساد
ياريت ياندخل الدين في الموضوع كاملا يا اما ماندخلش الدين خالص

Wild at Heart said...

على فكرة إنت قلت "واحدة وواحدة
:))))
برضو اللبس مش دليل على الاحترام أو غيره واللي يحكم على أساسه بس يستاهل يتضحك عليه.
تحياتي.

foxamr said...

قصدي اقول واحد وواحدة
يعني لو كل ولد و بنت مشيوا محترمين في الشارع واقتوا الله...........