ملف أحمد زكي بدر - الصفحة الثالثة

وزير التعليم وعدوي اللدود ذو العقلية الأمنية اللي ماتخرش المية ناقل المراقبين بتوع الثانوية العامة من محافظة لمحافظة لأول مرة في حدود علمي، أكيد طبعاً عشان "يمنع الغش" على أساس إن المراقب ممكن يبقى عارف حد في محافظته فيسيبه يغش...بغض النظر عن إن المراقب بياخد ملاليم بمعنى الكلمة وبيسافر طبعاً في مواصلات مهينة مش في الأسباني...في أسبوع واحد يا حرام 3 مراقبين فيصوا في الحر وماتوا...شفتوا الفرن اللي كنا فيه في القاهرة يوم الاتنين والتلات؟ تخيلوا بقى في الصعيد الجو كان عامل إزاي...مش عارفة إيه المنطق اللي بيقول إن الواحد لو سافر برة محافظته مش حايسمح للطلبة إنهم يغشوا...في حد يخللي راجل عجوز عنده 58 سنة طافح المر طول عمره يسافر في نار جهنم دي لمجرد إن في احتمال، احتمال يعني، إنه يعرف طالب في لجنته ويسمح له يغش؟

اللي ماعندوش ضمير في محافظته مش حيبقى عنده ضمير في أي داهية وهيسمح للطلبة برضو إنها تغش، يبقى ليه شحططة الناس الغلابة؟ عجبني فعلاً رد فعل المذيعة ريم ماجد امبارح على برنامج يلدنا لما قالت مش كفاية الظروف البائسة اللي الناس دي عايشة فيها، كمان مخليهم يموتوا بالطريقة دي، وتعويض إيه اللي الوزير دفعه لأهل المتوفى، بتعوض مين عن مين؟

صحيح هو فار ومات؟ ده بني آدم كان مظلوم في وزارتك ومات وذنبه في رقبتك يا وزير.

ولو عايزين نتكلم بصراحة بقى، الوزير لما كان ماسك رئيس جامعة عين شمس ربنا ما يعودها أيام كان بيبعت العمال "يوصوا" على طلبة معينة، بيدخل العامل على الأساتذة في الكنترول ويقول بالنص رئيس الجامعة موصي على الاسم ده، والكلام ده أنا بقوله على مسؤوليتي، وللقارئ العزيز يتخيل هو يقصد إيه بمعنى التوصية.

ماتجيش بقى بعد التاريخ المشرف ده تنقل الناس الغلابة منعاً للغش، لو موظف معين اتعرف إنه بيسمح للغش المفروض هو لوحده يتعاقب - والطلبة طبعاً - لكن نظام العاطل في الباطل ده حرام.

فرحت جداً لما عرفت إن أسرة الضحية/المتوفى الأول قررت تقاضي الوزير، ولحد ما المراقبين يتعتقوا من الوزير ربنا يستر عليهم.

ملف أحمد زكي بدر (الصفحة الثانية)

امبارح خالد الذكر زار مدرسة حكومة في حلوان زيارة مفاجئة وحسب المصري اليوم نقل إدارة المدرسة كلها وشحططها عشان:
1) سوء حالة المرافق.
2) طالب مش معاه أدوات مدرسية.
3) دخل للطلبة وسألهم على إعراب جملة ماعرفوش يجاوبوا.
4) لقى المدير جاي متأخر.

والمعلقين على الخبر فرحانين بيه قوي...يا جماعة ده أحمد زكي بدر، أحمد زكي بدر اللي هو مين؟ اللي هو دخل بلطجية الجامعة عشان يضربوا طلبة الإخوان وفي صحفي اسمه عصام شرف كان هيروح فطيس، واللي كان بيعمل حفلات وسط اليوم الدراسي، واللي كان بيحول المعيدين والمدرسين المساعدين إداري عشان ماخلصوش الرسايل بتاعتهم في خلال خمس سنين من غير ما يراعي ظروفهم وحتى لو كانوا مخلصين مع إن من حقهم قانوناً إنهم ياخدوا مد.

فيا ريت لما نتكلم عن أحمد زكي بدر نفتكر التلات إنجازات دول الله يكرمكوا، البلطجية والحفلات والمعيدين. البلطجية والحفلات والمعيدين
دلوقتي لما يسأل طلبة ومايعرفوش يردوا، مش ممكن يكونوا خايفين ومرعوبين؟ شايفين الوزير واقف قدامهم عايزهم يعملوا إيه؟ إذا كان في مدرسين بيخوفوا الطلبة لدرجة إنهم يخلوهم يعملوا على روحهم. عايزهم يشوفوا وزير صوته جهوري يقدروا يفكروا ويردوا عادي؟

وبعدين الطلاب اللي مش معاه أدوات ده حد سأله لاقي ياكل ولا لأ؟ أبوه بياخد كام؟ الأدوات بقت بكام؟ وبعدين أفرض يا أخي نسيها اليوم ده...

