الشرطة تنتقم من الشعب

عملنا لهم إيه ماتفهمش، فاردين دراعتهم علينا ولما نقول أي يقولوا علينا بلطجية وعايزين نخرب البلد. قتلنا عيالهم وهم بيتفرجوا على المظاهرات من البلكونة؟ ضربناهم بالرشاش في وشهم وخليناهم يفقدوا البصر؟ ضربناهم على رف رخام وسور حديد بعد كده قلنا عليهم أصلهم بلعوا لفافة بانجو جابت لهم الكافية؟

نازلين فينا ضرب وشتيمة وإهانة ليه نفسي أعرف. ماحدش يقول لي قانون طوارئ ... قانون الطوارئ بيتطبق على الإرهاب والمخدرات رسمياً يعني، مش بيقول إن المتهمين يتضربوا ويتعروا ويتعلقوا من رجليهم لحد ما يموتوا.

احنا ماعملناش للشرطة حاجة. لو في متظاهرين حرقوا الأقسام وولعوا في المدرعات فده كان رد فعل لسنين طويلة من المهانة وقلة القيمة.، مش فعل في حد ذاته. أنا مش باشجعه لكن بأقول إن في سبب والشرطة هي اللي بادئة.

وعليه أيها السادة مفيش حاجة اسمها المتهمين أو الأبرياء يستاهلوا يتضربوا ويتهانوا بالشكل ده في الأقسام، تصرفات الشرطة كانت سبب رئيسي في الثورة، ومهما حصل مش هانسمح لهم بالوساخات دي تاني. الشرطة تنزل تهاجم على البلطجية زي مأمور الموسكي وتنقذ إعلامية من التحرش في التحرير ماشي، ده دورهم واللي بيأدي دوره مش هانيجي جنبه، لكن اللي يموت ناس من الضرب إن شالله يكونوا أعتى المجرمين مالهمش مكان في مصر بعد الثورة ومايستاهلوش مليم من الميزانية.

مش كل ما نلاقي واحد فلفص في القسم وكان داخل على رجليه خارج جثة مليانة سحجات الناس تقول عليه اصله أكيد غلط في الظابط، أصله أكيد بلطجي، أصل لازم الشرطة تبقى حازمة، دي حرمة أموات ولازم تفكروا ألف مرة قبل ما تشوهوا صورة واحد ميت، وبعدين الإحساس نعمة يا أخي ... السواق لو غلط في الظابط أو شتمه يتحول لمحكمة الجنح وياخد اللي فيه النصيب حبس أو غرامة، لكن مايفضلش يتضرب الله أعلم كام ساعة لحد ما يطلع في الروح. عمرك اتضربت قبل كده؟ عارف قد إيه بتوجع؟ عمرك مسكت سلك عريان لمدة ثانية بالصدفة؟ فاكر وجعك قد إيه؟ في أي بني آدم يستاهل يجرى له كده لأي جريمة ارتكبها؟

وبعدين هي الشرطة دي يا تختفي من الساعة 6 حتى عساكر المرور مانلاقيهاش يا إما ترجع تضرب في الناس، لا معلش ده كان زمان يا باشا، أنا مبسوطة جداً إن الناس تظاهرت قدام القسم وقلبوها ليلة سودا على دماغهم، يقولوا عليهم حاولوا يقتحموا بقى مايحاولوش، قبل ما تلوموا الناس إسألوا نفسكوا إيه اللي يخليهم يضطروا ياخدوا حقهم بدراعهم، إيه اللي يخللي جريمة عليها كذا شاهد بقى لها سنة بحالها تتداول في المحاكم ولسة الحكم 30 يونيو. وجرايم تانية واضحة زي الشمس واتقدم فيها بلاغات ولا حس ولا خبر.

لا يا باشا، البلد دي هاتنضف يعني هاتنضف، هاتيجي تقبض على البلطجية وتحسسنا بالأمان أهلاً وسهلاً، هاتضرب البلطجي ده في القسم لحد ما يموت يبقى هاتتجرر في المحاكم زي إسلام نبيه وأكرم سليمان والبلطجي الكبير العادلي وغيره.

يوم الاتنين وقفة احتجاجية قدام وزارة الداخلية في لاظوغلي