والوزير ماعجبهوش حال المرافق، طب هو مدي المدرسة كام عشان تقدر تصرف على التطويرات؟ في آلاف المدارس في مصر وكلنا عارفين إن وزارة التعليم في ديل القايمة، مش المفروض قبل الوزير ما يشتكي إن مرافق المدرسة أي كلام إنه يسأل موارد الوزارة بتروح فين؟
وبعدين اللي فهمته من الخبر إن المدرسة كلها اتنقلت هيلة بيلة كده...ده من إيه ده؟ لو المدير مجاش ومدرسين الحساب والعربي ماجوش إيه ذنب العمال اللي بياخدوا ملاليم والمدرسين اللي شايفين شغلهم؟
أنا بقى مش غايظني أي حاجة في أم الموضوع ده غير المعلقين! احنا حنفضل طيبين لحد امتى؟...ألاقي واحدة امبارح طالعة على التليفزيون من الاعتصام وهي بتاخد 99 جنيه في الشهر بتستغيث بحسني مبارك إنه ينقذهما من الحكومة!!!
على أساس إن حسني مبارك معارضة يعني؟

نوارة برضو مفروسة

ملف أحمد زكي بدر (الصفحة الأولى)

بصوا بقى، أحمد زكي بدر ضرني شخصياً، مرة لما دخل بلطجية الحرم الجامعي عشان يضرب الإخوان، ومرة لما عمل حفلات في الجامعة وبقينا بنحضر المحاضرات على واحدة ونص، وكل مصيبة من دول حصلت كذا مرة، يعني الراجل ده بلا قافية كده كان مطلع لي برج في دماغي وكنت كل ما أفتكره أو أعدي جنب المكتب بتاعه أدعي يجي له أزمة قلبية أو سرطان البروستاتا أو تشنجات أكتر ما هو متشنج ويحل عن سمانا بقى.
المهم إنه غار في داهية بعيد عن الجامعة بقى، لكن على مين، أنا لا بسامح ولا بنسى، مش حنسى إنه حسسني بالخوف وأنا في الحرم الجامعي ولا إني بقيت بعيط كل ما باسمع عن قرارات الفصل اللي بيعملها سواء لمعاوني أعضاء هيئة التدريس أو لطلبة الإخوان لمجرد مثلاً إنهم عملوا معرض عن المسجد الأقصى، فالموضوع شخصي بحت وأنا غلاوية وانتقامية، عشان كده أنا هعمل له ملف في المدونة دي، كل ما يغلط هسجل له غلطته وحتفضل موجودة لي وللتاريخ كدهو، مش على أمل إن غلطاته تؤدي لعزله من المنصب لا سمح الله ولا حاجة، لكن عشان ناري تبرد.
النهاردة بقى طالع يقول إيه؟
قرار منع الضرب خلى المدرس ملطشة
:)))))))))))))
يعني المدرس مش ملطشة عشان ممكن يتضرب قدام الطلبة ومايعرفش ياخد حقه، ولا عشان بياخد 200 جنيه في أول التعيين، ولا إنه بيفضل مؤقت ومابيتثبتش وفقاً للقانون، ولا إن ظروف المدارس مش مساعداه نهائي على التحكم في الطلبة أو أداء دوره، المدرس ملطشوة عشان المفروض يدخل الفصل معاه كرباج ويعلق العيال في السقف زي رمضان مبروك أبو العلمين حمودة كده، هي مش كفاية العيال اللي ماتت من الضرب في المدارس؟
ماتت من الضرب
مش كفاية إسلام اللي المدرس فضل يضربه بالشالوت عشان ماعملش الواجب لحد ما مات؟ وبعدها مفيش بأسبوع بنت تانية ماتت من الخوف عشان ماكانتش عاملة الهباب الواجب؟
الكلام ده كان وقت ما الضرب ممنوع، دلوقتي بقى لما الوزير يرجعنا 100 سنة لورا ويدي الضوء الأخضر للمدرسين إنهم يستخدموا أساليب عفا عليها الزمن وبتطلع عيال مشوهة نفسياً وجسدياً، عيال ماعندهاش كرامة ولا كبرياء...هي ناقصة؟؟؟
دي الصفحة الأولى، لسه بقى موضوع الثانوية القديمة اللي هترجع تاني دي...والتصريحات العجيبة والشتايم...ما أنا عارفاه راجل كله ذوق...الملف مفتوح أهو...وكل قرار وكلمة هايتسجلوا لك أيها الوزير.